Sápmi |

Boazodoalli ođđa reaŋga reŋgo áimmus – drone galgá geahpedit goluid ja bargonoađi

Ođđa áigge reaŋga johtá girddi, ohcá ráppiid ja čohkkesta maid ealu.

Sakari Syvänperä girddiha drone.
Nuorra boazodoalli Sakari Syvänperä hálidii oahppat ođđa ja hárjehalai dán vahkus Anára Doaivonjárggas drone girddiheami. Govva: Kaija Länsman / Yle

Anára Doaivonjárggas logemat boazodoalli gaivájit albmái, čalmmit čuvvot dárkilit ođđa reaŋgga. Parasta poroa -prošeakta ordnii dán vahkus guovttebeaivásaš skuvlejumi das, mo drone dahjege girdikámera sáhttá leat boazodollui ávkin.

Skuvlejeaddji Tarmo Aittaniemi mielas drone sáhttá leat seamma ávkkálaš go mohtorgielká dahje njealjejuvllat. Dál dušše reaŋga reŋgo áimmus, ii eatnama alde.

– Dáinna sáhttá ohcat ráppiid, govvet ja dutkat daid, muitala Aittaniemi.

Girdikámerai sáhttá maid báddet jienaid, degomat beatnaga ciellama. Go boalus deaddila, de beana ciellagoahtá ja drone leage dat višaheaddji, ii beana, dego ovdal.

Aittaniemi jáhkká eandaliige nuoraid beroštit dán veahkkeneavvus.

– Eará skuvlensajiin go leat johtán, de lea čájehuvvon, ahte dat movttiidahttá nuorat buolvva. Dát ii leat boares árbediehtu, baicce dát ođđa teknihkka buktá movtta.

Tarmo Aittaniemi.
Tarmo Aittaniemi muitalii boazodoalliide dronekámera vejolašvuođain Anára Doaivonjárggas álgovahkus. Govva: Kaija Länsman / Yle

"Dán sáhttá geavahit čohkkemis dahje ráđuid ohcamis"

Muttošjávrri bálgosa boazodoalli Jussa Seurujärvi lea boahtán kursii oahppandihte ođđa. Son máhttá jo girddihit kámera, muhto háliidii oahppat vel lasi das, mo rusttega bastá stellet riekta ja oažžut das visot ávkki.

– Dán sáhttá geavahit čohkkemis dahje ráđuid ohcamis. Gal mun lean dákkárin hárjehallan, muhto dássážii in leat vel ožžon das nu stuorra ávkki, muitala Seurujärvi .

Jussa Seurujärvi
Muttošjávrri bálgosa boazodoalli Jussa Seurujärvi lea ovdalge girddihan drone, muhto hálidii vel oahppat lasi dan geavaheamis. Govva: Kaija Länsman / Yle

Gálddoaivvi bálgosa nuorra boazodoalli Sakari Syvänperä lea dán ovdal oktii iskan girdikámera.

– Ohcen ovtta nulppu dainna. Ii dat gal gávdnon, bohkosa Syvänperä.

Dál son lea oahpahallan girddihit kámera ja oahppan, gos dainna ii oaččo girdit, dego mat girdigittiid lahkosis. Veahkkás reaŋgahan dat orru, muhto dárbbašago son dan?

– Oaidnit leaš dal mo dal de manná. Oainnángo, ahte dasa lea nu dárbu ahte fertešii oastit dan, smiehtada Syvänperä.

Čuovvovaš droneskuvlejumit ordnejuvvojit 22.–23.5. Lappi skuvlenguovddáš REDU:s Soađegilis ja 3.–4.6. Sammun tupas Levis.

SOG lea ođasmahttimin boazodoallooahpuidis

Dán áigge boazodoalli ferte hálddašit boazodoalu lassin olu teknihkalaš rusttegiid. Dan áigu Sámi oahpahusguovddáš váldit vuhtii boahttevuođas, muitala boazodoallolinjjá oahpaheaddji Outi Jääskö.

– Mii leat dál ođasmahttimin dutkosa, ja plánen dasa olles dutkosa oasi teknihkalaš veahkkeneavvuid ja ođđa áppaid geavaheamis.

– Maiddái dábálaš telefovnna sisa bohtet nu olu earálágan doaimmat, maid dainna sáhttá bargat, ahte datge lea oahpahallanveara. Ja daid ferte vel oahpahallat, rávve Jääskö.

Outi Jääskö
Sámi oahpahusguovddáža boazodoallolinjjá oahpaheaddji Outi Jääskö ávžžuha boazodoalliid oahpahallat ođđa digitála veahkkeneavvuid, vaikko árbediehtu leage su mielas ain dehálamos. Govva: Kaija Länsman / Yle

Ovdamearkka dihte návdegoddin bohccuid galgá almmuhit dál telefovnna bokte ja investerenohcamušaidge dahkat dihto dihtorprográmma bokte.

– Dat bohtet lasi olles áigge, muhto árbevirolaš diehtu lea ain dehálamos, Jääskö jurddaša.

Varrasamosat: Sápmi

Váldoođđasat

Varrasamosat

Muualla Yle.fi:ssä