Sápmi

Beana maid sáhttá herskkostallat bohcco goikaduvvon cuozza- ja suotnabihtáguin

Anni Ahlakorpi
Anni Ahlakorpi seailluha beatnatherskkuid galmmihanlođás. Son goikada iežas beatnagiidda suonaid, bierggu ja cuozzabihtáid. Govva: Kirsti Länsman / Yle

Goikaduvvon bohccoosiid sáhttá oastit beatnagii herskon. Ohcejohkalaš Anni Ahlakorpi goikada ieš beatnagiiddásis bohcco biergo-, cuozza- ja suotnabihtáid herskon.

Anni Ahlakorpi skurbá galmmihanlođá. Julggiin joreštit beatnagat Urra ja Suossa ja Tilli-bussá. Sii orrot diehtime, ahte juste sin herskkuid Ahlakorpi lea ohcame.

Galmmihanlođas Ahlakorpi seailluha earret eará dávttiid, suonaid ja cuozzabihtáid, maiguin son de gohkke beatnagiiddásis herskkuid.

Go dát suonat, biergo- ja cuozzabihttát leat suddán, Ahlakorpi lebbe daid uvdnaspelle ala. Spelle son hoigala ommanii , gos dát herskkot de goiket. Ija galget guolgás olbmát nagodit vuorddašit, ovdal go besset goikaduvvon bohccosuona suoskkadit.

– Mun in dieđe mot dan aistton virggálaččat dahje albma láhkai galggašii dahkat. Mun lean muhtun veardde alccen goikadan šattuid ja niesteborramuša, ahte go vuolgá meahccái. Dasto mun smihtten, ahte ii dat sáhte leat dađi gummet goansta daid suonaid goikadit.

Anni Ahlakorpi pitää käsissään poron suonta.
Dákkár bihtáid Ahlakorpi láve goikadit beatnagiiddásis. Govva: Inger-Elle Suoninen / Yle

Ahlakorpi láve oažžut oahppásiin dávttiid beatnagiidda. Dávttiin son goittotge vuos čuohppá eret bierggu, mii dávttiide lea vel báhcán.

– Go doppe leat diet suonat, de mun in sáhte dieid borahit beatnagiidda, go dat láveba vuoksit daid. Dasto mun fuobmájin, ahte daid sáhtašii varra goikadit, lohká Ahlakorpi.

Fitnodatdoalli álggii herskkuid buvttadit, go dakkárat eai lean fállun

Lea olu maid bohccos sáhttá dahkat beatnaga herskon, jus dan ii ieš bora. Diekkár herskkuid sáhttá maid gávppiin gávdnat. Polar Pet -fitnodagas jurdda beatnagiid herskkuid goikadeapmái bođii, go dákkár fálaldat ii bálljo lean.

– Dalle álggus eai lean olus goikaduvvon bohcco oasit beatnagiidda. De álggiime daid buvttadit, muitala Mika Laine Polar Pet -fitnodagas.

Mika Laine.
Mika Laine Polar Pet -fitnodagas muitala, ahte bohcco erttetdávttiide lea eanemus jearalmas. Govva: Mika Laine.

Polar Pet -fitnodahkii goikaduvvon beatnatherskkuide ávdnasat bohtet iešguđet guovlluin Suomas. Maiddái sii goikadit daid ommanis. Eanemus jearalmas lea goikaduvvon bohcco erttetdávttiide.

– Beatnagat dat smáhkejit. Oalle bures orru dohkkeme, árvala Laine.

Ahlakorpi muitala, ahte ieš goikaduvvon beatnatherskkot eai guhká seaillo. Lihkus daid ii dárbbat guhká vurkkodit.

– Fuobmájin muhtin gaskkas, ahte dat eai seaillo nu hirbmat guhká. Aŋkke jus dat leat diekkár burkkes, masa ii beasa áibmu, dasto dat gal álget guohpput. Mun jáhkán, ahte dát guovttos leaba dan oaivilis, ahte daid ii gal dárbbaš seastit.

Anni Ahlakorpi pitelee käsissään poron koparaa. Koirat Urra ja Suossa haistelevat.
Ahlakorpi beatnagat Urra ja Suossa susttašeaba herskkuid. Govva: Kirsti Länsman / Yle

Varrasamosat

Muualla Yle.fi:ssä