Sápmi |

Bargojoavkkus guokte mánu áigi čielggadit Jiekŋameara ruovdemáđija váikkuhusaid sápmelaččaide, boazodollui ja lundui – "Dat ii leat vejolaš"

Bargojoavkku čielggadeapmi ruovdemáđija váikkuhusain galggašii leat gárvvis juovlamánu 14. beaivvi.

Sámediggi 30.10.2014
Sámedikki vuosttas várreságadoalli Heikki Paltto ovddasta Sámedikki Jiekŋameara ruovdegeainnu vuollebargojoavkkus. Govva: Vesa Toppari / Yle

Sámediggi ii ane realisttalažžan geargat Jiekŋameara ruovdemáđija čielggadanbargguin addon áigemearis.

Johtolat- ja diehtojuohkinministeriija lea vuođđudan bargojoavkkuid čielggadit, makkár konkrehta váikkuhusat Roavvenjárggas Girkonjárgii plánejuvvon ruovdemáđijas livčče Davvi-Suomas. Váldobargojoavkku lassin leat vuođđuduvvon golbma vuollebargojoavkku, main okta čielggada váikkuhusaid namalassii sápmelaččaide, boazodollui ja lundui. Bargojoavkku jođiha Lappi EBI-guovddáža biras- ja luondduriggodatáššiid hoavda Timo Jokelainen.

– Min vuollebargojovkui lea addon bargu, mas leat rievtti mielde guokte čielga gažaldaga: mo váikkuhusaid lundui ja álgoálbmogii sáhttá árvvoštallat ja maid áššiid galgá čielggadit lasi, Jokelainen čilge.

Timo Jokelainen on nimitetty Lapin elinkeino-, liikenne- ja ympäristökeskuksen ympäristö ja luonnonvarat -vastuualueen johtajaksi
Lappi EBI-guovddáža biras- ja luondduriggodatáššiid hoavda Timo Jokelainen. Govva: Lapin ELY-keskus
Vuollebargojoavku čoahkkanii vuosttas háve dán vahku maŋŋebárgga 9. golggotmánu Anáris. Bargojoavkkuid čielggadeamit galget leat gárvát guovtte mánu geahčen, juovlamánu 14. beaivve.

Bargojoavkku áirras, Sámedikki vuosttas várreságajođiheaddji Heikki Paltto dadjá, ahte Sámedikkis eai leat resurssat oažžut čielggadanraportta gárvvisin ná čavga áigetávvalis.

– Dat gal lea nu uhca áigi, ahte dat ii boađe gárvvisin dien áigemearis, mii galggašii leat. Aŋkke ná jos smiehttá birasváikkuhusaid árvvoštallama geažil, dat ii válmmaštuva, dadjá Paltto.

Bargojoavkku ságadoalli Timo Jokelainen dadjá, ahte EBI-guovddážis gal leat resurssat, ainjuo dán muttus, danin go bargu dahkko virgeolbmo bargun. Son goit lohká iežas áddet, ahte dákkár fidnu gáibida olu návccaid Sámedikkis.

– Go dákkár fidnut šaddet, daidda galggašii bastit oassálastit ja gos nu dan resurssa galggašii váldit. Jos dat ii gávdno Sámedikkis, de kánske dan galggašii dasto monu eará láhkai bastit ordnet. Áiggihan dákkár áššit gáibidit, das eat beasa gosage.

Jokelainen muitala, ahte Suomas ja Norggas leat juo dahkan čilgehusa doaimmain, maid birasláhka geatnegahttá Jiekŋameara ruovdegeaidnofidnus. Dasa lassin leat čielggadan, makkár Ovttastuvvan Našuvnnaid álgoálbmogiidda guoski lágat laktásit daid doaimmaide.

– Nuppe dáfus mii leat goittotge dál dahkan govvádusa doaimmain, mat leat geatnegahtton láhkaásaheamis ja dan vuođul joatkit ovddosguvlui. Mun aŋkke dán vuollebargojoavkku ságadoallin jurddašan, ahte mii ovdánit nu guhkás go dán áiggi siste lea vejolaš.

Fidnu gáibida olu čielggademiid ja váikkuhusárvvoštallamiid

Timo Jokelainen čilge, ahte Jiekŋameara ruovdegeainnu váikkuhusaid ii sáhte dárkilit árvvoštallat ovdal go fidnu lea plánejuvvon doarvái guhkás.

– Danin mii dán vuollebargojoavkkus gieđahallat lágaid gáibádusaid bokte, makkár doaimmaid dát vejolaš ruovdegeaidnofidnu gáibida, maid galgá čielggadit ja mo váikkuhusaid galgá árvvoštallat.

Barggus galgá váldit vuhtii Jokelainen mielde earret eará lága eanangeavaheamis ja huksemis ja birasváikkuhusaid árvvoštallamis. Dasa lassin son jáhkká, ahte fidnus galgá dahkat luonddusuodjalanlágas gáibiduvvon Natura-árvvoštallama, ja maid eará čielggademiid ja váikkuhusárvvoštallamiid.

Varrasamosat: Sápmi

Váldoođđasat

Varrasamosat