Sápmi |

Boazodoalu doarjjaortnet lea ođasmuvvamin – Okta vejolašvuohta lea birasdoarjja dahje birasbuhtadus

Áššis šattai sáhka duorastaga badjeolbmuid jahkásaš Boazoparlameanttas Roavenjárggas.

Eana- ja meahccedoalloministeriija kansliijahoavda Jaana Husu-Kallio.
Eana- ja meahccedoalloministeriija kansliijahoavda Jaana Husu-Kallio doalai sáhkavuoru Boazoparlameanttas. Govva: Vesa Toppari / Yle

Ođđa ráđđehusa áigumušat ja ráđđehusprográmmii čállojuvvon čuoggát šadde sáhkan maiddái boazodoalliid gaskkas.

Boazoparlameanttas duorastaga sáhkavuoru doallán eana- ja meahccedoalloministeriija kansliijahoavda Jaana Husu-Kallio buvttiige Suoma boazodoalliide dearvvuođaid ođđa ráđđehusprográmma sisdoalus.

Ráđđehusprográmmas leat máŋggat čuoggát, mat gusket boazodoalu. Okta čuokkis guoská doarjjaortnega ođasmahttima. Dat boahtá maid dáhpáhuvvat, lohpidii Husu-Kallio Boazoparlameantta čuovvuide.

– Ráđđehusprográmma addá buorre vuođu geahččat dálá doarjjaortnega rabas mielain. Smiehttat ovdamearkan dan, leago birasgažaldagaid vejolaš váldit vuhtii buorebut, čilgii Husu-Kallio.

– Ieš sávan, ahte dása boađášii ođđalágan doarjjaortnet, juogo birasdoarjja dahje birasbuhtadus, mii guoskkašii namalassii guohtuneatnamiid dikšuma.

Husu-Kallio deattuhii sáhkavuorustis, ahte boahttevuođas guohtuneatnamat fertejit leat buorre ortnegis. Guohtuneatnamiid dikšunplánaid bukte ovdan maiddái varas guohtuneatnamiid dilis dahkkojuvvon dutkamušas.

“Dál ealáhus ferte smiehttat, mo daid euroid juohká”

Eana- ja meahccedoalloministeriija kansliijahoavda Jaana Husu-Kallio buvttii ovdan sáhkavuorustis maiddái dan, ahte boazodoallu ferte maid ieš guorahallat dárkilit, mii livčče buoremus vuohki ođasmahttit doarjjaortnega. Dálá doarjjaortnet leamaš fámus máŋgalogi jagi nappo dan rájes go Suopma lea searvan Eurohpá uniovdnii.

Sáhttágo eallibohccuid mielde máksojuvvon doarjja rievdat doarjjan, man mákset ovdamearkka dihte dan mielde man olu njuvvet?

– Dál ealáhus ferte smiehttat, mo daid doarjjaeuroid juohká, dadjá Husu-Kallio.

Dál boazodoalus mákset EU doarjaga boazoeaiggádii dan mielde, man ollu leat bohccot. EU doarjja máksojuvvo jus badjeolbmos dahje bearrašis leat logus unnimustá 80 bohcco. Ovtta bohcco ala badjeolmmoš oažžu 28,50 euro.

Knuuti: Alimus boazologu vuolábealde bissun sáhttá leat okta vuohki lahkonit birasdoarjaga

Bálgosiid ovttastumi ságajođiheaddji Jukka Knuuti lea duđavaš ráđđehusprográmma čuoggáide. Bálgosiid oaivámužžii ii leat velá dán muttus čielggas, mo doarjjaortnet boahtá boahtte áiggis nuppástuvvat.

– Mii háleštit ministeriijain doarjjaortnega birra. Rievdadusat eai geargga dán jahkái, muhto mii geahččatge boahtteáigái, dadjá Knuuti.

Birasdoarjja dahje birasbuhtadus bohciidahttá goit muhtin jurdagiid Jukka Knuutii.

– Sihkkarit dat manná nu, ahte sáhttágo bálggus oažžut birasbuhtadusa iežas doaimmaid vuođul.

– Dajašin ovdamearkan, ahte jus bálggus doalašii iežas boazomeari stuorámus lobálaš boazologu vuolábealde, de dat sáhtášii leat okta vuohki lahkonit birasbuhtadusa, árvala Knuuti.

Suomas leage dál jođus bargu, mas galget čielggadit ja mearridit man olu guđege bálgosis ožžot leat bohccot čuovvovaš logi jagi áigge.

Varrasamosat: Sápmi

Váldoođđasat

Varrasamosat

Muualla Yle.fi:ssä