Sápmi |

Beassážiidda gávdná dušše šat buriin tuvrrain láigobartta: Suoločielggi čuoiganguovddážis ráhkkanitge hohppos basiide

Dán dálvvi bartaluopmu geasuha olbmuid miehtá Suoma.

Jarmo Katajamaa Suoločielgi.
Ski Saariselkä -fitnodaga beaivválaš jođiheaddji Jarmo Katajamaa muitala, ahte dán rádjai Suoločielggis leamašan vel viehka ráfálaš, muhto gulul álget olbmot boahtit. Govva: Inger-Elle Suoninen / Yle

Dál beassážiid áigge barttat leat dievva miehtá Suoma. Láigobarta addá bearrašiidda vejolašvuođa geassádit iežas ráffái eandaliige dál, go koronavirusepidemiija lea aŋkke báikkuid vearránanguvlui.

Lappi čuoiganguovddážiin leat valjis láigobarttat, mat sáhttet leat juo priváhtaoamastusas, fitnodagaid opmodat dahje gullat mannu hoteallaráidui.

Okta barttaid gaskkusteaddji lea Lomarengas oasussearvi, mas leat doaibmačuoggát miehtá Suoma, ovdamearkan čuoiganguovddážiin.

Lomarengas oasussearvvi beaivválaš jođiheaddji Juha-Pekka Olkkola muitalii otne maŋŋebárgga Yleisradio iđit-tv-prográmmas, ahte sis leamašan beassážiidda 3000 bartta gaskkustanláhkai birra Suoma.

Video: Juha-Pekka Olkkola studiovieraana Ylen aamussa.
Bartaluopmu? Maninba ii. Nu háliidit maid duháhat eará olbmot. Áššis lei sáhka Ylen aamu -prográmmas 30.3. Mielde earret eará beaivválaš jođiheaddji Juha-Pekka Olkkola Lomarengas oasussearvvis. Son muitala, ahte dán giđa láigobarttaide leamašan stuorra jearalmas. Video: Ylen aamu

Dál go beassášbasiide lea dušše muhtin beaivi, Olkkola mielde logut čujuhit, ahte birra Suoma leat friddja dušše šat moaddelogi bartta. Čuoiganguovddážiin dat leat mannan buot.

Nu Olkkola go máŋga eará doaibmi leat mannan áiggiin dadjan maid medias, ahte beroštupmi barttastallamii lea lassánanguvlui. Dan čájehit maid gávpelogut, man issoras olu olbmot geavahit ruđa barttaid oastimii.

Suoločielggi barttaid ja luopmoviesuid gaskkusteaddji fitnodaga, Saariselän keskusvaraamo, 300 idjadansajis sullii 90 proseantta lea várrejuvvon, muitala beaivválaš jođiheaddji Antti Kanerva.

Suoločielgi lea gulul dievvamin

Beassášjohtolat joriha johtui maŋimuštá skilleduorastaga. Suomashan dat lea árgabeaivi ja olbmot leat dalle velá barggus, muhto de beasihit, vulget johtui.

Suoma davimus stuorra čuoiganguovddáš Suoločielgi Anára gielddas maid lea ráhkkaneamen vuostáváldit beassášgussiid.

Dilis vurdet dál dán láhkái buorebu, go besset maid restoráŋŋaid rahpat. Čuoiganhissaid lohpidit jorrat olles beassášbasiid ja measta buot bargit leat barggus.

– Dán rádjai leamašan vel viehka ráfálaš, muhto dálhan dat álget olbmot boahtit, jáhkkimis juo otne lea eambo olmmoš jođus, ja lassána vahkuloahpa guvlui, muitala Ski Saariselkä -čuoiganguovddáža beaivválaš jođiheaddji Jarmo Katajamaa.

Son goit maid lasiha, ahte beassážiidda leamašan váttis ráhkkanit, go ovddalgihtii ii riekta leamašan dieđus man olu olbmot bohtet. Son goit jáhkká, ahte dat geat leat beassážiid áigge áigon vuolgit johtui, bohtet davás ja ahte guovllu barttat leat dievva.

Dán áššis lei sáhka Ylen aamu -prográmmas iđđes 30.3. Áššis oainnát lasi maiddái Yle Ođđasat -sáddagis diibmu 16.45.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä