Sápmi |

Boahtte mánus ilbmá ođđa sámegielat sálbmaskearru – ii fal dábálaš dakkár, baicce juoidá áibbas ođđa ja earálágan

Juoga hui boares ja oahpis, muhto áibbas ođđa hámis. Musihkkaskearru sámegielat sálmmain almmustuvvá mánu geažes, muhto áibbas ođđa heivehusain.

Video: Anna Näkkäläjärvi-Länsman, Utsjoki
Musihkkár Anna Näkkäläjärvi-Länsman lea báddemin ođđa sámegielat sálbma CD:a ovttas kántor ja bismágotti čálli Raimo Paasoin. Video: Anneli Lappalainen / Yle

Musihkkár Anna Näkkäläjärvi-Länsmanii sálmmaid lávlun girkus lea šaddan oahpisin. Dán vahkus son lea beassan veaisidit Ohcejoga girku sáhkáhis. Son lea báddemin ođđa sámegielat sálbma-CD:a. Dat ii leat dievva dábálaš sámegielat sálmmaid, son lea baicce heivehan daid ođđasit.

– Mun lean válljen dakkáriid, maidda mus lea juoga earenomášvuohta mo mun háliidan lávlut daid. Mun in leat jurddašan, ahte mun ferten hirbmat máŋga válljet dasa mielde. Mun lean eanet jurddašan dan musihka ja kvalitehta go dan, ahte fertejit leat ollu sálmmat.

Galle sálmma ja makkár sálmmat cd:ai besset Näkkäläjärvi-Länsman heivehusain, dan eai muital ovddalgihtii. Juohke sálmmas lea goit juoga, mii lea addán inspirašuvnna musihkkárii.

Čuojaheaddjin skearrus lea kántor ja bismágotti čálli Raimo Paaso. Son atná gudnin, go beassá leat mielde dán CD:s.

– Dovddan, ahte dál lea šaddamin juoga mearkkašahtti. Mu mielas orru, ahte dát Sámi sálmmat leat eallán čuđiid jagiid dáppe. Lihkká daid leat unnán bádden.

Almmustahtto bismádárkkistusa oktavuođas Anáris

Ođđa sálbma CD:a lea ruhtadan bismágotti sámebargu. CD:a almmustahttet guovvamánu 20. beaivvi Sámekulturguovddáš Sajosis Anáris, go Bismá boahtá dahkat Anára searvegoddái bismádárkkistusa.

– Mu mielas dat lea dehálaš muitit, ahte dat lea maiddái okta árbevierru Sámis, dat sálbmalávlun. Ja mun liikon hui olu lávlut sálmmaid, ahte dat lea mu mielas dušše somá. Dain leat čáppa melodiijat ja daid lea hávski dulkot, danin háliidan lávlut daid, muitala Anna Näkkäläjärvi-Länsman.

Skearru teknihkalaš buvttadeaddji Eero Karvonen oaidná, ahte skearru boahtá leat erenoamáš.

– Orgel girkosáles, Anna lávlla sáhkáhis, go daid bidjá oktii, šaddá juoidá áibbas ođđa ja earálágan, illuda Karvonen.

Varrasamosat: Sápmi

Váldoođđasat

Varrasamosat

Muualla Yle.fi:ssä