Sápmi

"Bálggus ii leat duohtavuođas beassán váikkuhit vuovdečuollamiidda"

Muttošjávrri bálggus almmustahtii duorastaga vel ovtta dieđáhusa vuovdečuollamiin Davvi-Anáris. Sin mielas sii eai leat duohtavuođas beassán váikkuhit vuovdečuollamiidda bálgosa guovllus eaige leat beassán oaidnit guhkit áigge vuovdečuollanplánaid.

Osmo Seurujärvi
Muttošjávrri bálgosa boazoisit Osmo Seurujärvi lea almmustahttán dieđáhusa, mas bálggus buktá ovdan iežas oaivila vuovdečuollamiin bálgosa guovllus. Govva: Yle Sápmi

Muttošjávrri bálgosa oainnu mielde sii eai leat duohtavuođas beassán váikkuhit vuovdečuollamiidda bálgosa guovllus.

– Min mielas bálggus ii leat duohtavuođas beassán váikkuhit vuovdečuollamiid plánemii ja ollašuhttinvugiide.

– Meahciráđđehus ii leat miehtán sáddet dieđuid guhkit áigge vuovdečuollanplánain, unnimustá viđa jagi geahčái. Sii sáddejit dieđuid ovtta vuovdečuollanbáikkis ain hávil. Vearrámus dilis mii leat ožžon dieđuid guokte vahku ovdal vuovdečuollamiid álgima, vaikka plánat leat leamašan gárvásat jo jagi, Seurujärvi čuoččuha.

Bálggus lea miehtán unna vuovdečuollamiidda

Gažaldat lea vuovdečuohppamiin Jiekŋavári guovllus Anárjávrri davábealde. Guovlu lea Muttošjávrri bálgosis.

Bálggus lea dán rádjai vuostálastán Meahciráđđehusa plánaid, muhto lea dál miehtan dál unna čuohppamiidda.

Meahciráđđehus lea muitalan, ahte sii doibmet jagis 2010 dahkkojuvvon bálggussoahpamuša vuođul. Dainna soahpamušain sohppojuvvui nu gohččoduvvon vuovderáffi čuovvovaš 20 jahkái.

Bálggus sáddii fas ovtta dieđáhusa vuovdečuollamiid birra

Muttošjávrri bálgosa boazoisit Osmo Seurujärvi lea almmustahttán dieđáhusa, mas bálggus buktá ovdan iežas oaivila vuovdečuollamiin.

Bálggus hálida dieđáhusain maid njulget boastočuoččuhusaid, mat leat leamaš almmolašvuođas.

– Min mielas Meahciráđđehus dulko jagi 2010 soahpamuša váilevaččat iige leat doaibman bálggussoahpamuša vuoiŋŋa mielde, Seurujärvi oaivvilda.

"Vuovdečuollamat hehttejit min boazodoalu"

Muttošjávrri bálgosa oainnu mielde vuovdečuollamat hehttejit sin boazodoalu máŋggaláhkai.

– Vuovdečuollamat leat heajudan bohccuid guohtuneatnamiid, daningo deaddu lea dál dain eatnamiin, main eai leat vuovdečuollamat. Guohtuneatnamat leat danin gollán olles bálgosa guovllus.

– Vuovdečuollamat leat maid sehkken dan vuogi, mo mii guođohit bohccuid Muttošjávrri bálgosis. Buot siiddat gillájit áššis, Seurujärvi muitala.

Bálggus ballá ahte sii gártet biebmagoahtit

Osmo Seurujärvi dadjá, ahte sii ballet, ahte sii gártet dáid váttisvuođaid dihte biebmagoahtit bohccuid meahccái ja áiddiide.

– Árbevirolaš sámi boazodoallu Muttošjávrris nogašii dasa, sámekultuvrra ovdáneapmi boatkanivčče ja biras gillášii, Seurujärvi logahallá.

Varrasamosat: Sápmi

Váldoođđasat

Varrasamosat

Muualla Yle.fi:ssä