Sápmi |

Boazodoallonuorat čoahkkanedje muhto sámenuorat váilo – áidna dáhpáhussii oasálastán sámenuorra váillaha davviriikalaš boazonuoraid deaivvadeami

Nuorat vierrobálgosiin -dáhpáhus ordnejuvvui Roavenjárggas gaskavahku.

Jussa Seurujärvi gullá Muttošjávrri bálgosii.
Muttošjávrri bálgosa nuorra boazodoalli Jussa Seurujärvi doalai dáhpáhusas sáhkavuoru. Son háliidivčče davviriikalaš boazonuoraid deaivvadeami. Govva: Vesa Toppari / Yle

Roavenjárggas nuorat jearahedje nubbi nuppis gažaldagaid, dego man olu geange bálgosis ožžot leat bohccot dahje ribahitgo máttimus bálgosiid boazodoallit bohccuideaset boazodoalloguovllu olggobeallái.

Boazonuorat ledje čoahkkanan gaskavahku árbevirolaš Nuorat vierrobálgosiin -dáhpáhussii Roavenjárgii.

Dáhpáhusa ulbmil lea, ahte nuorat oahpásmuvvet gaskaneaset, muitala okta ordnejeddjiin Pinja Siivola, guhte ieš gullá Oraniemi bálgosii, mii lea lahka Soađegili.

Pinja Siivola gullá Oraniemi bálgosii.
Nuoraid mielas lea maiddái unohas go sosiálamediain čállet fastes ságaid boazodoalu birra, muitala okta dáhpáhusa ordnejeaddji, Pinja Siivola Oraniemi bálgosis. Govva: Vesa Toppari / Yle

– Nuorat leat muitalan mii sin bálgosii gullo.

– Fuollan leat leamašan dálkkádatrievdan ja Jiekŋameara ruovdegeaidnu. Maiddái fasttes ságat mat jorret sosiála mediain, buktet fuola nuoraide, čilge Siivola.

Áidna dáhpáhussii oasálastán sámenuorra váillaha eará sámenuoraid – Ii dušše Suomas muhto maid Norggas, Ruoŧas ja Ruoššas

Muttošjávrri bálgosa nuorra boazodoalli Jussa Seurujärvi doalai dáhpáhusas sáhkavuoru. Son muitalii makkár lea boazodoallu sámi guovllus. Eará nuorat ledje beroštuvvan gullat Seurujärvis das, man olu Muttošjávrri bálgosis leat nuorat. Maiddái dan jerre, ahte man olu nissonat oasálastet bálgosa boazobargguide.

– Min bálgosis lea nu buorre dilli, ahte olu nuorat leat ealáhusas. Gaskaahki lea vuollái 50. Nissonat maid oasálastet boazobargguide, vástidii Seurujärvi.

Su mielas lea buorre jurdda čohkket oktii boazonuoraid muhto váillaha sámenuoraid. Son lei áidna sámenuorra guhte lei boahtán báikki ala.

– Lea somá deaivat eará boazodoallinuoraid, liikon gullat mo earáin manná.

Seurujärvis lea dat seamma sávaldat man son lea ovddidan jo vihtta jagi dassái.

– Muittán, go goasnu vihtta jagi dassái lei jo dákkár dáhpáhus. Dalle jo sávven, ahte Norggas ja Ruoŧas boađášedje nuorat fárrui. Dat ii leat velge ollašuvvan. Sávašin gal dakkára, sávvá Seurujärvi.

Nuorat vierrobálgosiin -dáhpáhus ordnejuvvui 5.6.2019.
Kiiminki-Kollaja bálgosis muitaledje, ahte sis leat beatnagat, maiguin fitnet vuojeheamen bohccuid eret bealdduin. Sis lea whatsapp-joavku man bokte gulahallet das, gii astá goasge vuolgit vuojehit bohccuid eret bealdduin. Govva: Vesa Toppari / Yle

Ealáhusa áddjáluvvan oktan fuollan

Moadde jagi dassái boazodoalliid gaskaahki lei olles boazodoalloguovllus sullii 44,5 jagi.

Oktan fuollan nuorain leige ealáhusa áddjáluvvan, dahjege dat, ahte boazodoallit leat eanaš boarrásat buolvva olbmot, muitala Akanlahti bálgosa boazoisit Antti Pätsi. Akanlahti bálggus gullá Posio, Kuusamo ja Taivalkoski gielddaide.

Antti Pätsi ja Simo Holck
Antti Pätsi Akanlahti bálgosis ja Simo Holck Alakylä bálgosis oaivvildeaba, ahte ealáhusas galggašedje leat eanet nuorat vai bálgosiin leat doarvái bargit. Govva: Kaija Länsman / Yle

– Nuoraid mearri ealáhusas sáhtášii leat stuorátge. Min bálgosis leat boarrásut buolvva boazodoallit eanet go nuorat.

– Nuorat leat fuobmán, ahte dietnasa oažžu eará sajis álkit go boazodoalus, dadjá Pätsi.

Simo Holck gullá Alakylä bálgosii, mii lea Gihttelis. Son oaivvilda, ahte nuorat dárbbašuvvojit ealáhusas vai bálgosis leat doarvái bargit.

– Jus min bálgosii eai boađe lasi nuorat, dalle dat lea váttisvuohta. Boarrásiin lea goit diehtu ja dáidu, muhto duohtavuohta lea, ahte boarrásat buolvva badjeolbmot eai bastte seammá láhkai šat bargat go nuorat.

– Jus stuorra ealut leat beare boarrásiin, de nuorabuin lea váttis cegget ealu ja birget ealáhusas, čilge Holck.

Varrasamosat: Sápmi

Váldoođđasat

Varrasamosat

Muualla Yle.fi:ssä