Sápmi |

Boahttevuođas boazodoarjagiid ohcan sirdašuvvá internehttii ja ruđaid mákset jođánabbot

Doarjagiid máksin sáhttá ođđa neahttavuogádagain jođálmuvvat mottiin vahkkuin.

Päivi Kainulainen on Ely-keskuksen porotalousasiantuntija.
Aiddo dál leat gieđahallamin boazodoalliid doarjjaohcamušaid. Boahttevuođas gieđahallan, ohcan ja máksin leat álkibut, muitala EJB-guovddáža boazodoalloáššedovdi Päivi Kainulainen. Govva: Vesa Toppari / Yle

Boazodoalu áššedovdi Päivi Kainulainen láne Lappi Ealáhus-, johtolat- ja birasguovddáža beavdái báhpáriid, mat eai oro oba nohkaminge. Sii leat aiddo dál gieđahallamin boazodoalliid eallibohccodoarjagiid.

Lánas leat Suoma 889 boazodoalli ohcamušat mildosiiguin. Ovtta bohccos oažžu 28,50 euro doarjaga, jus boazodoallis leat badjel 80 ealli bohcco.

Dá leat Suoma boazodoalliid boazodoarjjaohcamušat. Jagis 2019 ohcamušat ledje measta 900. Doarjaga sáhttá ohcat, jus oamasta badjel 80 eallibohcco.
Dá leat Suoma boazodoalliid boazodoarjjaohcamušat. Jagis 2019 ohcamušat ledje measta 900. Doarjaga sáhttá ohcat, jus oamasta badjel 80 eallibohcco. Govva: Vesa Toppari / Yle

Diibmu vázzá ja golggotmánnu gollá.

– Mii váldit ain ovtta olles bálgosa gieđahallamii. Gieđahallat dan bálgosa buot ohcamušaid, dasto váldit soaittáhagas ođđa bálgosa. Ulbmil lea, ahte ovdal golggotmánu loahpa visot bálgosat leat gieđahallojuvvon ja dalle beassat máksigoahtit, muitala Kainulainen.

– Dál leat gieđahallan jo eanaš oasi bálgosiin, muhto gal doppe leat vel muhtun bálgosat vuordimin gieđahallama.

Dálá dilis boazodoalli ii dieđe, leago su ohcamuš gieđahallojuvvon ja goas doarjaga mákset su báŋkokontui. Ferte ieš fitnat juohke beaivvi guovlamin báŋkkus.

“Doarjaga ohcan ja gieđahallan šaddá álkibun ja máksin jođánabbon”

Boahttevuođas dilli goit boahtá rievdat. Suoma Biebmodoaimmahat (su. Ruokavirasto) lea ođadeamen vuogádagaid doarjagiid ohcama várás. Biebmolágádus máksá doarjagiid ja EJB-guovddáš fas gieđahallá ohcamušaid.

Sáhttá leat, ahte jo boahtte čavčča boazodoarjagiidge sáhttá ohcat interneahta bokte, muitala Biebmodoaimmahaga vuogádatáššedovdi Eero Filppula.

– Ulbmil lea, ahte doarjaga ohcan ja gieđahallan šaddá álkibun. Dan mielde bastet maiddái máksit jođánabbot, dadjá Filppula.

Filppula árvala, ahte interneahta bokte doarjagiid ohcan jođálmahttá máksima mottiin vahkuin.

Eero Filppula.
Neahta bokte dahkkon ohcamušaid vehkiin doarjjaruđat skilihit kontui moadde vahku árat go ovdal, lohpida vuogádatáššedovdi Eero Filppula. Govva: Vesa Toppari / Yle

Dálá dilis boazodoalli ferte dušše govahallat, juogo su bábir lea gieđahallojuvvon, ja guovlat báŋkokonttu ja vuorddašit ruđaid.

Sáhttá leat, ahte boahtte jagi jo skiliha maiddái telefovdnii diehtu doarjagiid máksimis.

– Ulbmil lea sáddet almmuhusa ohcciide, ahte sii dihtet mo sin ohcamuš ovdána, muitala Filppula.

Ovdamearkka dihte Suoma eanandoalu doarjagiid ohcet jo interneahta bokte. Measta buohkat dahket nu dán áigge, muitalit EJB-guovddážis.

Boahttevuođas boazodoarjaga sáhttá ohcat VIPU-bálvalusa bokte vaikko telefovnnain.

Jus ii hálit dahkat ohcamuša neahta bokte, dan lea ain boahttevuođasge vejolašvuohta dahkat báhpára ja poastta bokte, dalle EJB-guovddáš ieš bidjá dieđuid internehttii.

Varrasamosat: Sápmi

Váldoođđasat

Varrasamosat

Muualla Yle.fi:ssä