Sápmi |

Boazodoallit sáhttet dál ohcat buhtadusaid goavvejagi boazovahágiin – golbma sámebálgosa eai goit beasa ohcat vahátruđaid ollenge

Buhtadusaid sáhttá ohcat borgemánu 16. beaivve rádjái. Sámebálgosiin Báišduottar, Giehtaruohtas ja Neakkel bálgosat gahččet eret vahátruđaid ohcamis beare alla boazologuid geažil.

poro
Boazodoallit ohcet buhtadusaid biebmogoddin ja biebmogottis fertejit leamašan ovdal boazovahágiid unnimustá 50 lohkobohcco. Govva: Vesa Toppari / Yle

Boazodoallit sáhttet dál ohcat buhtadusaid jagi 2019–2020 goavvejagi dagahan boazovahágiin. Biebmolágádus ja Lappi EJB-guovddáš leat rahpan ohcama dán vahku álggus.

Buhtadusaid sáhttá ohcat 16.8.2021 rádjái Biebmolágádusa Hyrrä-bálvalusas dahje báberskoviin, man galgá máhcahit Lappi EJB-guovddážii. Buot ohcamušat gieđahallojuvvojit Lappi EJB-guovddážis.

Biebmolágádusa bajit dárkkisteaddji Eveliina Viitanen sávvá, ahte boazodoallit ozašedje buhtadusaid elektrovnnalaččat, vai ohcan ovdánivččii beaktileappot. Ohcamis lágidit maiddái neahttaskuvlejumi ihttin gaskavahkko geassemánu 16. beaivve.

– Skuvlejupmi boahtá gal oalle jođánis áigetávvaliin, muhto sávvamis nu máŋgasat go vejolaš besset searvat, dadjá Viitanen.

Ovdal go buhtadusain sáhttet mearridit ja ruđaid máksit, de ferte vuos vuordit, ahte buot ohcamušat lea joavdan EJB-guovddážii.

– Buhtadusaide lea biddjon 6 miljovnna mearreruhta ja dat ii soaitte leat doarvái buhtadit buot ohcamušaid. Danin mearrádusaid dahket easka dan maŋŋel, go oaidnit man olu ohcamušat bohtet, čilge Viitanen.

Badjellohku caggá bálgosiid oažžumis buhtadusaid

Boazodoallojagis 2019–2020 davimus Suomas lei earenomáš olu muohta ja dat dagahii stuorra vahágiid boazoealáhussii. Dál lea vuosttaš geardi, go stáhtaráđđi gávnnaha vahágiid dakkárin, ahte daid sáhttá boazovahátlága mielde buhtadit.

Boazodoallit ohcet buhtadusaid biebmogoddin ja biebmogottis fertejit leamašan ovdal boazovahágiid unnimustá 50 lohkobohcco.

Dakkár bálgosa boazodoallit, main leamašan badjellohku juo guhkkit áigge, eai goit beasa ohcat buhtadusaid. Lappi EJB-guovddáža mielde Báišduottar, Giehtaruohtas, Neakkel ja Kolari bálgosat gahččet eret vahátruđaid ohcamis.

Stáhtaráđi ásahussii lea merkejuvvon, ahte alla boazologut loktet guohtumiid ja dan geažil ii leat vejolaš buhtadit vahágiid, maid bálggus lea iežas doaimmaiguin dagahan.

Neakkela bálgosa boazoisit ávžžuha goittot ohcat

Vaikko Biebmolágádusa ja Lappi EJB-guovddáža dieđáhusas čuožžu, ahte Giehtaruohttasa ja Neakkela bálgosat eai sáhte ohcat buhtadusaid, de Neakkela bálgosa boazoisit Hannu Ranta goit ávžžuha boazodolliid guođđit vahátohcamušaid.

– Ávžžuhan Eanodaga mearkabiire bálgosiid ohcat buhtadusaid, jus leat vahágat. Jus ohcamuš hilgojuvvo, de dasto sáhttá dahkat njulgengáibádusa ja doppe oažžu de mearrádusa, mas sáhttá váidit, čilge Ranta.

Ranta ii njiela čilgehusaid das, ahte badjellohku lea hedjonahttán guohtumiin.

– Dát lea ártegis dilli. Ii badjellohku gal leat dagahan boazovahágiid, go Neakkela bálgosishan ođđaseamos dutkamuša mielde leat guohtumat buorránan. Dás gal geahččalit dikšut áššiid, vaikko eai oba dovddage boazodoalu, dadjá Hannu Ranta.

Yle Sápmi ii leat fáhten Báišduoddara ja Giehtaruohttasa bálgosa ovddasteaddjiid kommenteret ášši.

Buhtadusohcamuššii ferte háhkat máŋggaid mildosiid

Boazoeaiggádat sáhttet ohcat buhtadusaid duođaštuvvon boazojámuin, dienasmassimiin, miesseproseantta njiedjamis ja lassánan biebman- ja šibitdoavttirgoluin. Stuorámus buhtadus, man okta biebmogoddi sáhttá oažžut miesseproseantta njiedjamis ja lassánan biebman- ja šibitdoavttirgoluin, lea 20 000 euro.

Buhtadusohcamuššii boazodoalli ferte laktit vahátrehkenastinmildosa, mii gávdno Biebmolágádusa neahttasiidduin. Dasa lassin boazodoalli dárbbaša dieđuid maiddái bálgosis, dego boazologuid ja maiddái loguid spiriid goddán ja vuojahallan bohccuin.

Biebmolágádusa bajit dárkkisteaddji Eveliina Viitanen muitala, ahte sii leat juo skuvlen bálgosiid.

– Go boazodoalli ohcagoahtá buhtadusaid, de iežas bálgosis gánneha jearrat veahki. Maiddái EJB-guovddáš veahkeha buncarákkis áššiiguin, dadjá Viitanen.

Dárkilut dieđuid ohcamis ja neahttaskuvlejumis gávnnat Biebmolágádusa neahttasiiddus.

Yle Ođđasiid Sámis ja Beaivvi ságaid sáhtát maid guldalit Yle Areenas.

Divvojuvvon 15.6.2021 dii 15.19. biepmogotti alimus buhtadusdási oasil.

Varrasamosat: Sápmi

Váldoođđasat

Varrasamosat

Muualla Yle.fi:ssä