Sápmi |

BBC: Yle Sámi doaimmaheaddji Sara Wesslin lea okta máilmmi 100 váikkuheaddji ja inspirerejeaddji nissonis

Sara Wesslin muitala, ahte son ii livčče goassige máhttán vuordit dákkár fuopmášumi.

Sara Wesslin
Sara Wesslin lea bargan Yle Sámi doaimmaheaddjin jagi 2013 rájes. Govva: Päivi Mäkelä

Británnia almmolaš bálvalusa ođasdoaimmahat BBC lea válljen Yle Sámi doaimmaheaddji Sara Wesslin máilmmi 100 inspirerejeaddji ja váikkuheaddji nissona jovkui jagi 2019.

BBC lea válljen 100 Women 2019 -listui nissoniid miehtá máilmmi. Joavkkus leat nissonat máŋggalágan duogážiin, ovdamearkka dihte journalisttat, oahpaheaddjit, dutkit, aktivisttat, politihkkárat, dáiddárat ja valáštallit. BBC olles listtu sáhttá geahččat dáppe.

BBC muitala Wesslin birra ná (friija jorgalus):

Sara Wesslin lea nuortalaš journalista. Sápmelaččat leat EU áidna álgoálbmot.

Dilis, mas Suoma golmma sámegielas guokte leat áitatvuložat, Sara lihkostuvai lobbet Suoma oahpahusministaras ruhtadeami sámegiela oahpahussii. Son lea nubbi máilmmi guovtti nuortalašgielat journalisttas.

"Dovddan, ahte nuortalaččat mannet ovddosguvlui. Mii leat hui rámis iežamet kultuvrras, mii leat rámis juohke áidna nuortalašgiela hállis. Jáhkán, ahte nuortalaškultuvra boahtá leat fámolaš, vaikko mii leatge vehádat."

Sara Wesslin
Govva: BBC

BBC čujuha dasa, go Sara Wesslin čielggadii čakčat 2018 Sámi Giellagáldu Suoma beale doaimma nohkama. Čielggadanbarggu boađusin Suoma riikkabeivviid stáhtaruhtaváljagoddi mieđihii Giellagáldui 190 000 euro lasseruđa, ja doaibma sáhtii joatkašuvvat.

Wesslin čálii áššis ođđasiid sihke nuortalaš- ja suomagillii, ja maiddái suomagielat bloggačállosa čielggadanbarggu iešguđet muttuin. The Barents Observer -ođasdoaimmahat muitalii áššis eaŋgas- ja ruoššagillii.

Illá gávdná sániid govvidit dovdduidis

Anárlaš Sara Wesslin lea bargan Yle Sámis jagi 2013 rájes. Son bargá tv-, rádio- ja neahttadoaimmaheaddjin ja láidesta Yle Ođđasat tv-sáddaga. Wesslin bargá sihke nuortalaš-, davvisáme- ja suomagillii.

Sara Wesslin.
Sara Wesslin lea šaddan oahpisin maiddái tv:s Yle Ođđasiid láidesteaddjin. Govva: Vesa Toppari / Yle

Wesslin lea čalmmustahttán nuortalaškultuvrra maiddái riikkadásis, ovdamearkka dihte čállán nuortalaččain, geat leat suomaidahttinpolitihka dihte manahan gielaset ja buktán ovdan nuortalaš nissoniid árbevirolaš biktasiid.

Sara Wesslin ii diehtán válljejumis ovddalgihtiii. Son illá gávdná sániid govvidit dovdduidis gaskavahkkoiđit, go diehtu almmustuvvá.

– Eai mus gávdno sánit. In livčče vuordán, ahte dákkár dáhpáhuvašii vehádatgiela barggus.

– Dát lea mu čihččet jahki nuortalašgielat doaimmaheaddjin. Dat lea ovttaláhkai hui oktonas bargu, go eai leat jur nuortalašgielat kollegat. Mun goit ráhkistan iežan barggu, ja dan dihte dát fuopmášupmi lea munnje hui dehálaš.

Yle Sámi hoavda Maiju Saijets illuda das, ahte sámi journalisttaid bargu oidno máilmmeviidosaččat.

– Mii leat hui rámis Saras ja su barggus. Son lea bargguinis buktán máŋggabealagit ovdan nuortalaččaid eallima ja bargan áŋgirit nuortalašgiela ovdii.

Vuosttas sápmelaš BBC listtus

BBC lea listen máilmmi váikkuheaddji nissoniid jagi 2013 rájes.

Listtus eai leat árat leamaš sápmelaš nissonat, ja dušše moadde nissona suopmelaš duogážiiguin. Ovdamearkka dihte jagi 2013 BBC válljii listui ruoššalaš-suopmelaš-indiálaš Irina Chakraborty ja 2016 suopmelaš-syrialaš Sherin Khankan.

Varrasamosat: Sápmi

Váldoođđasat

Varrasamosat

Muualla Yle.fi:ssä