Sápmi |

Beatnagiid dagahan boazovahágat čielggadeapmái – árvalusaid mielde 100 dáhpáhusa ja moaddelot jápmima jahkásaččat

Bálgosiid ovttastus ovttas eará doaibmiiguin lea čielggadišgoahtán beatnagiid dagahan boazovahágiid. Ulbmilin lea oažžut konkrehta ovdamearkkaid ráđđádallamiidda ministeriijain.

Koiran raatelemaksi joutunut kuollut poro.
Dát boazu lea jápmán, go beana lea dan gaikkodan. Dákkár dáhpáhusaid áigot dál čielggadit dárkilut, vai dat mannet maid ministeriijai diehtun. Govva: Paliskuntain yhdistys

Mannan giđa guokte luovos beatnaga gaikkodedje bohccuid Anáris. Dalle aŋkke vihtta bohcco jápme ja 30 lápmašuvve. Dát lea okta muitalus das, makkár vahágat soitet dáhpáhuvvat.

Dál beatnagiid dagahan boazovahágiid leat čielggadišgoahtán, dasgo vahágat eai boađe ovdamearkka dihte ministeriijai moge oidnosii.

Bálgosiid ovttastus bargá čielggadeami ovttas Meahciráđđehusain, Fuođđoguovddážiin ja eanan- ja meahccedoalloministeriijain.

Doaimmajođiheaddji Anne Ollila Bálgosiid ovttastusas muitala, ahte beatnagiid dagahan vahágiin ii leat statistihkka gostege, ja dat lea okta sivva čielggadeami álggaheapmái.

Anne Ollila.
Bálgosiid ovttastusa doaimmajođiheaddji Anne Ollila mielde čielggadeapmái lea dárbu, go ráđđádallamiin eai muđui leat konkrehta ovdamearkkat beatnagiid dagahan vahágiin. Govva: Vesa Toppari / Yle

– Go mii geahččalit buktit ovdan dán váttisvuođa, de eiseválddiid vástádus lea álo dat, ahte dát vahágat eai dáhpáhuva dahje ahte dat leat hárvenaččat. Dat boahtá namalassii statistihkaid ja registrerema váilumis, man mii geahččalit dáiguin almmuhusaiguin divvut, čilge Ollila.

Máŋggalágán vahágat – moaddelot bohcco jápmet jahkásaččat

Konkrehtalaš vahágat dáhpáhuvvet boazodoalloguovllus Anne Ollila árvalusaid mielde sullii čuohti jahkásaččat. Moaddelot bohcco jápmet dáin vahágiin.

Vahágat sáhttet leat ovdamearkka dihte maiddái dakkárat, ahte beatnagat vaikkoba biđgejit ealu dahje miesit ravget álddus.

Kuolleita poroja.
Goit vihtta bohcco jápme, go beatnagat rohkkáhedje bohccuid Anáris mannan giđa. Dál Bálgosiid ovttastus čielggadišgoahtá beatnagiid dagahan vahágiid. Govva: Kirsti Länsman / Yle

Dasa lassin bohccot soitet earret eará lápmašuvvat beatnagiid dihtii juoganuláhkai. Oktan ovdamearkan Ollila máinnaša boazolihkuhisvuođaid, mat sáhttet dáhpáhuvvat, jus beatnagat vuojihit bohccuid biillaid ovdii geainnu ala.

Konkrehtalaš vuođđu ráđđádallamiidda

Geasi áigge leat boahtán moadde almmuhusa, muhto kárten lea easkka álggus. Dál almmuhusaid sáhttá bargat gii beare, guhte lea oaidnán beatnagiid bohccuide dagahan vahága.

– Ulbmilin lea, ahte dat attášii midjiide konkrehtalaš vuođu earret eará meahcástanáššiin ráđđádallamii. Dárkkuhussan lea oažžut áigái konkrehtalaš buoridemiid, muitala Ollila.

Almmuhusa sáhttá dahkat neahttaskoviin, masa galgá deavdit dárkilis dieđuid ja govvidemiid dáhpáhusas.

Čielggadit beatnagiid dagahan boazovahágiid, dasgo dain ii leat makkárge statistihka. Áššis muitala Bálgosiid ovttastusa doaimmajođiheaddji Anne Ollila.

Varrasamosat: Sápmi

Váldoođđasat

Varrasamosat

Muualla Yle.fi:ssä