Sápmi |

Boazodoalliin leat sierralágan jurdagat das, mo boazodoarjagiid galggašii ođasmahttit – njuovvandoarjja juohká oaiviliid

Birasdoarjaga lassin ságain jorrá EU-doarjaga rievdadeapmi njuovvandoarjjan. Áššis ságastalle duorastaga Boazoparlameanttas.

Gurutrávddas Tuomas Semenoff, Niila Laiti ja Jarmo Haataja.
Semenoff ja Laiti mielas njuovvandoarjja livčče buorre, Haataja mielas fas ii. Govva: Vesa Toppari / Yle Sápmi

Roavenjárggas Boazoparlameanttas badjeolbmuide bukte diehtun, ahte Suomas leat ođasmahttimin boazodoalu doarjjaortnega. Eana ja meahccedoalloministeriija kansliijahoavda Jaana Husu-Kallio sávvá, ahte ealáhus vihkkehalašii, makkár doarjja livčče buorre.

– Ieš sávan, ahte dása boađášii ođđalágan doarjjaortnet, juogo birasdoarjja dahje birasbuhtadus, mii guoskkašii namalassii guohtuneatnamiid dikšuma, dajai Husu-Kallio.

Paliskunnat, poronhoito, Jukka Knuuti
Bálgosiid ovttastumi ságajođiheaddji Jukka Knuuti lea duđavaš ráđđehusprográmma čuoggáide. Sidjiide ii leat vel áibbas čielggas mo doarjjaortnet boahtá rievdat. Govva: Vesa Toppari / Yle

Ođđa doarjjahápmin ovdanbukte juogo birasdoarjaga dahje birasbuhtadusa.

– Dajašin ovdamearkan, ahte jus bálggus doallá boazomeari stuorámus lobálaš boazologu vuolábealde, de dat sáhtášii leat okta vuohki lahkonit dán birasbuhtadusa, árvala Bálgosiid ovttastusa ságadoalli Jukka Knuuti.

Knuuti muittuha, ahte rievdadusat váldet áiggi eaige nuppástusat geargga dán jahkái.

Boazodoallit oidnet vejolaš birasbuhtadusas buorre beliid

Bátneduoddara bálgosa boazoisit Jarmo Haataja mielas sin bálgosii livčče birasbuhtadus issoras buorre.

– Birasbuhtadus livčče midjiide buorre, mis lea leamašan boazolohku máŋga jagi vuollin dan dihte go spiret goddet bohccuid nu olu, vuođušta Haataja.

Jarmo Haataja lea bátneduoddara bálgosa boazoisit.
Bátneduoddara bálgosa boazoisit Jarmo Haataja liiko birasbuhtadus jurdagii muhto ii rievdadivčče eallibohccodoarjaga njuovvandoarjjan. Govva: Vesa Toppari / Yle

Husu-Kallio muittuhii boazodoalliid, ahte guohtuneatnamat galget bissut buorre ortnegis.

Seamma oaivilis lea Váhčira boazoisit Tuomas Semenoff. Son maid guottiha birasbuhtadusa.

– Dat buoridivčče guohtuneatnamiid dili, jus bálgosat doalašedje boazologu vuolábealde dan stuorámus lobálaš meari, dadjá Semenoff.

Gálddoaivvi bálgosa várreboazoisit Niila Laiti lea fas várrugas dainna jurdagiin, ahte boazologuid doalašedje vuollin buhtadusa dihte.

– Dalle geahppána bohccobierggu buvttadeapmi, čalmmustahttá Laiti.

Niila Laiti lea Gálddoaivvi bálgosa várreboazoisit.
Gálddoaivvi bálgosa várreboazoisit Niila Laiti oaivvilda, ahte bierggu buvttadeapmi lea boazodoalu ulbmil ja dat galggašii leat doarjagiid vuolggasadji. Govva: Vesa Toppari / Yle

Eallibohccodoarjaga rievdadeapmi njuovvandoarjjan juohká oaiviliid –Bátneduoddarii dat livčče fuotni

Beavdeságain jorai maid dálá EU-doarjaga , dahjege eallibohccodoarjaga rievdadeapmi, nappo eallibohccuin máksojuvvon doarjaga nuppástuhttin njuovvandoarjjan.

Dál doarjaga mákset eallibohccuid logu mielde. Doarjaga oažžu, jus bearrašis leat badjel 80 ealli bohcco. Doarjja lea 28,5 euro ovtta bohccos. Dáláš ortnet leamašan ánus gitta dan rájes go Suopma searvvai Eu:i

Bátneduoddara boazoisit Jarmo Haataja ii liiko jus doarjja rievdá dakkárin, mas máksojuvvošii dan mielde man olu njuovvá.

– Min bálgosa miesseproseanta lea 40-50%. Midjiide njuovvandoarjja livčče fuotni, dadjá Haataja.

Gálddoaivvi várreboazoisit Niila Laiti mielas dáláš eallibohccodoarjja botnjá boazodoalu unohas guvlui.

– Mun oainnášin, ahte boazodoalu ulbmil lea buvttadit bohccobierggu, borramuša olbmuide, iige doallat bohccuid dušše dan dihte, ahte bohccot leat.

Doarjjaortnega nuppástuhttin livčče Laiti mielas buorre.

– Dalle dat duvddašii ealáhusa dan guvlui, ahte badjeolmmoš buvttada ja gávppaša bierggu ja das boahtá dienas, vuođušta Laiti.

Tuomas Semenoff.
Váhčira bálgosa boazoisit Tuomas Semenoff mielas njuovvandoarjja livčče buorre, dalle ealutge bisošedje buorre ortnegis. Govva: Vesa Toppari / Yle

Váhčira bálgosa boazoisit Tuomas Semenoff mielas dál gal lea jo áigi ođasmahttit doarjjaortnega.

– Mađi eanet njuovat, dađi eanet galggašii máksit doarjaga. Dat movttiidivčče doallat ealu buorre ortnegis. Dálá doarjja baicce movttiidahttá guođđit eallit bohccuid, čilge Semenoff.

Ministeriija livčče gearggus nuppástuhttit eallibohccodoarjaga njuovvandoarjjan, muhto bálgosiid ovttastusa stivra ii, muitala Knuuti.

– Njuovvandoarjagis leat háleštan Bálgosiid ovttastusa stivrras. Ministeriija lea gárvvis rievdadit doarjaga, muhto boazodoalu ovddasteaddjit varra eai leat. Diet lea ášši mas ferte ságastallat boahttevuođas, muitala Knuuti.

Varrasamosat: Sápmi

Váldoođđasat

Varrasamosat

Muualla Yle.fi:ssä