Sápmi |

Boastta streaikka ii livčče váikkuhan sámediggeválggaid doaimmaheapmái

Sámediggeválggaid doaimmaheapmi lea álgán mánnodaga.

Postin Ohjauskeskuksen johtaja Jarmo Ainasoja.
Jarmo Ainasoja mielde boasta áigu sihkkarastit, ahte streaika ii váikkut sámediggeválggaid doaimmaheapmái. Govva: Posti

Sámediggeválggat doaimmahuvvojit 2.9–30.9. Dán jagi sámediggeválggain sáhttá jienastit boastta bokte dahje doaimmahemiin válgaáššegirjjiid válgalávdegotti doaimmahahkii.

Válgalávdegotti ságadoalli Janne Näkkäläjärvi muitala, ahte buot jietnavuoigadahtton olbmuide leat sádden válggaáššebáhpáriid mánnodaga 2.9.2019 boastta mielde. Válgaáššebáhbáriid sáddejit čálihuvvon sáttan. Guldal Janne Näkkäläjärvi jearahallama mánnodaga 2.9.2019 Dearvva!-sáddagis.

Álgovahkus lei jođus boastta streaikka, mii álggii mánnodaga ja bistá gaskavahku rádjái. Boastta almmuhusa mielde streaika livččii njoazidan eandalii breavaid johtima. Boastta streaika goittotge nogai maŋŋebárgga eahkedis go Boasta- ja logistihka suorggi uniovdna PAU gaskkalduhtii streaikka.

Boastta stivrenguovddáža hoavda Jarmo Ainasoja muitala Yle Sápmái, ahte streaikkas ii livčče galgan leat váikkuhus sámediggeválggaid doaimmaheapmái dasgo boasttas lei sierra plána válgaáššebáhpáriid doaimmaheami oasil. Dáinna doaibmamálliin livčče sihkkarastán dan, ahte bargoheaitagis ii livččii leamaš váikkuhus sámediggeválgga doaimmaheapmái.

– Ii dárbbaš leat fuolas. Dása leat ráhkkanan, ahte dát dehálaš dokumeanttat johtet ovddos guvlui nu mot galget, logai Ainasoja maŋŋebárgga.

Válgaáššegirjjit galget leat válgalávdegottis maŋimustá čakčamánu 30. beaivve diibmu 18.00. Eanet dieđuid jienasteamis ja áigetávvalin gávnnat dáppe.

4.9.2019 dii. 8.17 Ášši beaiváduvvon daid oasil gos muitaleimme, ahte boastta streaika lea jođus. Boasta almmuhii maŋŋebárgga eahkes, ahte streaika nohká.

Varrasamosat: Sápmi

Váldoođđasat

Varrasamosat

Muualla Yle.fi:ssä