Sápmi |

Báišduoddaris navdon boazosuolavuođas illá fidne velge dieđuid, vaikko rihkusalmmuhus lea dahkkon jo jahkebealli dassái

Jos bálgosis gávdnojit navdojuvvon rievdaduvvon mearkkat, bálggus vuovdá daid bohccuid ja bidjá beljiid rádjui, muitala boazoisit Ari-Heikki Aikio.

Ari-Heikki Aikio
Báišduoddara bálgosa boazoisit Ari-Heikki Aikio ii sáhte kommenteret navdon boazosuolavuođa, ovdalgo dutkan lea nohkan. Govva: Vesa Toppari / Yle

Báišduoddara bálggus dagai miessemánus rihkusalmmuhusa, go navdet bálgosis rievdadan mearkkaid ja ná sirdán bohcco oamasteami eret rivttes eaiggádis.

Jahkebeali maŋŋáge áššis illá sáhttá addit lassidieđuid, dadjá boazoisit Ari-Heikki Aikio.

– Mun lean fidnen rávvagiid, ahte in sáhte kommenteret, ovdalgo dutkan lea nohkan.

Boazoisit nanne, ahte bolesat leamašan čuovvumin muhtun Báišduoddara bigálusaid dán čavčča.

Boles lea árabut muitalan, ahte dat dutká bealljemearkkaid rievdadeami roava suolavuođa- ja vearistanrihkusin ja suoláduvvon opmodaga árvu lea stuoris.

Olles ovdadutkama áigge eai leat muitalan, ahte galle olbmo leat dutkama vuolde.

Eai muital navdojuvvon mearkarievdademiid meari

Báišduoddara bálgosis eai muital makkárge loguid das, man olu bálgosis leat gávdnon navdojuvvon mearkarievdadeamit.

Jos bálgosis gávdnojit navdojuvvon rievdaduvvon mearkkat, bálggus vuovdá daid bohccuid ja bidjá beljiid rádjui, muitala Ari-Heikki Aikio.

Gieskat bolesis muitaledje, ahte ovdadutkamiin sávvet geargat boahtte giđa. Mediaid dieđuid mielde bohccuid bealljemearkkaid livčče rievdadan sihke Suoma ja Norgga boazoeaiggádiid bohccuin.

Ášši lea váttis bálgosii ja dat lea barggahan olu.

– Dát lea váttis dákkár unna servvodahkii. Muhtumat váldán garrasit. Lassibargu lea olu, loahpaha Aikio.

Varrasamosat: Sápmi

Váldoođđasat

Varrasamosat

Muualla Yle.fi:ssä