Sápmi |

Bargojoavku evttoha Lappi bolesii lasi resurssaid – boleshoavda ii goittot vel lohpit Eanodahkii iežas bolesa

Boahtteáiggis boles joavddašii heahtedilis báikki ala gosa beare Lappii vuollel diimmus goit 80 proseanttas dáhpáhusain.

Lapin poliisilaitoksen poliisipäällikkö Esa Heikkinen
Boleshoavda Esa Heikkinen Lappi bolesis jáhkká, ahte lasseresurssain ođđa joavdanáigái beasašii stuorámus oasis Lappi Govva: Sauli Antikainen / Yle

Bolesa doaibmanválmmašvuođa čielggadan bargojoavku evttoha Lappii lasi resurssaid. Bargojoavkku evttohusa mielde Lappi boleslágádussii juolludivččejit eambbo bargiid, vai bolesa fidnen hohpolaš dáhpáhusain buorránivčče.

Boahtteáiggis boles joavddašii heahtedilis báikki ala gosa beare Lappii vuollel diimmus goit 80 proseanttas dáhpáhusain.

Bolesa doaibmanválmmašvuođa čielggadan bargojoavku geigii smiehttámušas sisáššiidministtar Maria Ohisaloi otne duorastaga.

Boleshoavda Esa Heikkinen Lappi bolesis jáhkká, ahte lasseresurssain ođđa joavdanáigái beasašii stuorámus oasis Lappi. Heikkinen mielde Ohcejohka ja Gilbbesjávri leat goittot váddásamosat čoavdit, dasgo daidda lagamus bolesstášuvnnain lea guhkes mátki.

– Ohcejogas lea Anára bolesstášuvnnas Avvilii mátki 165 kilomehtera ja Gilbbesjávrris fas lea Muoná bolesstašuvdnii mátki 196 kilomehtera. Áddešin bargojoavkku evttohusa nu, ahte dáidda guovlluide boađášedje lasi bolespatrullat, dadjá Heikkinen.

Smiehttámušas evttohit bolesii joavdanáiggiid iešguđet guovlluide Suomas. Gávpogiin dat livčče 11 minuhta ja boaittobeal guovlluin 55 minuhta. Boargojoavkku mielde stuorámus oassi boaittobeal guovlluin leat Davvi- ja Nuorta-Suomas.

Eanodahkii iežas bolespátrulla?

Boleshoavda Esa Heikkinen ii vuos dieđe dadjat, dárkkuhago lasseresurssaid oažžun dan, ahte Eanodahkii boađášii fas iežas boles.

– Dan eat leat nu jurddašan, muhto jáhkášin baicce ahte olles Duottar-lappi guovllu bolesbarggu nannema. Dán muttus eat leat smiehttan dárkilabbot mo dat resurssat juohkásit.

Eanodagas ii leamaš iežas boles moatti jahkái. Gielda lea rahčan dan ovdii, ahte ožžot iežaset bolesa.

Maiddái Ohcejogas ii leamaš iežas boles 2016 čávčča rájes, go nubbi fásta bolesiin bázii ealáhahkii ja nubbi sirdojuvvui Avvilii.

Ohisalo: Evttohus ovdána bušeahttaráđđádallamiidda

Sisáššiidministtar Maria Ohisalo celkkii dieđihandilálašvuođas, ahte čuovvovaččat sisáššiidministeriija álgá árvvoštallat bargojoavkku evttohusa.

– Dát ášši lea ovdan maid bušeahttaráđđádallamiin, lohpida Ohisalo.

Ráđđehusprográmmas leat čatnasan lasihit bolesiid meari. Ohisalo goittotge muittuha, ahte bargo ii válbman ovtta ráđđehusbaji áigge.

Bolesráđđehus almmustahtii juovlamánus čielggadeami bolesa joavdamis heahtedilis báikki ala. Dan mielde vearrámus dilli joavdanáiggis lea Eanodat, gos boles geargá heahtedilis veahkkin sullii 107 minuhta das go lea ožžon almmuhusa.

Varrasamosat: Sápmi

Váldoođđasat

Varrasamosat

Muualla Yle.fi:ssä