Sápmi |

Beatnagiid dovdomerken soaitá šaddat bákkolažžan Suomas jagis 2023 – Eanodaga-Muoná guovllus sullii bealis beatnagiin lea dál digitála dovdomearka

Dál ovdamearkka dihte Eanodaga ja Muoná gielddas sullii bealis beatnagiin lea digitála dovdomearka.

Lähikuva irlanninsetteristä.
Jus ásahusevttohus šaddá duohtan, lea buot beatnagiid bággu dovdomerket jagi 2023 álggu rájes. Govva: Antje Tolpo / Yle

Suoma eana- ja meahccedoalloministeriijas lea dál cealkinláhkai ásahus beatnagiid dovdomerkemis ja registreremis.

Ásahusevttohusa mielde Suomas 1.1.2023 maŋŋel riegádan vielpáide galgá bidjat digitála dovdomearkka liikki vuollái (su. mikrosiru) ja dan galgá almmuhit registarii maŋimuštá golbma mánu riegádeami maŋŋá. Vielppis galggašii maiddái leat merkejuvvon, jus dan addet ođđa hálddašeaddjái.

Maiddái beatnagiid, maid buktet eará riikkain Supmii, galggašii njealje vahku siste registreret digitála dovdomearkkain.

Eanodaga-Muoná guovllus sullii bealis beatnagiin lea dovdomearka

Eanodaga ja Muoná guovllu gieldda šibitdoavttir Marianne Mannela muitala, ahte sin guovllus sullii bealis beatnagiin lea digitála dovdomearka.

Buohkat dain eai goittotge leat registrerejuvvon makkárge registarii. Buhtesnálát beatnagat leat kennellihtu registaris, muhto máŋggain digitála dovdomearka lea dušše pássa várás.

Suomas lea leamaš Statistihkkaguovddáža jagi 2016 viiddis dutkamuša mielde sullii 700 000 beatnaga, main 510 000 lea dalle leamaš registrerejuvvon Kennellihtu registarii. Dan áigge statistihkaid mielde Suomas leamašan measta 200 000 beatnaga, mat eai leat registrerejuvvon. Dan atne Kennellihtus fuolastuhttin.

Dál buot beatnagat eai leat namalassii Kennellihtu registaris, muhto registarat leat máŋggat, jus vaikko beana ii leat buhtesnálát. Dán áigge registarat ja dovdomearkkat leat máŋggalágánat. Dat sáhttet leat dárkkuhuvvon ovdamearkka dihte beatnaga ohcama ja dorvvu várás.

– Min bargui dat váikkuha nu, ahte buhtesnálát vielpáide bidjet chippa ja de bidjet kennellihtu registarii. Ja de máŋggat háliidit chippa bidjat beatnagii, vaikko dat ii livččiige buhtesnálát ja dat dahkko máŋgii boahkuhemiid oktavuođas, čilge Mannela.

Eallit eai oaččo pássa digitála dovdomearkka haga. Juohke háve boahkuhemiid oktavuođas mearka dárkkistuvvo.

"Ođđa mearrádusain bastet easttadit vielpáfabrihka"

Eanodaga ja Muoná gielddaid šibitdoavttir Marianne Mannela mielde lea vuogas, jus mearrádus boahtá fápmui jagi 2023. Dat váikkuhivčče ovdamearkka dihte nu gohčoduvvon vielpáfabrihkaide, go beatnagiid meari livčče álkit čuovvut.

– Mu mielas orru buorre. Dainna bastet easttadit vielpáfabrihkaid, go buot beatnagat leat mannulágán registaris. Maid elliidsuodjalanbarggus dat lea buorre, ahte bastet ohcat ja gávdnat daid beatnagiid dárbbu mielde, lohká Mannela.

Divvojuvvon 24.7.2020 dii 7:00: Bajilčállagis divvojuvvon diehtu ahte Eanodaga ja Muoná guovlluin sullii bealis beatnagiin lea dovdomearka. Ovdal muitaleimme ahte sullii bealli lea registaris

Varrasamosat: Sápmi

Váldoođđasat

Varrasamosat

Muualla Yle.fi:ssä