Sápmi |

Boazodoallit váide Giehtaruohttasa guovlovárrema Ovttastuvvan našuvnnaid olmmošriektekomiteai

Ii ruvkkiid Suoma Giehtaruohttasii -lihkadusa dieđáhusa mielde ON olmmošvuoigatvuođakomitea lea registreren váidaga ja Suoma ráđđehusas gáibidit jođánis vástádusa áššái ovdal 10.1.2022.

Minna Näkkäläjärvi pani alulle adressin Käsivarren tuntureiden puolesta kaivostoimintaa vastaan.
Ii ruvkkiid Suoma Giehtaruohttasii -lihkadusa ovddasteaddji Minna Näkkäläjärvi muitala dieđáhusas, ahte ON olmmošriektekomiteai váidin lei áidna vuohki ohcat áššái čovdosa. Govva: Linda Tammela / Yle

Sámi boazodoallit leat váidán Giehtaruohttasa Jiehtáčerrui dahkkon guovlovárrema Ovttastuvvan našuvnnaid olmmošriektekomiteai. Áššis muitalii vuosttamužžan Gurutlihtu bellodataviisa Kansan Uutiset.

Váidagis sámi boazodoallit gáibidit heaittihit sámi boazodoalu hehttejeaddji ruvkedoaimmaid, danin go boazodoallu lea juo dálkkádatrievdama dihte áitojuvvon.

Ii ruvkkiid Suoma Giehtaruohttasii -lihkadusa dieđáhusa mielde ON olmmošvuoigatvuođakomitea lea registreren váidaga ja Suoma ráđđehusas gáibidit jođánis vástádusa áššái ovdal 10.1.2022.

Lihkadusa ovddasteaddji Minna Näkkäläjärvi muitala dieđáhusas, ahte ON olmmošriektekomiteai váidin lei áidna vuohki ohcat áššái čovdosa. Árat dán jagi alimus hálddahusriekti (AHR) ii dohkkehan váidinlohpeohcamuša Jiehtáčearu guovlovárremis. AHR hilggui maiddái Sámedikki ja Giehtaruohttasa bálgosa váidaga Leahttáseanu málbmaohcanlobis.

– Suomas sápmelaččaid rievttit eatnamii, čáziide ja árbevirolaš ealáhusaide ja daid ovddideapmái dahkkojuvvojit duššin láhkadulkomiin, mii fámohuhttá eamiálbmotrivttiid. Sámiid vuoigatvuođat eai dovddastuvvo Suomas, dadjá Näkkäläjärvi lihkadusa dieđáhusas.

Son dadjá maiddái, ahte sin váidda ii boađe leat maŋimus.

– Mii leat dál dakkár dilis, mas mii fertet geahččalit juohke riektámet riikkaidgaskasaš duopmostuolu bokte ja dat orru ártet ja dagaha bahča dovdduid, dadjá Näkkäläjärvi dieđáhusas.

Helssega gávpoga sturrosaš guovlu várrejuvvon duoddaris

Tukes mieđihii Akkerman Finland Oy:i njukčamánus 2020 guovlovárrema Giehtaruohttasa Jiehtáčearu guvlui.

Guovlovárren dárkkuha dan, ahte fitnodat sáhttá ohcat guvlui málbmaohcanlobi ovdal go guovlovárrenáigi nohká. Guovlovárremiiguin ruvkefitnodagat sáhttet caggat gilvaleaddjifitnodagaid boahtimis dihto guovlluide. Dalle gilvaleaddji fitnodagat eai beasa dahkat iežaset várremiid dáidda guovlluide eaige dahkat málbmaohcanlohpeohcamušaid.

Jiehtáčearus várrejuvvon guovlu lea seamma sturrosaš go Helssega gávpot, sullii 245 njealjehaskilomehtera. Várrejuvvon guovlu lea dehálaš eandalit boazodollui birra jagi. Guovlu lea sullii 70 proseantta olles Ergona siidda geasse- ja čakčaguođohanguovllus. Jiehtáčearu guovllus leat maiddái Natura-guovllut ja jekkiidsuodjalanguovllut.

Akkerman Finland Oy ii leat áidna, guhte lea dahkan várremiid guvlui. Tukes attii málbmaohcanlobi Geologiija dutkanguovddážii (GTK) Leahttáseanu guvlui Giehtaruohttasii suoidnemánus 2016. Guovllus leat čađahuvvon dutkanbovremat juo máŋga jagi.

Ii ruvkkiid Suoma Giehtaruohttasii -lihkadus luobahii adreassa Suoma birasministeriijai čakčamánus. Adreassas gáibiduvvo earet eará dat, ahte olles sámeguovlu ráfáidahtto buot ruvkedoaimmain ja málbmaohcamis. Adreassa čokkii oktiibuot 37 200 nama.

Maiddái nubbi adreassa, Kaivostoiminnalle rajat, čokkii nu olu namaid, ahte dat manai riikkabeivviid gieđahallamii. Adreassas gáibidit earret eará ráfáidahttit sámeguovllu ollásit ruvkedoaimmain ruvkelága ođasmahttima oktavuođas.

Ruvkelága ođasmahttimis lágiduvvui miellačájáhus otne duorastaga Helssegis.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä