Sápmi |

Boazodoallit čuvvot gealdagasas makkár guopparjahki šaddá – váikkuhusat bohccuide leat stuorát

Vai boazu fidne buoiddi, galggašii dat beassat borrat guobbariid.

Sieniä kauniissa valossa
Govva: Marko Iloniemi

Guoppar lea bohccuid buoidumii dehálaš ja danin boazodoallit čuvvotge gealdagasas, makkár guopparjahki šaddá. Virggálaš diehtu ii oro gávdnomin, go ovdamearkka dihte Luondduriggodatguovddáš Lukes eai leat šat guopparstatistihkat.

Mannan jahki lei guobbariid dáfus bohccuide heittot.

– Eai lean guobbarat ollenge. Go bigálusat álge, de fuomášii, ahte bohccot ledje hirbmat ruoidnasat, muitala Muttošjávrri boazoisit Osmo Seurujärvi.

Seammalágán muittut leat Neakkela guovllus. Neakkela bálgosa boazoisit Hannu Ranta dadjá, ahte bohccot ledje heajos ortnegis.

Dán jagis vel ii máhte olus dadjat, dán rádjai orrot oalle unnán leamen guobbarat.

Galgá leat lávttas ja liekkas, vai guobbarat šaddet

Lappi guopparsearvvi várreságadoalli Outi Palmen lohká, ahte guopparšattu lea váttis einnostit dán muttus jagi, muhto dilli orru goittotge áibba buorre.

– Aŋkke Roavenjárgga guovllus earret eará ovtta dihto šlája gusaguobbariid šaddu orru earenoamáš buorre ja dat lea hárvenaš árrat. Davimus Suoma oasil in máhte dadjat, Palmen dadjá.

Su mielde dat, go lea arván ja lea oalle njuoskkas, de dilli livčče vuogas maid guobbariidda. Palmena mielde guobbariid šaddamii váikkuhit dálkkit, lieggagráđat ja lávttas, iige dušše dán geasi baicce maid ovddit geasi.

– Galgá leat doarvái lávttas, muhto maid liekkas. Guobbarat eai loavtte galbmasis. Jus buollášat bohtet árrat, de gal dat duššada stuorámus oasi guobbariin, muitala Palmen.

Guoppar lea bohcco veadjimii vealtameahttun

Vai boazu birge bures, dat dárbbaša guobbara, muitaleaba Osmo Seurujärvi ja Hanna Ranta.

– Guoppar lea dehálaš bohccui. Dashan dat buoidi boahtá, de dat birge bures dálvvi. Ja dieđusge lea lossadut jus vuovdá, čilge Seurujärvi.

Ranta vuordá maid buori guopparšattu namalassii buoiddi dihte.

– Mannan jahki lei dihtoláhkái hui ártet guobbariid oasil, lohká son.

Varrasamosat: Sápmi

Váldoođđasat

Varrasamosat

Muualla Yle.fi:ssä