Sápmi |

Bálgosiid ovttastussii válljejit ođđa stivrra gaskavahku jagiide 2021–2023 – Tiina Sanila-Aikio vuolgá gilvvohallat ságadoalli báikkis

Bálgosiid ovttastusa ovddasteaddjiid čoahkkin dollo Roavvenjárggas 11.-12.8.2020.

Tiina Sanila-Aikio saamelaiskäräjien kokouksessa 17.12.2019.
Sámi bálgosiid searvvi ságajođiheaddji ja Suoma Sámedikki ovddeš ságajođiheaddji Tiina Sanila-Aikio lea okta evttohasain Bálgosiid ovttastusa ságadoallin. Govva: Vesa Toppari / Yle

Maŋŋebárgga ja gaskavahku čoahkkanit Bálgosiid ovttastusa ovddasteaddjit čoahkkimastit Roavvenjárgii. Čoahkkin earet eará vállje ođđa luohttámušolbmuid jagiide 2021–2023.

Bálgosiid ovttastus soaitá oažžut ođđa ságadoalli čuovvovaš jagiide. Dálá ságadoalli Jukka Knuuti lea jođihan ovttastusa jagi 2005 rájes. Son ii leat plánen maide vel joatkaga ektui.

– Mun leamaš jo nu guhká ságadoallin, lean gal prinsihpas gearggus addit saji earáidege. Dathan lea gitta ovddasteaddjiid dáhtus, boazoisidathan dan mearridit, ahte gii sin ovddasta, dadjá Knuuti.

Knuuti muitala, ahte ságadoalli ferte dovdat bures olles boazodoalloguovllu dili.

– Dán barggus gártá olu ovddastit ja feaskárastit. Ferte váldit vuhtii diliid iešguđet bálgosiin ja máhttit heivehit daid oktii. Sávvamis válljejit dakkár olbmo, gii jurddaša olles boazodoalloguovllu buoremusa iige dušše ovtta guovllu.

Paliskunnat, poronhoito, Jukka Knuuti
Ságadoalli Jukka Knuuti lea jođihan Bálgosiid ovttastusa jagi 2005 rájes. Son ii leat plánen maide vel joatkaga ektui. Govva: Vesa Toppari / Yle

Tiina Sanila-Aikio vuolgá gilvvohallat ságadoalli báikkis

Sámi bálgosiid searvvi ságajođiheaddji ja Suoma Sámedikki ovddeš ságajođiheaddji Tiina Sanila-Aikio lea okta evttohasain Bálgosiid ovttastusa ságadoallin. Son muitala, ahte bálgosiid njunnošat leat sávvan sus ođđa ságadoalli.

Son sávvá, ahte ságadoalleevttohasat beasašedje loktet dakkár áššiid ságastallamii, maid ieža oidnet dehálažžan.

– Sávan iežan bealis, ahte dat áššegažaldagat leat dasto dat, maid vuođul de jienastit ja sávan, ahte maiddái doarjja gávdno.

Sanila-Aikioi dakkár áššit leat earret eará dálkkádatrievdan, eanangeavaheapmi ja spireáššit sihke boazodoalu boahttevuođabargu, mii lea maiddái Suoma dálá ráđđehusprográmmas.

– Vuosttažin leat dieđusge dat áigeguovdilis áššit, ovdamearkka dihte mo dat korona váikkuha boazodollui, ja ahte makkár váikkuhusat dán goavvejagis leamašan ja mo mii beassat fas buori vuođu ala.

– Ja vel dakkár, ahte man dilis Bálgosiid ovttastumi organisašuvdna lea, ahte leatgo doppe dárbbut ođasmahttit dahje ovddidit.

Sámebálgosiid searvvi ságajođiheaddji Sanila-Aikio ii vuos dieđe, mo de jus válljejuvvo maiddái Bálgosiid ovttastusa jođiheaddjin. Searvi vállje ođđa ságadoalli ain jahkái hávil.

– Dat leat dehálaš doaibmit guktot. Sámebálgosiid searvvis lea jahkečoahkkin boahtimin fargga báliid, de ferte dan oktavuođas de geahččat, leango mun válljejuvvon BO ságadoallin, ja ahte mo searvvi lahttobálgosat oidnet dan dili jus nu lea.

Maŋŋebárgga Bálgosiid ovttastusa ovddasteaddjiid čoahkkima vuosttas beaivve gieđahallet áššelisttu mielde bohccobiergomárkaniid. Gaskavahkku de mearridit eará áššiin, dego ođđa luohttámušolbmuin, ovttastusa doaibmaplánain, bušeahttaárvalusain ja bálgosiid bálkkáin.

Divvojuvvon 11.8. dii 9.20: Tiina Sanila-Aikio guorahalai olles Bálgosiid ovttastumi organisašuvnna ođasmahttin- ja ovddidandárbbuid, ii dušše stivrra nu mo árabut muitaleimmet.

Varrasamosat: Sápmi

Váldoođđasat

Varrasamosat

Muualla Yle.fi:ssä