Sápmi |

Barents Observer: Jamala duottarguvlui leat ihtán stuorra gássavárit, mat sáhttet bávkkehit goas beare

Sibirijás Jamala duottarguovllus leat gávdnan stuorra rokkiid, mat leat šaddan go gássa lea bávkkehan eatnama siste. Ođđa rokkit sáhttet šaddat goas beare.

Jamal tundra
Okta stuorámus gássarokkiin lea badjel 60 mehtera govdosaš ja birrasiid 200 mehtera čikŋosaš. Govva: The Barents Observer

Sibirijás Jamala duottarguovllus leat jagi 2014 rájes gávdnan stuorra ráiggiid eatnamis. Daid jáhkket leat šaddan gássa bávkkeheames. Vuosttas ráiggi gávdnoma maŋŋá leat gávdnan aŋkke logi eará stuorra rokki.

Dutkit eai leat ovttaoaivilis das, manin ná dáhpáhuvvá. Oassi dutkiin jáhkká, ahte dasa lea sivvan dálkkádatrievdan, muhto oassi fas oaivvilda, ahte sivvan lea Sibirijá erenoamáš geologiija, man dihte guovllus lea olu gássa.

Okta stuorámus ráiggiin lea dušše birrasiid njealje kilomehtera geahčen Bovanenkovo guovllu gássa- ja oljogittiid gássabohccis, muitala Barents Observer -neahttaaviisa. Roggi lea sturron olles áigge ja dál dat lea badjel 60 mehtera govdosaš ja birrasiid 200 mehtera čikŋosaš.

Barents Observera mielde lea oalle sihkkar, ahte guvlui šaddet ain ođđa stuorra rokkit. Dutkit leat gávdnan olu unna várážiid, mat leat jáhkkimis eananvuloš gássabulljarasat, mat sáhttet bávkkehit goas beare. Jamala ja Gydana guovlluin leat gávdnan juo 7 000 gássabulljarasa.

Go gássabulljarasat bávkkehit, eatnamii šaddet kráterat dahje ráiggit, ja gássa dego metána leavvá áibmui.

Varrasamosat: Sápmi

Váldoođđasat

Varrasamosat

Muualla Yle.fi:ssä