Sápmi |

Bealli sámegielddain sirdasa gáiddusoahpahussii ja bealli joatká lagašoahpahusas dálveluomu maŋŋá

Skuvllain lea boahtte vahkus dálveluopmu. 

Oahppi bargamin diftoŋŋa njuolganhárjehusa. Arkiivagovva.
Lappi guovlolaš koronakoordinerenjoavku mearridii maŋŋebárgga, ahte vuođđoskuvllaid badjeluohkáid ii dárbbaš sirdit gáiddusoahpahussii Lappi buohccedikšunbiire gielddain. Govva: Vesa Toppari / Yle

Sámeguovllu gielddain bealli sirdašuvvá gáiddusoahpahussii ja bealli fas bissu lagašoahpahusas dálveluomu maŋŋá. Skuvllain lea boahtte vahkus dálveluopmu.

Lappi guovlolaš koronakoordinerenjoavku mearridii maŋŋebárgga, ahte vuođđoskuvllaid badjeluohkáid ii dárbbaš sirdit gáiddusoahpahussii Lappi buohccedikšunbiire gielddain. Joavkku mielde badjeskuvlalaččaid ii leat sivva bidjat gáiddusoahpahussii dasgo epidemiija leavvanriska lea nu unni.

Koordinerenjoavku lea ávžžuhan Lappi guovllu gielddaid ieš mearridit das, ahte sirdetgo nuppi dási oahppolágádusaid gáiddusoahpahussii dasgo epidemiija leavvanriska molsašuddá gielddaid miel.

Soađegilis ja Anáris badjedásit bissot lagašoahpahusas, muhto nuppi dási oahppolágádusat sirdasit gáiddusoahpahussii.

Eanodat ja Ohcejohka goit leat mearridan bissut lagašoahpahusas buot skuvllain.

Suoma ráđđehus dieđihii duorastaga 25.2., ahte Suomas giddejit daid guovlluid, gos epidemiija lea leavvanmuttus. Gidden álgá njukčamánu 8. beaivve ja dat bistá njukčamánu 28. beaivvi rádjai. Lappi gullá daidda guovlluide.

Guldal dás lasi radioođđasiid. Jietna: Yle Ođđasat Sámis

Beaividuvvon 3.3.2021 diibmu 11.29: Divvojuvvon diehtu Ohcejoga gieldda oasil

Varrasamosat: Sápmi

Váldoođđasat

Varrasamosat

Muualla Yle.fi:ssä