Sápmi |

Boazodoalu heahtedoarjagiid ohcan barggaha bálgosiid – Ohcanáigi nohká borgemánu beallemuttus

Sállevári ja Lappi bálgosis áigot oalle láhkai buohkat, geain lea vejolašvuohta, ohcat heahtedoarjaga.

Antti Äärelä
Antti Äärelä deavdá heahtedoarjaga ohcanskoviid iluin, vaikke dat barggahage badjelmearálaš barggu. Govva: Maiju Saijets / Yle

Máŋggain sámebálgosiin leat dál vuosttas geardde ohcamin boazodoalu heahtedoarjaga goavvejagi 2019–2020 dagahan vahágiid dihte. Heahtedoarjaga ohcanáigi nohká borgemánu 16. beaivve.

Lappi bálgosa boazoisit Antti Äärelä ja Sállevári boazoisit Iisko-Henrik Näkkäläjärvi mielde doarjagiid ohcan lea dagahan lassibargguid ja ohcanskovit soitet leat moalkát, muhto daid deavdin gánneha.

– Oluhan dat barggaha, muhto gal dan gánneha bargat. Eandaliige dat skovvi, masa ferte rehkenastit vahágiid, soaitá orrut vehá ártet, muitala Äärelä.

Sálleváris fas leat geargan jo geassemánus deavdit ohcanskoviid.

Heahtedoarjaga oažžuma čielggadeapmi ádjánii – "Dál gal manai jo ilá guhká"

Dákkár doarjja ii leat mieđihuvvon goassige ovdal. Boazodoallolága mielde doarjaga fidne, jus guovllus lea dáhpáhuvvan luonddubárti dahje eará vahágat. Luonddubárttiin ja eará vahágiin dárkkuhit dálkkiid ja eará luonddu fenomenaid, mat váttásmahttet bohcco guohtuma ja dagahit lassegoluid ovdamearkka dihte bohccuid biebmama dihte, dagahit boazojámuid dahje váttásmahttet muđui bohcco ceavzima meahcis.

Bálgosiid ovttastus bivddii guovvamánus 2020 eanan- ja meahccedoalloministeriija čielggadit, ahte devddiigo diet dálvi heahtedoarjaga gáibádusaid. LUKE čielggadii ášši ja gávnnahii, ahte ágga heahtedoarjagii gávdno muhto dan maŋŋá mearrádusa dahkan heahtedoarjagis ádjánii vel stáhta bábermillus.

Antti Äärelä mielas válmmaštallan ádjánii jo masá menddo guhká.

– Oalle guhkki lei gal dat válmmaštallanáigi, lea váttis go dat lea beannot jagi maŋŋonan, lohká Äärelä.

Iisko Henrik Näkkäläjärvi
Iisko-Henrik Näkkäläjärvi sávvá, ahte stáhtas máhtášedje boahttevuođas ráhkkanit dakkár heahtediliid váras. Govva: Ville-Riiko Fofonoff / Yle

Iisko-Henrik Näkkäläjärvi árvala, ahte boahttevuođas máhttet ráhkkanit dakkár dillái buorebut.

– Jáhkán dat várrejit juogalágan ruđa nu, ahte go dat duođalaš heahti boahtá, de oažžu olu johtileappot. Dál gal manai jo ilá guhká čielggadit mot dat besset máksit daid. Lihkus beasaimet dál goit ohcat dan, šuohkiha Näkkäläjärvi.

Heahtedoarjagiin fas álgui

LUKE raporta mielde sullii 15 000 bohcco jápme guohtun- ja luonddudili olles boazodoalloguovllus goavvejagi.

Sihke Sálleváris ja maiddái Lappi bálgosis leat buohkat, geain lea vejolašvuohta oažžut heahtedoarjaga, ohcan heahtedoarjaga dahje áigot ohcat dan.

Soai guktot oaivvildeaba, ahte heahtedoarjja ii buhtat visot maid leat massán, muhto dat lea buorre álgu goit.

– Dasa lea stuorra dárbu, iihan dat dieđusge buhtat visot muhto oasi goit ja beassá fas álgui, muitala Äärelä.

– Dat ii vástit dan maid olbmot leat manahan dalle. Dat 6 miljovnna lea unna ruhta, ii das leat go oassi dain, joatká Näkkäläjärvi.

Varrasamosat: Sápmi

Váldoođđasat

Varrasamosat

Muualla Yle.fi:ssä