Sápmi |

Boaldámuš divru Suomas lávvordaga – njuorggánlaš fitnodatdoallit jáhkket norgalaččat jotket Suomas táŋkema

Njuorggáma bensenstašuvnna áššehasain 90 proseantta leat norgalaččat.

Ari Naapanki
Bensenstašuvnna eaiggát Ari Naapanki jáhkká, ahte norgalaččat boađášedje maiddái boahttevuođas táŋket Supmii. Govva: Sáárá Seipiharju / Yle

NJUORGGÁN Gili guovddážis Suoma ja Norgga rájá alde Njuorggámis lea rádjegávpi, man šiljus leat olu biillat. Stuorámus oassi biillain gullá norgalaččaide, vaikko dál geassit rádjegávpi geasuha maiddái suopmelaš mátkkošteddjiid.

Norgalaččat fitnet Njuorggámis oastimen biepmu, muhto maiddái táŋkemin biilla. Dál dilli sáhttá nuppástuvvat, danin Suomas boaldinávdnasa haddi šaddá lávvordaga divrasabbon vearrobajádusa dihte.

Fossiila bensiinna ja diesela lihtterhaddi divru 6–7 sentte ja haddi lahkonage jo Norgga hattiid.

Suomas galgá leat badjel vihtta sente hálbbit boaldinávnnas vai norgalaččat boađášedje Supmii táŋket

Justa dál Njuorggámis lea doaimmas dušše okta bensenstašuvdna, man oamasta Ari Naapanki.

Son jáhkká, ahte norgalaččat bohtet goittotge maiddái boahttevuođas Supmii táŋket biilla.

– Gal mun jáhkán sii bohtet. Jáhkán, ahte Norggasge lea deaddu loktet hattiid.

SEO
Njuorggámis lea dál doaimmas dušše okta bensinstašuvdna. Boaldámušhattiid almmuhit Norgga ruvdnun. Govva: Sáárá Seipiharju / Yle

Naapanki muitala, ahte 90 proseantta olbmuin, geat fidnet táŋkemin stašuvnnas, leat norgalaččat. Su árvalusa mielde Suomas galgá leat viđas logi sentii hálbbit boaldinávnnas, vai norgalaččat bohttet Supmii táŋket.

Maid don jurddašat das, ahte hattit divrot?

– Iihan dat bensenstašuvnnaide váikkut, baicce áššehasaid.

Arto Aurala kaupassaan, joka hiljeni tyystin Norjan ja Suomen välisen rajan mentyä kiinni.
Gávpejas Arto Aurala jáhkká, ahte norgalaččat eai dieđe boaldámušhatti divrumis Suomas. Govva: Vesa Toppari / Yle

Rádjegávpejas Arto Aurala ii jáhke, ahte hattiid divrun váikkuha moge rádjegávpái.

– Norgalaččat bohtet deike varas bierggu ja Alko dihte. In jáhke dat váikkuha.

Sii leat maiddái gávppi šiljus vuovdán bensiinna, muhto koronavirusa dihte sii gárte bissehit doaimma veháš áigái.

– Livčče ferten bidjat ođđa pumppa, muhto koronadili dihte dan sáhttá bidjat easkka čakčat.

Aurala jáhkká, ahte norgalaččat eai dieđe Suoma boaldámušhattiid divrumis.

– In jáhke, ahte sii dihtet vel, muhto ammason dasto, go medias hállagohtet ášši birra.

Son ii imaštala, ahte hattiid divrot.

– Gal dat lei vuordimis, ahte korona maŋŋá geavvá ná.

Kaamasen kallis bensa
Gápmasis Anára gielddas vuvdojuvvo Suoma divrasamos bensiidna, muitala Ilta Sanomat. Govva: Sáárá Seipiharju / Yle

RiikaBensiinna gaskamearálaš haddi suoidnemánu loahpasDiesela gaskamearálaš haddi suoidnemánu loahpas
Suopma1,63 euro1,41 euro
Norga1,77 euro1,63 euro

Njuorggámis ii duorastaga deaivan gávdnot dakkár Norgga beale olmmoš, guhte livččii álgán jearahallamii. Norgalaččaiguin háleštettiin goit bođii ovdan, ahte sii eai diehtán, ahte Suoma boaldámušhattit divrot lávvordaga. Muhtumat eai orron oba berošteamen áššis.

Okta norgalaš logai, ahte son ii áiggo šat fitnat Suoma bealde táŋkemin divruma maŋŋá, danin go Norgga bealde son oažžu bonusiid go fitná táŋkemin. Dát norgalaččat eai háliidan muitalit iežaset nama ášši várás.

Tanabru
Deanus bensiinna haddi lei duorastaga 16,31 ruvnnu nappo 1,49 euro ja dieselis galggai máksit 15,21 ruvnnu nappo 1,39 euro. Govva: Sáárá Seipiharju / Yle

Báikki olmmoš Jalvvi Beahkká, Pekka Guttorm ii oro berošteamen hattiid divrumis.

– Mun lean gal dása nu hárjánan, ahte muhtumin hálbu ja muhtumin divru. Geavahan nu unnán bensiinna, ahte ii váikkut mu eallimii moge.

Guttorm muitala, ahte dálvit son lea olu Norgga bealde ja fitná doppe táŋkemin.

– Dálvit go lean Guovdageainnus, de doppehan lea olu hálbbit bensiidna go Suomas.

Varrasamosat: Sápmi

Váldoođđasat

Varrasamosat

Muualla Yle.fi:ssä