Sápmi

Bálvalanámmáhiin leat dál ollugat barggu haga ja dan lea vásihan maid Pirita Portti: "Lihkus in oro okto, lea nubbi geainna juogadetne goluid"

Pirita Portti
Hoteallabargi Pirita Portti dietnasa koronadávda lea sakka geahpedan. Govva: Pirita Portti

Bargguhisvuohta lea jagis lassánan sakka eandalii davimuš guovlluin Suomas.

Pirita Portti muitala dán jearahallamis, man láhkai koronadilli lea váikkuhan su bargoeallimii. Jietna: Jouni Aikio / Yle

Hotealla Anáris, gos vuostáváldinbargi Pirita Portti eanaš bargá, giddii uvssaidis juovlamánu álggus. Dan rájes Portti lea leamaš ruovttus gitta guovvamánu lohppii. Dál su bargoaddi hoteallain okta Suoločielggi guovllus lea rabas, ja doppe son leamaš barggus duollet dálle.

– Ii duođaige leat normála dilli go veardida vaikko mannan jahkái.

Portti lea almmuhan iežas bargoohccin, dat lea bággu, jus áigu oažžut ruđa bargo- ja ealáhusdoaimmahaga bokte.

– Bargoohcciide doppe lea deavdinláhkai dakkár báiki masa galgá merket jus leat juoga rievdadusat boahtimin golmma mánu siste, de dalle dat eai daga maidege dainna ohcciin. Mus lea leamaš dakkár dilli ahte in leat dárbbašan nu ollu ovttastallat BE-doaimmahagain, muitala Pirita Portti.

Nissonolbmuid ja nuoraid ossodat bargguhis bargoohcciin lea lassánan

Bálvalanhoavda Tero Hyttinen Lappi BE-doaimmahagas muitala ahte jagi 2020 álggus jagi 2021 álgui muhtin sámegielddainge bargguhisvuohta lea lassánan olles 70 proseantta. Go dábálaččat barggu haga leat eanet dievddut, de erenoamáš otná dilis lea dat ahte nissonolbmuid ossodat bargguhis bargoohcciin lea almmáiolbmuid ektui lassánan.

– Bargguhisvuohta lea lassánan bálvalan- ja vuovdinbargiin. Turismasuorgi lea gillán oppa jagis eanemus ja dilli ain hedjonii dán jagi álggedettiin. Dilli ii buorránange nu mo ollugat vurde, restoráŋŋat leat fas giddejuvvon ja dat lea hástalus.

rintakuva miehestä puku päällä
Lappi BE-doaimmahaga bálvalanhoavda rávve ohcalit ohppui dahje jearrat sin doaimmahagas rávvagiid áigáboađu hárrái. Govva: Priváhta

Bargo- ja ealáhusguovddáža čuovvunlogut čájehit ahte Davvi-Suomas eandalii čielga turismaealáhusguovlluin nu mo Duottar-Sámis (Eanodat, Gihttel, Muonio) ja Davvi-Sámis (Anár, Ohcejohka, Soađegilli) sihke Roavvenjárggas bargguhisvuohta lea lassánan eanemus.

Koronaáigi leamaš maiddái fitnodatdoalliide lossat.

– BE-doaimmahaga bokte mannan giđa bohte oanehis áiggis sullii 1600 fitnodatdoalli bargguhisvuođadorvvu oažžun. Dát lea vejolaš vaikko doaibma fitnodagas ii áibba nogašiige. Jus bargu lea geahppánan ja dienas manná dihto rájá vuollái de doarjaga fidne, rávve Tero Hyttinen.

Bálvalansuorggi heajos bargodilli čuohcá ollu nuoraide ja maiddái eará ealáhussurggiide, dihtet BE-doaimmahagas.

– Mátkkoštan- ja bálvalansuorggi hedjoneapmi oidno maiddái nuorra bargoohcciid loguin. Dán suorggi bargguhisvuohta lea váikkuhan juoga veardde maiddái huksensuorggi bargodillái davimuš gielddain. Nuppe dáfus Giema Durdnosa guovllus dilli ii leat nu heittot. Doppe Metsä Fibre industriijafidnu álggaheapmi váikkuha bures, dadjá hoavda Tero Hyttinen BE-doaimmahagas.

Okta molssaeaktu lea skuvlet iežas dál go astá

BE-doaimmahagas leat fuomášan ahte olbmot eai leat nu áŋgirat ohcalit lassiskuvlejupmái dahje ođđa oahpuide ja ámmáhii. Hyttinen goittot rávve geavahit dán eahpesihkkaris áiggis BE-doaimmahaga bálvalusaid.

– Máŋggalágan bargofápmoskuvlejupmi lea fállun. Badjel 25-jahkásaččaide lea oaivvilduvvon sierra doarjja iešráđálaš oahppamii. Dákkár bargguhisvuođaovdduid gánneha čielggadit ja geavahit ávkin, dadjá Hyttinen.

Pirita Portti ii loga goittot vel ohcalan lassioahpuide dahje eará ámmátsuorgái. Dat sáhttá susge boahtit ovdii jus dilli ii rievdda. Dál orru leamen oalle eahpesihkkaris áigi, muhto boahtte geassái sus leat dihto vuordámušat.

– In dieđe, dál lea dilli seamma go jahki dassái, orru veháš ahte ii dáhpáhuva ii mihkkige. Mannan geassihan lei hirbmat buorre Anáris, doaivvun ahte dakkár geassi boahtá dálge, muhto in jáhke ahte olgoriikkain bohtet mátkkálaččat, smiehttá Pirita Portti.

Áigáiboahtu ii leat goittot áibbas hedjonan, vaikko koronadilli ráddje máŋggaláhkai.

– Lihkus in oro okto. Dás orru nubbi geainna juogadetne ássangoluid, ja lihkus sus lea dálge dienasbargu. Dan dihte ii leat mihkkige heđiid.

Dietnasa geahppáneapmi goittot váikkuha, go ii sáhte bargat daid áššiid maid háliidivčče, muitala Portti.

– Ammal dat jeđđe go diehtá ahte ii leat okto dákkár dilis. Dát seamma dilli lea hui máŋgasis, vástida Pirita Portti gažaldahkii ahte mo don birget.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat

Muualla Yle.fi:ssä