Sápmi |

Bálgosiid ovttastusa ođđa ságadoallin Mika Kavakka, várreságadoallin Tiina Sanila-Aikio

Bálgosiid ovttastusa ovddasteaddjit válljejedje Roavvenjárggas ođđa luohttámušolbmuid jagiide 2021–2023.

Kemin-Sompion paliskunnan poroisäntä Mika Kavakka. Savukoski 18.5.2020
Kemin-Sompio bálgosa boazoisit Mika Kavakka válljejuvvui Bálgosiid ovttastusa ságadoallin badjái 2021–2023. Govva: Tapani Leisti / Yle

Bálgosiid ovttastusa ovddasteaddjit leat gaskavahku 12.8. válljen Bálgosiid ovttastusa ođđa ságadoallin Mika Kavakka. Kavakka lea Kemin-Sompio bálgosa boazoisit.

Kavakka dadjá leat giitevaš luohttámušas, go lea dakkár doibmii válljejuvvon.

Son oaivvilda, ahte čuovvovaš golmma jagi áigge leat máŋggat stuorra áššit maidda ovttastusas galget darvánit

– Gal dát boahttevuođabargojoavkku lea okta guovddáš ášši ja dasto dát láhka dain vahágiin, mat leat geavvan boazodollui. Dasto várra obanassiige dat, ahte boazodoalu doalvut ovddos guvlui buoret jagiid guvlui.

Várreságadoallin válljejuvvui Tiina Sanila-Aikio. Sanila-Aikio lea Sámi bálgosiid searvvi ságajođiheaddji ja Suoma Sámedikki ovddeš ságajođiheaddji.

Kavakka muitala, ahte gearggai odne jo veháš ságastit Sanila-Aikioin, ja vuordáge ovttasbarggu.

– Sihkkarit lagaš beivviid áigge ságastalle lasi. Mu mielas lea fiinna ášši, ahte Tiina áššedovdamuš lea dál min ságajođihangotti geavahusas.

Bálgosiid ovttastusa dálá ságadoalli Jukka Knuuti lea jođihan ovttastusa jagi 2005 rájes.

Bálgosiid ovttastusa ovddasteaddjit čoahkkimaste Roavvenjárggas disdaga ja gaskavahku. Čoahkkin earet eará válljii ođđa luohttámušolbmuid jagiide 2021–2023.

Yle Sápmi ii fáhten Tiina Sanila-Aikio kommenteret ášši.

Varrasamosat: Sápmi

Váldoođđasat

Varrasamosat

Muualla Yle.fi:ssä