Sápmi |

Boađe galledit Yle Sámi! Ođđa doaibmadálus rabasuvssat miessemánu loahpas

Doaimmahussii lea vejolaš oahpásmuvvat bearjadaga 31.5.2019 diibmu 14–16.

Erkki Gauriloff láidesta Yle Sámi rádiosáddagiid nuortalašgillii.
Ontrimiklai Ääʹrhep, Erkki Gauriloff láidesta Yle Sámi Dearvva! Tiõrv! Tiervâ! -veaigesáddaga ođđa rádiostudios. Govva: Anneli Lappalainen / Yle

Boađe galledit min!

Yle Sápmi ordne Anára ođđa doaibmadálus rabasuvssaid beaivvi bearjadaga 31.5 diibmu 14–16. Beaivvi áigge galledeaddjiin lea vejolašvuohta oaidnit, gos Yle Ođđasat -tv-sátta báddejuvvo ja makkár rádiostudios iđit- ja veaigesáddagat lágiduvvojit.

Rahpandoaluin beasat deaivat maiddái Yle Sámi doaimmaheaddjiid ja cavgilit evttohusaid sisdoaluid birra.

Yle Sámi hoavda Maiju Saijets sávvá buohkaid buresboahttin rabasuvssaid beaivái.

– Go min ođđa doaibmalanjat leat áibbas giliguovddážis de sávašeimmet, ahte olbmot guovlladivčče geahččamin, makkár sajis mii bargat, Saijets ávžžuha.

Doaimmahus lei gaskaboddasaš lanjain njeallje jagi

Yle Sápmi fárrii álgojagis 2019 ođđa doaibmalanjaide gávpeguovddážii Anára girkosiiddas. Doaimmahusa gávdná dál čujuhusas Lehtolantie 2.

Yle Sámi ođđa doaibmalanjat leat gávpeguovddážis guovdu Anára márkana.
Yle Sámi ođđa doaibmalanjat leat gávpeguovddážis guovdu Anára márkana. Govva: Anneli Lappalainen / Yle

Yle Sámi doibmii lea ollu váikkuhan dat, go doaimmahusa ovddeš doaibmabáikkis boares radiodálus ledje máŋga jagi sisáibmováttisvuođat ja doaimmahus fárrii doppe loahpalaččat eret skábmamánus 2015.

Sisáibmováttisvuođat váikkuhedje doaimmahusa rádio- ja tv-buvttadeapmái. Ovdamearkka dihte Yle Ođđasat -sáddagat govvejuvvojedje guokte jagi, čavčča 2017 rájes, almmolaš sajis Sámekulturguovddáš Sajosis. Dál ođđa dálus sihke rádio- ja tv-buvttadeapmái leat fásta sajit.

Varrasamosat: Sápmi

Váldoođđasat

Varrasamosat

Muualla Yle.fi:ssä