Sápmi |

Bivdi lea duđavaš ministeriija evttohussii áradit ealgabivddu ragatbottu maŋŋá – boazodoalliges árvala, ahte okta vahkku ii mearkkaš maidige

Ministeriija mielde váttes muohtadilli lea hehtten ealgabivddu maŋimus jagiid áigge.

Jarmo Helander
Utsjoen eränkävijät -searvvi ságadoalli Jarmo Helander mielas lea buorre, ahte bivdoáiggi evttohit áradit golggománu bealde. Govva: Outi Paadar / Yle

Ealgabivdoáigái Davvi-Suomas sáhttá boahtit unna nuppástus. Eana- ja meahccedoalloministeriija evttoha álgahit bivdoáigodaga ragaha maŋŋá juo golggotmánu vuosttas lávvardaga. Dát mearkkašivččii vahku eanet ealgabivdoáiggi go dássážii.

Bivdoáššiid ráđđi ja ministeriija ákkastallet ealgabivddu áradeami dainna, go dáid jagiid leamaš ollu muohttaga dihte váttis bivdit maŋeščavčča.

Ministeriija válmmaštallá bivdoásahussii nuppástusa ja bivdá dál evttohusastis cealkámušaid 7.8. rádjái. Ulbmil lea, ahte nuppástus boađášii fápmui juo dán čavčča.

Bivdi: Juos evttohus ollašuvvá, de olbmot gearggašedje bivdit buorit dálkediliin

Utsjoen eränkävijät -searvvi ságadoalli Jarmo Helander livčče duđavaš, juos ealgga bivdoáigi guhkku.

– Mun gal livččen duđavaš. Mu mielas dat livčče buorre ja mun jáhkán, ahte dáppe Ohcejogas viehka stuorra oassi meahcásteaddjin livčče muinna ovtta oaivilis.

Helander muitala mo mannan čavčča muohta bođii árrat ja dat hehttii maiddái ealggabivddu golggot -ja juovlamánus. Juos evttohus ollašuvvá, de olbmot gearggašedje bivdit buorit dálkediliin.

Sutnje reahkká vahku guhkit bivdoáigi.

– Sihkkarit nohkka dat vahkku. Ferte leat duđavaš, juos dat vahkuinge guhkku. Ovdal nu beliid, ahte golggotmánus lea guhkkit go ođđajagimánus, dalle lea jo hui váigat bivdit, oaivvilda Helander.

Guldal, maid Jarmo Helander jurddaša guhkit bivdoáiggis. Jietna: Sáárá Seipiharju / Yle

Boazodoalli mielas guhkit bivdoáigi ii leat váttisvuohta, baicce olgobáikegoddelaččat

Ohcejohkalaš boazodoalli Asko Länsman ii jáhke, ahte bivdoáiggi áradeapmi golggotmánus váikkuhivčče moge su eallimii moge, vaikko dieid sulaid sin bálgosis leat juogo čohkkemin dahje gárddástallamin.

– Ii várra dat okta vahkku mearkkaš maidige.

Asko Länsman
Boazodoalli Asko Länsman ii liiko dasa, ahte olgobáikegoddelaččat besset bivdit ealggaid Ohcejogas. Govva: Vesa Toppari / Yle

Ealgabivddu váttisvuođat gávdnojit áibbas eará áššis.

– Eambbo dáppe lea dat ruossalasvuohta, go deikke vuvdet ealgalobiid olgobáikegoddelaččaide. Dat lea midjiide earenoamáš fuotni. Dáppe vátna ealggaid gal boađášedje báikegotti olbmot beassat bivdit, oaivvilda Länsman.

Son namuha, ahte váttisvuođaid dagahit earenoamážit olgobáikegoddelaččaid beatnagat, mat eai leat hárjánan bohccuide.

– Dat beatnagat gal gávdnet daid min bohccuid menddo árrat duoddariin.

Guldal maid Asko Länsman jurddaša das, ahte ealgabivdu álggášiige árabut golggotmánus. Jietna: Sáárá Seipiharju / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä