Sápmi |

Bargo- ja ealáhusministeriija mieđihan Lappi EJB- ja BE-guovddážiidda 2,3 miljovnna euro lassimearreruđa – maiddái Ohcejoga hohpolaš ráhkadusnuppástus mielde

Dál juolluduvvon ruđain EJB-guovddáža barggus sáhttet ovddidit vaikko Ohcejoga ealáhusdoaimma, muhto makkárge beare stuorra ruhtagáldut gal eai leat rahpaseamen.

Suomen ja Norjan välinen silta ylittää Tenojoella, Utsjoen kirkonkylällä.
Dát johka lea viehkaláhkái ealihan Ohcejoga gieldda, muhto guolástangildosa dihtii gielda ferte hutkat ođđa dienasvugiid. Govva: Vesa Toppari / Yle

Bargo- ja ealáhusministeriija lea mieđihan Lappi EJB- ja BE-guovddážiidda 2,3 miljovnna euro sturrosaš lassimearreruđa bargofápmo- ja fitnodatbálvalusaide.

Ministeriija ruhtajuolludeamis lea váldojuvvon vuhtii maiddái Ohcejoga gieldda hohpolaš ráhkadusnuppástus ja mátkeealáhusa hástaleaddji dilli. Ruđain oassi lea oaivvilduvvon maiddái Giepma-Durdnosa guvlui, gos Stora Enso almmuhii gieskat Veitsiluoto báberfabrihkka giddemis.

Ohcejohka lea gártan duođas smiehttat maŋimuš jagi áigge ealáhussurggiidis boahtteáiggi, go korona geažil rádjegávppit masse áššehasaid, turismasuorgi bisánii ja mannan mánus stáhta mearridii vel gieldit luossabivddu Deanus.

"Stuorra ruđat eai leat vuordimis"

Ohcejoga gielddas leage dál barggu vuolde sierra ráhkadusnuppástusplána, mii galgá váldit beali dasa, mo dás ovddosguvlui.

Strategiijahoavda Heino Vasara Lappi EJB-guovddážis lea leamaš mielde buot Lappi hohpolaš ráhkadusnuppástusguovllu proseassain dán jagi. Son muitala, ahte gielddain lea guovddáš rolla jođihit hohpolaš ráhkadusnuppástusguovllu proseassa. Ulbmilin proseassas lea čohkket báikkálaš ja guovlolaš doaibmiid oktii ja ovddidit ovttas guovllu ođđa dilis.

– Buohkat vulget dan ovtta temá hukset ja suokkardallat, oahpolágádusat, gielddat, guovloovddideaddjit. Das ovttasbarggu bokte bastet oažžut eanet áigái, Vasara dadjá.

Ovttasbarggus leat mielde earret eará gielda, EJB-guovddáš, Lappi lihttu, ProAgria, Sámi oahpahusguovddáš ja Sámediggi.

Ohcejogas leat juohkán barggu golmma jovkui, masa gullet infra ja luottat, bargo- ja fitnodatdoalloáššit ja goalmmádin sámevuohta ja vásttolašvuohta das.

Strategiijahoavda Heino Vasara Lappi EJB-guovddážis lea leamaš mielde buot Lappi hohpolaš ráhkadusnuppástusguovllu proseassain dán jagi. Jietna: Martta Alajärvi / Yle

Vasara muitala, ahte hohpolaš ráhkadusnuppástusguovllu stáhtus lea dat, mainna sáhttá oažžut ovddidandoaibmabijuide ruhtadeami dihto kanálain. Makkárge beare stuorra ruhtagáldut gal eai leat rahpaseame, baicca sáhttá ávkkástallat daid ruhtagálduiguin, mat jo leat leahkime, Vasara muittuha.

EJB-guovddážii dál juolluduvvon ruđain EJB-guovddáš sáhttá ovddidit iežas barggus vaikko Ohcejoga ealáhusdoaimma buorebut. Ruhta lea oaivvilduvvon ovdamearkka dihtii skuvlejumiide ja áššedovdibálvalusaide.

– Dan bokte oažžut vaikko Ohcejoga ealáhusdoibmii lasseresurssaid, muhto daidge doaibmabijuid ferte ovttas plánet, Vasara lohká.

Vasara muitala, ahte áitosaš buhtaduspakeahttat fitnodagaide ovdamearkka dihtii manahuvvon luossaturisttain eai leat goit vuos leamaš ságastallamiin, muhto proseassa lea ain álggus. Bargo- ja ealáhusministeriija koordinere proseassa dál, muhto jos buhtadusain livčče sáhka, daid juolludivčče ruhtadoalloministeriija.

Hohpolaš ráhkadusnuppástusplánas lea dehálaš dahkat nu johtilis doaimmaid dalán, go maiddái guhkit áigásaš plánaid guovllu ektui.

– Dás mii jurddašit nu, ahte ovddidit dan guovllu, muhto dat olbmot geat gillájit doppe, oaččošedje das maiddái ávkki, Vasara dadjá.

Beaiváduvvon 6.5.2021 dii. 14:00 Dárkkálmahttojuvvon, ahte EJB-guovddáš sáhttá iežas barggus ovddidit buorebut ovdamearkka dihtii Ohcejoga eláhusdoaimma dál mieđihuvvon mearreruđain.

Varrasamosat: Sápmi

Váldoođđasat

Varrasamosat

Muualla Yle.fi:ssä