Sápmi |

Bargguhisvuohta lassánan Ohcejoga gielddas 116 proseantta diimmážis – gielddahoavda oaidná dán namalassii korona váikkuhussan

Ohcejoga gielddahoavda Vuokko Tieva-Niittyvuopio jáhkká, ahte bargguhisvuohta gielddas njiedjá seamma dássái go ovdalge.

Gielddahoavda Vuokko Tieva-Niittyvuopio
Ohcejoga gieldda gielddahoavda Vuokko Tieva-Niittyvuopio. Govva: Yle Sápmi

Koronavirusa caggamii laktáseaddji ráddjehusaid dihte bargguhisvuohta lassánii Lappis johtilit njukčamánu ja cuoŋománu áigge. Lappi EBI-guovdáža mielde Lappis ledje miessemánu loahpas lagabui 15 300 bargguhis olbmo. Dat lea 6 300 eanet go jagi ovdal.

Bargguhisvuođa lassáneapmi lea leamaš earenoamáš fuomášahtti Ohcejoga gielddas, gos ledje miessemánus 116 proseantta eanet bargguhis olbmot go diibmá seamma áigodagas.

Ohcejoga gielddahoavda Vuokko Tieva-Niittyvuopio oaidná, ahte bargguhisvuođalogu stuorra prosentuálalaš stuorrun lea namalassii korona váikkuhus.

– Mis eai ovdamearkka dihte almmolaš sektoris gieldda bealde dáhpáhuvvan luopmudahttimat, muhto dáppe bálvalanealáhusat nappo restoráŋŋa-, hotealla- ja turismabálvalusat sihke gávppi bálvalusat leat nu mearkkašahtti sajádagas. Ovdamearkka dihte rádjegávppis, turismabálvalusain ja restoráŋŋain ledje olu luopmudahtton olbmot.

Son goittotge jáhkká ahte dilli bargguhisvuođa ektui lea gaskaboddosaš.

– Jáhkán, ahte go eallimis máhcát dán nu gohčoduvvon ođđa normálii, de máhccat maiddái seamma proseantaloguide go árabutge.

Niittyvuopio muittuha, ahte Ohcejoga gieldda bargguhisvuođalogut leat dábálaččat leamašan Lappi eanagotti unnimusat, čieža proseantta sulaid. Ovdamearkka dihte mannan jagi miessemánus Ohcejoga gielddas bargguhis olbmuid oassi bargoveagas lei 7,1 proseantta, go dán jagi miessemánus lohku lei 15,6 proseantta.

Anára gielddas bargguhis olbmuid oassi bargoveagas lei dán miessemánus 25,6 proseantta, go diibmá dat lei 14,7 proseantta. Nuba bargguhis olbmuid mearri lea sturron 76 proseantta.

Eanodaga gielddas fas bargguhis olbmuid oassi bargoveagas lei dán jagi miessemánus 25,5 proseantta ja diibmá 16,2 proseantta. Eanodagas bargguhis olbmuid mearri lea sturron 51 proseanttain.

Dárkilut loguid Lappi bargguhis olbmuid mearis miessemánus gávnnat dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä