Sápmi |

Boazodoalli sáhttá boahttevuođas doalvut šiljus njuvvojuvvon bohccobierggu njuolga oastái? – "Gávppiide ja restoráŋŋaide galggašii ain vuovdit dušše dárkkistuvvon bierggu"

Suoma láhkii árvalit nuppástusaid bohccobierggu njuolggovuovdima oasil.

Bálgosiid ovttastusa doaimmajođiheaddji Anne Ollila lea mielde Suoma alimus boazologuid guorahalli bargojoavkkus.
Bálgosiid ovttastusa doaimmajođiheaddji Anne Ollila goit jáhkká, ahte boazoealáhus ferte boahttevuođas ságastallat maiddái njuolggovuovdima viiddideamis. Govva: Vesa Toppari / Yle

Boazodoalli sáhttá doalvut boahttevuođas ovdamearkka dihte šiljus njuvvojuvvon bohccobierggu njuolgga oastái, jos Suoma láhka rievdaduvvo dego dál lea árvaluvvon.

Dán dilis boazodoalli oažžu Suomas vuovdit ovddosguvlui bierggu dušše dan báikkis, gos dat lea njuvvojuvvon dahje joatkkaválbmejuvvon.

Láhkii leat árvalan rievdadusaid dakkár bohccobierggu njuolggovuovdimii, man eallidoavttir ii leat dárkkistan, ja man dáhpáhusas boazu lea njuvvon eará sajis go njuovahagas. Láhkarievdadusa oktavuođas áiggošedje maiddái meroštallat, man olu boazodoalli oažžu jagis vuovdit dakkár bierggu, man eallidoavttir ii leat dárkkistan.

Láhkaásahusa rievdadus guoskkašii maiddái goikebierggu vuovdima. Boazodoalli galggašii goit dás duohkoge almmuhit gieldda biepmobearráigehččui, jus vuovdá bierggu, mii ii leat njuvvojuvvon njuovahagas ja man eallidoavttir ii leat dárkkistan.

Láhkaásahusa ferte rievdadit vuoi Suoma láhka čuovvu EU lágaid.

BO stivra: Dárkkiskeahtes bierggu kvalitehta ii basttášii kontrolleret

Ášši oktavuođas lea leamašan maiddái sáhka das, sáhtášiigo dárkkiskeahtes bierggu vuovdit njuolga gávppiide dahje restoráŋŋaide.

Eana- ja meahccedoalloministeriija biebmodorvvolašvuođahoavda Sebastian Hielm lea vel várrugas dáinna áššiin.

– Iežan oaivil lea, ahte gávppiide ja restoráŋŋaide sáhtášii ain vuovdit dušše dárkkistuvvon bierggu.

Sebastian Hielm
Eana- ja meahccedoalloministeriija biebmodorvvolašvuođahoavda Sebastian Hielm lea vel várrugas dárkkiskeahtes bohccobierggu vuovdimiin. Govva: Karoliina Simoinen / Yle

Maiddai bálgosiid ovttastusa stivrras leat ságastallan, sáhtášiigo dárkkiskeahtes bierggu vuovdit njuolga restoráŋŋaide ja gávppiide.

Stivra goit smiehttai, ahte sii eai guottit, ahte šiljus njuvvojuvvon bierggu oaččošii vuovdit ovdamearkka dihte restoráŋŋaide. Bierggu kvalitehta čuovvun ii leat vejolaš, go eallidoavttir ii leat dárkkistan dan.

Bálgosiid ovttastusa stivra muittuha, ahte Suomas leat 40 fitnodaga, mat joatkkaválbmejit bohccobierggu ja boazodoalloguovllus leat 17 njuovahaga. Dáidda boazodoallit leat bidjan ruđa miljovnnaid ovddas ja danne lea eahpevuoiggalaš álggahit ođđa vuogi vuovdit bierggu.

– Njuolggovuovdima vejolašvuođaid viiddideapmi sáhttá leat áigeguovdil maŋŋá ja ealáhus ferte ságastallat áššis boahttevuođas, muhto dál ferte vuos dáhkat viidásut analysa, muitala doaimmajođiheaddji Anne Ollila stivrra linnjemiid birra.

Láhkanuppástusa hálidit fápmui jo juovlamánus

Eana- ja meahccedoalloministeriija lea jo jearran ášši birra earret eará Lappi guovlohálddahusas, Bálgosiid ovttastumis ja Sámedikkis. Eana- ja meahccedoalloministeriijas muitalit, ahte sii ráđđádallet áššis Sámedikkiin 7.10.2019.

Láhkanuppástus boahtá cealkinláhkai jođáneamos lági mielde, go dan háliidit oažžut fápmui jo 14.12.2019.

Varrasamosat: Sápmi

Váldoođđasat

Varrasamosat

Muualla Yle.fi:ssä