Sápmi |

Beaivváš álggaha Áillohačča gudneturnea otne Helssegis

Beaivváš-teáhter čájeha Sámi teáhterklassihkara, Áillohačča čállin Ridn´oaivi ja Nieguid oaidni -čájálmasa dán čavčča miehtá Suoma, Norgga ja Jáhpanas. Turnea vuosttas čájálmas čájehuvvo otne eahkes Helssegis.

Beaivváš Sámi Našunálateáhter álggaha otne duorastaga ođđasit turnea čájálmasain, man gohčodit Sámi klassihkarin. Nils-Aslak Valkeapää, Áillohačča čállin bihttá "Ridn´oaivi ja Nieguid oaidni" čájehuvvui lávddi alde jagiid 2007-2009. Dán jagi, go Áillohaš-rohki riegádeamis lea gollan 70 jagi, hálida sámeteáhter gudnejahttit dan ja čájeha čájálmasa miehtá máilmmi.

- Dagaimet dán čájálmasa jagis 2007, muhto dat lea šaddan Beaivváš-teáhtera klassihkar. Dán jagi lea Áillohačča ávvujahki ja danin mii hálidat čájehit dán oktii vel, lohká teáhterhoavda Haukur J. Gunnarsson.

"Erenoamáš, čáppa ja poehtalaš čájálmas"

Vaikko  Ridn´oaivi ja Nieguid oaidni -čájálmas čuovvu jáhpanlaš klassihkalaš no-teáhtervuogi, de gullá muitalus goittot Sámi máilnmái. Dát lea poehtalaš čájálmas, mas geahččit besset vásihit Áillohačča čállosa, diktema, musihka ja jurddamáilmmi. Giehtačállosa ja musihka lea dahkan ieš Áillohaš ja bagadalli lea teáhterhoavda Haukur J. Gunnarsson.

- Hálidan dáinna čájálmasain addit gova das, man stuorra ja dehalaš sámedáiddár Áillohaš lei, muitala Gunnarsson.

Turnea álgá Helssegis ja nohká Jáhpanii

Beaivváš-teáhtera "Ridnoaivi ja Nieguid Oaidni" čájehuvvo duorastaga ja bearjadaga Klockriketeatern:s Helssegis diibmu 19.00. Helssegis Beaivváš joatká Gaska-Suoma bokte Davvi-Supmii, das Norgii ja doallá vel vihtta čájáhusa Jáhpanis skábmamánu álggus.

- Čájehit dan miehtá Suoma ja Norgga ja vel Jáhpanis, gos čálus riegádii jagis 1995. Jáhpanis Beaivváš ii leatge čájáhallan ovdal, muitala Haukur J. Gunnarsson.

Sámesearvvit fállet bileahtaid lahtuidasaset

Buot gávpotsámesearvvit ávžžuhit lahtuideaset mannat geahččat Beaivváš-teáhtera čájáhusaid. Searvvit fállet jogo nuvttá dahje sponsorerejuvvon bileahtaid.

Turnea áigedávval gávdno Beaivváža neahttasiidduin .

Varrasamosat: Sápmi

Váldoođđasat

Varrasamosat

Muualla Yle.fi:ssä