Sápmi |

Bealuštanfámut sávvá boazodoalliid almmuhit ealuid birra – viiddes soahtehárjehusain johtet ja girdet miehtá davimus Suoma

Bealuštanfámut hárjehallá čuovvovaš mánotbaji áigge earret eará Eanodaga ja Anára guovlluin.

NH90-kuljetushelikopteri Utti
Helikoptergirdit hárjehallet girdit duoddaris. Govva: Puolustusvoimat

Davimus Suomas lágiduvvo čuovvovaš mánotbaji áigge viiddis soahtehárjehallan. Suoma Bealuštanfámuid Utti jeagárregimeanta ordne riikkaidgaskasaš Northern Griffin 20 -dálvehárjehusaid, masa oassálastet birrasiid 700 olbmo.

Soahtehárjehusas galget hárjehallat dálvesiivvus ja johtit nu čuoigga, vácci, muohtafievrruin, mohtorgielkkáin ja maiddái helikopteriin. Joavkkut hárjehallet maiddái bissuid ja bávkkanasaid geavaheami ja orrot ja idjadit meahcis.

Hárjehusaid jođiheaddji veahkki, majuvra Hansi Miettinen muitala, ahte Bealuštanfámuide lea earenomáš dehálaš beassat hárjehallat buollašis ja muohttagis.

– Min ulbmil lea bealuštit olles Suoma, ja danne lea dehálaš beassat hárjehallat maiddái davvin. Dán jagi muohtadilli lea máddin nu heitot, ahte áidna vuohki hárjehallat muohttagis lea boahtit davás, dadjá Miettinen.

moottorikelkka utti
Dálvehárjehusaid oktavuođas vudjet maiddái mohtorgielkkáiguin. Govva: Puolustusvoimat

Eanodagas girdet – Anáris čuiget

Utti jeagárregimeanta lea lágidan dálvehárjehusaid davvin jo máŋgalogi jagi. Dálá hámis hárjehusat leat ordnejuvvon 2000-logu rájes. Miettinen muitala, ahte hárjehallanbáikkit ja guovllut leat jo bures sajáiduvvan.

– Eanas mii johtit ja hárjehallat Eanodaga, Avvila, Anára, Gihttela, Muoná, Soađegili ja Rovajärvi guovlluin.

Eanodaga guovllus ja Giehtaruohttasis bealuštanfámut hárjehallá girdit helikopteriiguin duottarmáilmmis. Anára guovllus joavkkut fas johtet eanas mehciin čuoigga ja muohtafievrruiguin.

Sávvet boazodoalliid almmuhit ealuid birra

Bealuštanfámut lea dieđihan hárjehusain Bálgosiid Ovttastusa bokte bálgosiidda ja boazoisidiidda mánotbadji dassái. Hárjehusaid jođiheaddji veahkki Hansi Miettinen deattuha, ahte sii eai hálit moge hehttet boazoealáhusa ja sávvetge boazodoalliid ja bálgosiid almmuhit, jus soahtehárjehusat leat hehttehussan ealáhussii.

– Mii sávvat, ahte bálgosat almmuhit ealuid birra ja guovlluin, gokko ii heive hárjehallat. Boazodoallit sáhttet riŋget olles hárjehallanáigodaga áigge njuolga Utti jeagárregimentii. Mii gal váldit daid vuhtii ja sirdit hárjehusaid eará guovlluide, dadjá Miettinen.

Miettinen muitala, ahte Bealuštanfámut ja boazoealáhus leat soabadan dán rádjái bures, eaige váttisvuođat leamašan.

– Dávjá lea nu, ahte go boazodoallit oidnet min girdiid, de sii riŋgestit dakkaviđe ja almmuhit, ahte guđe guvlui ii gánnet mannat girdit.

hiihtopartio
Hárjehusaid jođiheaddji veahkki Hansi Miettinen dadjá, ahte Bealuštanfámuide lea earenomáš dehálaš beassat hárjehallat buollašis ja muohttagis. Govva: Puolustusvoimat

“Ealuid lahka ii galgga mannat”

Muotkeduoddara bálgosa boazoisit Tarmo Ljetoff muitala, ahte Bealuštanfámut leamašan oktavuođas bálgosii soahtehárjehusaid geažil. Muotkeduoddara bálgosa guovlluin soahtehárjehusat galget lágiduvvot ovtta beaivve áigge.

Ljetoff mielas hárjehusain leat dieđihan bures, ja bálggus lea beassán váikkuhit maiddái dasa, ahte gos hárjehusat lágiduvvojit.

– Bealuštanfámut lea bures váldán vuhtii min sávaldagaid. Mii leat almmuhan, ahte ealuid lahka ii galgga mannat iige fal vuojašit luottaid boasto guvlui, dadjá Ljetoff.

Soahtehárjehusat leat jo álgán dán vahkus muhtin sajiin, muhto albma láhkai joavkkut oidnogohtet Sámis njukčamánu álggu rájes. Hárjehusat bistet njukčamánu 22. beaivvi rádjái.

Northern Griffin -dálvehárjehusaide oassálastet suopmelaččaid lassin soalddáhat ja oassebealit maiddái Ruoŧas, Norggas, Polskkas, Lietuvas, Hollánddas ja Stuorra-Británnias. Hárjehusaid čuvvot maiddái Fránskka ja USA ovddasteaddjit.

Varrasamosat: Sápmi

Váldoođđasat

Varrasamosat

Muualla Yle.fi:ssä