Sápmi |

Bargojoavku oaidná Deanu luosa boahtteáiggi čuovgadin: Valjis guolli ja báikkálaš jietna beassá buorebut gullosii

Reidar Varsi jáhkká sin lihkostuvvat hábmet Deanu lussii buorre plána, dasgo buot bargojoavkku lahtuin leat sullii seammalágan oainnut ja ulbmilat.

Reidar Varsi.
Deanu čázádaga guolástanhálddahusa ovdaolmmoš ja bargojoavkku lahttu Reidar Varsi. Govva: Kirsti Länsman / Yle

Báikkálaš olbmot orrot beassamin dál buorebut váikkuhit Deanu luossabivddus mearrideapmái.

Deanu luossanáli hálddašeami smiehttá bargojoavku, masa gullet Norgga birasministeriija ja Suoma eana- ja vuovdedoalloministeriija ovddasteaddjiid lassin Deanu báikkálaš bivdiid ja osolašgottiid ovddasteaddjit sihke Suoma ja Norgga bealde.

Eiseválddit guldalit maid báikkálaš olbmuid dán áigái, oaivvilda bargojoavkku lahttu ja Deanu čázádaga guolástanhálddahusa ovdaolmmoš Reidar Varsi.

– Dál mii leat beassan seamma beavdái eiseválddiiguin. Mis leat hui stuorra váikkuhanvejolašvuođat ja beassat maiddái mearridit áššiin, go miihan buktit evttohusaid. Jus mis báikkálaččain lea ovttaoaivilvuohta goappat beale Deanu man nu dihto áššis, de eiseválddit gal guldalit eambbo, Varsi muitala.

"Sápmelaččaid árbedieđu galggašii váldit buorebut vuhtii"

Deanu luossanáli bargojoavku lea čoahkkimiinnis suokkardallan earret eará, mo árbedieđu sáhtášii váldit vuhtii Deanu hálddašeamis.

Bargojoavku lei čoahkis Anáris dán vahkkus ja beasai gullat dutki Solveig Joks ovdanbuktima guovtti earálágan diehtovuođu birra. Nubbi diehtovuođđu lea dat, mii vuođđuduvvá biologalaš dihtui, man biologat buvttadit ja nubbi lea árbedieđu ja -máhtu diehtovuođđu.

– Lea stuorra hástalus oažžut dan guokte diehtovuođu gulahallat gaskaneaset. Mii viggat dálvvi áigge gávdnat čovdosiid dasa, mo mii bastit váldit árbedieđu buorebut vuhtii Deanu hálddašeamis, dadjá bargojoavkku lahttu Anne Nuorgam Veahčat guolástangottis.

Anne Nuorgam
Anne Nuorgam Veahčat guolástangottis. Govva: Mikkal Morottaja / Yle

"Deanus lea buorre luossadilli"

Guolástanhálddahusat goappat bealde Deanu oaivvildit várrugasat, ahte Deanu luossanálli orru leamen dál buorre dilis.

Dat illudahttá Anne Nuorgam Veahčat guolástangottis.

– Mannan geasi leat vuosttas háve leamašan kámerat Deanus ja mii leat oaidnán mo luossa goargŋu duođalaččat. Dat goargŋunlogut leat áibbas earáláganat go goddinlogut, ja daid vuođul jo oaidnit, ahte luossanáli dilli lea buorre, dadjá Anne Nuorgam.

Virggálaš dutkanbohtosat Deanu luossanális eai leat goit vel boahtán, nuba ii leat vel dieđus ložžetgo bivdoráddjehusat.

– Einnostus lea, ahte boahttevaš jagiid áigge ii dárbbaš goit ráddjet luossabivddu, Nuorgam muitala.

Fanas
Govva: Ville-Riiko Fofonoff / Yle

Ministeriijat dadjet maŋemus sáni

Deanu čázádaga guolástanhálddahusa ovdaolmmoš Reidar Varsi mielas bargojoavkkus leamašan miellagiddevaš digaštallamat eaige juohke áššis sáhte leat álot ovttaoaivilisge.

Varsi jáhkká sin lihkostuvvat bargguin, dasgo buot bargojoavkku lahtuin leat sullii seammalágan oainnut ja ulbmilat.

– Mii eat leat vuos geargan bargguin, muhto bures leat beassán johtui. Loahpaloahpas dat leat dat guokte ministeriija Suomas ja Norggas, mat mearridit áššis. Lean ádden, ahte dát ášši galgá vel gulaskuddamii daidda, geaidda dat guoská. Dalle lea vel vejolašvuohta buktit cealkámušaid dahje cuiggodit, muitala Reidar Varsi.

Deanu ođđa bivdosoahpamuš leamaš dál fámus guokte jagi.

Varrasamosat: Sápmi

Váldoođđasat

Varrasamosat

Muualla Yle.fi:ssä