Sápmi |

Boarrásut olbmuid mielde skire lea čeahpimus dálkediehtti

Maid Sámis giđđa gulul ovdána, ja dál livčče juo somá diehtit, makkár dálkkit boahtte geasi leat vuordimis. Dál lea buoremus jearrat ášši ieš skires.

Skire fievrreda rissi Hámmárfeastas.
Skire ferte olles áiggi divodit viesus, mannenáigi lahkona ja stohpu ferte leat deahtis. Govva: NRK Sápmi

Skire dovdet buohkat. Čáhppesvilges biktasiidda čiŋadan hearrá, mas čielgi vel čuovggáhallá ruoná guvlui.

Duoddu nu olbmuid siste go earotbealde. Iige leat nu čeahppi girdit, illá de riehpu suoibu muoras nubbái. Ja go čohkána vulos, limškkuha bađoža bajás vulos. Ja dat jietna. Dan maid dovdet buohkat.

Boares olbmuid mielde skire lea čeahppi einnostit čuovvovaš geasi dálkki.

Skirebeassi Hámmárfeastas.
Hámmárfeastalaš Aslak Krokmo govve viššalit iežas ránnjáid eallima. Govva: NRK Sápmi

Aslak Krokmo goit lea vuohttán, ahte siseatnanskire lea čeahpit einnostit dálkki go mearraguovllu skire.

– Bajás go hukse skire beasi (mearragáttis), šaddá beaivvádat. Dat lea nuppe láhkái mo mii johkagátte olbmot leat gullan, ahte go vulos go hukse, de ii dárbbaš ballat dulvvis, de lea čáppá dálki. Ja juos bájas hukse de boahtá issoras arvi. Dat lea ballán, ii galgga su beassi duššat čázevuollái, muitala hámmárfeastalaš Aslak Krokmo.

Son juohke beaivvi čuovvu skiriid dálostallama iežas dálu olggobealde. Vuorččeslottithan ráhkkanit dál mannet ja danin stohpu ferte leat deahtis. Skiriin orruge leamen stuorra dárbu olles áiggi divodit iežaset viesu.

– Mu mielas orru issorasat huksen dan rohpái, mun in dieđe lea go dat bombbaid vuordimin vai lea go dan nuppi eamidiid ráhkadeamen lovtta.

Son maid viššalit govve skiriid, ja beaivvis golihitge áiggit čuovvut ránnjáid eallima Hámmárfeasttas Norgga bealde.

Goabbá diehtá buorebut?

Nils Johnsen
Bieskenjárgalaš Nils Johnsen mielas skiret leat olbmo verddet. Govva: NRK Sápmi

Nubbi eallilanolmmoš siseatnama bealde Bieskenjárggas lahka Kárášjoga liiko maid čuovvut skiriid, go son atná daid olbmo ustibin. Maid son jáhkka skire dálkeeinnostandáidduide.

– Muhtumat lávejit lohkat, jus vulos hukse de lea hui čoaska geassi dahje giđđa, jus bajás hukse de lea hui báhkka. Ja dat soaitá gal, mun dien in leat nu sihkkar gal, muhto goit dan lávejit lohkat. Dál ii oainne, go ii leat beassi dákko lahka, muitala Nils Johnsen Bieskenjárggas láhka Kárášjoga márkana.

Moson lea, goabbáson diehtá buorebut boahtte geasi dálkki, mearragátti márkanskire vai siseatnama ássi? Soaitá leat, ahte suttes mearra dat sehkke skireriebuge rehkegiid.

– Mu mielas orru, nugo dan dálkki ektui, ahte mearraskire ii dieđe dies maidege, boahtá go arvegeassi vai goikegeassi.

Dál ii eará go ohcat skirebeasi. Dan lea oalle álki dovdat, dat sáhttá leat issoras stuorra rissespábba ja oidno juo guhkás.

Márkanskire Hámmárfeastas.
Márkanskire Hámmárfeasttas ja su viessu. Lámppá alde lea vuogas várdát. Govva: NRK Sápmi

Varrasamosat: Sápmi

Váldoođđasat

Varrasamosat

Muualla Yle.fi:ssä