Sápmi |

Biaudet čavggahii ráđđehusa sámediggelága ovddideamis ja 9§ ráđđádallangeatnegasvuođas

Ruoŧŧelaš álbmotbellodaga riikkabeaiáirras Eva Biaudet lea fuolas sápmelaččaid gullama ollašuvvamis sámediggeláhkaevttohusa gieđahallama oktavuođas.

Kuvakaappaus Yle Areenasta Eduskunnan kyselytunnilta
Govva Yle Areena riikabeivviin gažadandiibmu-njuolggosáddagis. Govas Eva Biaudet. Govva: Yle Areena

Eva Biaudet jearai sámediggeláhkaevttohusa válmmaštallamis ráđđehusas riikkabeivviid gažadandiimmus. Gažadandiibmu sáddejuvvui Yle tv 1 -kanálas duorastaga veaigin.

Biaudet háliidii diehtit, mo ráđđehus lea doaibman sámediggeláhkaevttohusa válmmaštallamis ja ráđđádallamis. Sámedikki dievasčoahkkin mearridii mannán vahku vuossárgga hilgut ráđđehusa evttohusa ođđa sámediggeláhkan.

Biaudet čavggahiige dál ráđđehusa das, ahte leamašgo das duođas dáhttu ovddidit ášši.

– Áigugo minister Häkkänen álggahit Sámedikkiin ráđđádallamiid dego sápmelaččain addojuvvon lága 9 paragráfas geatnegahttet vai ođđa láhka sáhtašii boahtit fápmui ovdal čuovvovaš sámediggeválggaid?

Mannán vahkus Anna-Maja Henriksson dajai Yle Sámi jearahallamis, ahte dát ášši lea hui áigeguovdil, go easkkahan Sámediggi gieđahalai ášši ja mearridii hilgut láhkaevttohusa.

– Ieš livččen sávvan vel čakčamánu álggus, ahte ráđđehus ja Sámediggi livčče ráđđádallan ja gávdnan oktasaš oaivila evttohussii, dajai Henriksson.

Ruoŧŧelaš álbmotbellodaga ságajođiheaddji ja ovddit ráđđehusa vuoigatvuođaminister Anna-Maja Henriksson muitá go sámediggelága ođasmahttin lei ovddit háve gieđahallama vuolde. Son lei dalle riekteministtarin ja morašmielain muittaša mo bures dahkkon bargu gopmánii riikkabeivviin.

– Dalá ráđđehusbellodagat, olgešbellodat Kokoomus ja sosiálademokráhtat, eai dasto doallange gitta das, maid ledje lohpidan. Dál dilli dieđus lea earálágan, muhto stuorra gažaldat lea ain, ahte leago ráđđehusas duođalaš dáhttu ovddidit ášši. Orru, ahte leat menddo álkit addán vuollái.

Vuoigatvuohtaminister vástidii gažaldahkii

Riikkabeivviid gažadandiimmus Biaudet gažaldahkii vástidii vuoigatvuođaminister Antti Häkkänen (olgeš). Son vástidii minuhta guhkkosaš vástádusastis, ahte ráđđehus lea váldán duođas sámediggelága ovddideami ja dálá dili buorideami.

– Dán ovttasbarggus lei ásahuvvon bargojoavku, mii barggai buori ovttasbarggu ja das ledje maiddái Sámedikki ovddasteaddjit mielde hukseme kompromissa.

Häkkänen lohká iežas dorjon doaibmagotti barggu čađat, muhto ovttamielalaš evttohusas fuolatkeahttá Sámediggi ii dohkkehan evttohusa ja danin ášši lea gopmáneame.

– Lean lohpidan Sámediggái, ahte sin dáhttu vuostá in boađe doalvut láhkaevttohusa ovddos guvlui. Nappo ášši lea ovttamielalaš doaibmagoddeevttohusas fuolatkeahttá báhcán gitta Sámedikki dihte, vástidii Häkkänen.

Kuvakaappaus Yle Areenasta Eduskunnan kyselytunnilta
Ráđđádallangeatnegasvuohta lea Häkkänena mielde ollašuvvan. Govva Yle Areena riikabeivviin gažadandiibmu-njuolggosáddagis. Govva: Yle Areena

Ráđđádallangeatnegasvuohta lea Häkkänena mielde ollašuvvan.

– Ráđđádallangeatnegasvuohta riekteministeriija oasil lea devdojuvvon. Ráđđádallamat leat leamašan čađat áiggi, nu eahpevirggálaččat go virggálaččatge, Häkkänen loahpahii.

Riikabeivviid gažadandiimmus ášši gieđahallan nogai Häkkänena vástádussii čavga áigetávvala dihte. Riikkabeivviid ságajođiheaddji Paula Risikko loahpahii ságastallama ja logai ahte Biaudet ja Häkkänen sáhttiba joatkit ságastallama guovttá gaskka.

Varrasamosat: Sápmi

Váldoođđasat

Varrasamosat