Sápmi |

Boahtteáiggis mohtorgielkámáđiijaid mielde ožžot johtit earátge – heargesafari bargi goit ii manašii herggiiguin mohtorgielkámáđiijaide

Turistafitnodagat leat fuolas ođđa geaidnojohtolatlága váikkuhusain. Láhka boahtá fápmui geassemánus.

riehâpeenuv vyeijee Kati Vuoriaro
Avvillaš Kati Vuoriaro mielas eandalit heargeráidduiguin ii gal sáhte mannat mohtorgielkámáđiijaide vuojašit. Govva: Anja Kaarret/Yle

Boahtte geassemánus boahtá Suomas fápmui ođđa geaidnojohtolatláhka, mii diktá earáge go mohtorgielkkáid johtit merkejuvvon meahccemáđiijaid mielde.

Ovdamearkka dihtii beana- ja heargeráiddut ja sihkkelastit besset boahtteáiggis geavahit mohtorgielkámáđiijaid. Dat orru Lapin Safarit -fitnodaga doaimmajođiheaddji Jyrki Karonen mielas issoras jurdda.

– Das gal ii leat miige jirpmiid, šaddet heakkaváralaš dilit máđiijaide, oaivvilda Karonen.

Lumitykki pauhaa taustalla
Lapin Safarit safaridoaimmajođiheaddji Jyrki Karonen (olgeš bealde) ballá ođđa geaidnojohtolatlága váikkuhusain. Govva: Vesa Vaarama / Yle

Avvillaš Kati Vuoriaro bargá Suoločielggis turistafitnodagas. Son lea vuodján beana- ja heargeráidduiguin jo máŋga jagi.

Vuoriaro mielas eandalit heargeráidduiguin ii gal sáhte mannat mohtorgielkámáđiijaide vuojašit.

– Dat lea dakkár ealli, ahte dat ii liiko jus doppe lea mii nu amas ášši. Mohtorgielkkáiguin ii sáhte vuodjit seamma áigge seamma máđiija mielde. Heargeráidduide fertejit gal leat áibbas iežas máđiijat, maid mielde vuodjit, dadjá Vuoriaro.

Ministeriijas celket, ahte lága sáhttá vel divvut ovdal fápmuiboahtima

Ođđa geaidnojohtolatláhka addui jo ovddit jagi, muhto dat boahtá fápmui easkka dál geassemánus. Lága válmmaštalliid mielde mohtorgielkámáđiijaid rahpan earáidge atnui lei diđolaš ulbmil, iige dan leat giige vuostálastán.

– Ođđa lágain leat hálidan lasihit máđiijaid geavaheami, muhto daid fuolaheaddjiin lea lohpi gieldit ja ráddjet daid geavaheami, dadjá ossodathoavda Elina Immonen johtolatministeriijas.

Lága leat goittot vel divodeamen, ovdalgo dat boahtá fápmui geassemánus. Lágas sáhttá vel cealkit.

– Jus boahtá olu máhcahat dákkár fuolain, de dat váldo vuhtii ja dalle lea vejolaš vel nuppástuhttit lága, joatká Immonen.

Cealkámušaid ođđa geaidnojohtolatlágas sáhttá sáddet ministeriijai ođđajagimánu 16. beaivve rádjái.

Fitnodatdoalli ballá geavvat bárttiid ja daid beaggit dasto medias

Fitnodatdoalli Timo Palonoja mielas evttohus orru váralaš. Son lea jođihan heargeráido- ja mohtorgielkásafariid máŋggalot jagi áigge Suoločielggi guovllus.

– Mu mielas galggašii bissut dan láhkahámis, mii dál lea fámus. Juohkehaš geassá ieš iežas máđiijaid dárbbuid mielde ja máksá iežas goluid, cealká Palonoja.

Palonoja ballá maid, ahte jus geavvá bárti máđiijain, de maid dat dahká turismasuorgái.

– Jus beakkeha medias ja aviissain, ahte dat eai leat dorvvolaččat, de mii gillát das.

Joiku-Kotsamo Safaris
Timo ja Armi Palonoja leaba bargan turismabargguin jo fargga 30 jagi. Govva: Joiku-Kotsamo Safaris

Fitnodatdoalli Miia Merkku Roavvenjárggas goittot jáhkká, ahte olbmuin lea jierbmi oaivvis.

– Galhan dat buktá dakkár riskkaid, ahte miige vásttolaš husky- dahje heargesafarifitnodat ii dohko vuolgge, go beatnagiiguin ja herggiiguin ii geargga eret mohtorgielkkáid ovddas.

Arctic Reindeer Oy:n toimitusjohtaja Miia Merkku
Miia Merkku turismafitnodagas leat iežas máđiijat heargesafaridoaimma várás. Govva: Sauli Antikainen / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä