Sápmi |

Bisma: Lagašolbmot sáhttet oassálastit hávdái vitkamii

Hávdái vitkamis sáhttet leat pástorálalaš sivaid geažil jápmán olbmo lagamušat, vaikko dát manašiige badjel logi olbmo meari. Muđui girkolaš doaimmahusain ferte čuovvut logi olbmo eanemusmeari.

Piispa Jukka Keskitalo
Govva: Juha Hintsala / Yle

Luterálaš girku rávvagiid mielde girkolaš doaimmahusain eai oaččo leat eanet go logi olbmo čoahkis. Stáhta eiseválddiid addán rávvagiid vuođul girku oaivámušat leat fas addán searvegottiide dárkilut rávvagiid áššis. Eandalit hávdái sivdnideami bokte dát olmmošlohkomearri lea bohciidahttán olbmuin gažaldagaid.

Oulu bismmagotti bisma Jukka Keskitalo muitala, ahte duon logi olbmo meari badjel sáhttá mannat vai áibbas lagamušat besset mieđuštit.

– Ovdamearkka dihte váinni buot mánát sáhttet boahtit sivdnidandilálašvuhtii. Dasa mii figgat, ahte olmmošmearri bissu logis, muhto gal das unnánaš lea ložženvárri, dadjá bisma Keskitalo.

Dat, ahte lohkomearri lea boktán gažaldaigaid lea áddehahtti, danin go lágašolbmo jápmin ja hávdái vitkan guoskkahit morrašis čiekŋalasat, cealká bismmagoddi.

Hávdái vitkamis sáhttet leat pástorálalaš sivaid geažil jápmán olbmo lagamušat, vaikko dát manašiige badjel logi olbmo meari. Muđui girkolaš doaimmahusain ferte čuovvut logi olbmo eanemusmeari.

Luterálaš girku bismmat doivot oktasaš cealkámušaineaset olbmuin áddejumi dán áššái.

Gaskkaid ferte doallat ja buohccin ii dieđus oaččo boahtit oba vitkamii

Jus hávdái vitkamis šaddá lagašolbmuid oassálastadettiin logi olbmo dilálašvuohta, de galgá buot vejolaš daguid bokte geahččalit garvit njoammunriskka ovdamearkka dihte nu, ahte oassálastit leat vitkankapeallas dahje hávddi luhtte doarvái guhkkin nuppiin.

Lunddolaččat lea čielggas, ahte ii oktage, guhte lea ožžon vuoigŋanváttisvuođaid, oassálaste hávdái vitkamii.

– Go oamehas leat vitkojuvvon hávdái, de okta vejolašvuohta lea čoahkkanit doallat muitobottu dahje muitočoakkálmasaid easkka dan maŋŋá, go dávdavárra lea meattá. Čielggas lea, ahte hávdái sivdnideamit doaimmahuvvojit, muhto dán dilis erenoamáš ortnegiin, Keskitalo muitala.

Gásttašemiid gal doaimmahit

– Gásttašeamit ordnejuvvojit muhto unna jovkkošiin. Unnoraš, báhppa, vánhemat ja risvánhemat livčče báikki alde. Eanemustá logi olbmo. Náittoslihttui vihahemiin mii ávžžuhit vuordit dán koronaáigodaga badjel. Oaivilhan ii leat hehttet geange eallima, muhto dán ferte áddet ahte dál lea dákkár dilli, deattuha Keskitalo.

Girkus leat fuomášan dan, ahte girkolaš bálvalusat neahta bokte leat fáhtten valjis olbmuid.

– Meassuid ja ipmilbálvalusaid ferte ordnet gitta uvssaid duohken, muhto dat govvejuvvojit dahje streamejuvvojit ja nu leatge buot searvegottiiin davvin dahkan. Bálvalusaid beassá čuovvut neahtas, čilge bisma Keskitalo.

Olbmuid, geat leat lossa jurdagiid gaskkas, bisma jeđđe ná:

– Mii ovttas ceavzit dásge. Sávan buohkaide Sámis nanusvuođa ja fámuid. Ollugiidda dát dagaha ekonomalaččat garra dili. Sávan Ipmila sivdnádusa ja jáhkan, ahte almmálaš áhčči láide dáidge váttis bottuid gaskkas.

Varrasamosat: Sápmi

Váldoođđasat

Varrasamosat

Muualla Yle.fi:ssä