Sápmi |

Boazoluntta guovttos studeriiga boazodoallin, vai sáhttiba joatkit boazodoalus – "In máhte govahallat, ahte barggašin juoidá eará"

Harri Aslak Jomppanen ja Toni Salminen gearggaiga Sámi oahpahusguovddáža boazodoallooahpuin dán giđa. Erenoamážit EU-doarjagat giktaledje gazzagoahtit oahpuid.

Sámi oahpahusguovddáža boazolinnjás giđđat 2018 válmmaštuvvan oahppit.
Buot giđđat 2018 boazodoallolinnjás gárvvásmuvvan oahppit. Govas leat Toni Salminen, Nikolai Magga, Jonne Lantto, Harri Aslak Jomppanen, Anne Karhu-Angeli, Vilma Kauppinen ja Antti Lantto. Govva: Ulla Isotalo / Sámi oahpahusguovddáš

Sámi oahpahusguovddáža (SOG) luonddu- ja birassuorggi vuođđodutkkus lea earenomáš ávkkálaš boazodoallin háliideaddji nuoraide. Skuvlejupmi válbme nuoraid boazobargguide ja luonddus doaibmamii. Dasa lassin skuvllas oahpahuvvojit vuođđoávdnasat, dego matematihkka ja eatnigiella.

Dat eai goittot leat áidna sivat, manin nuorat vázzet skuvlla.

EU-doarjagiin beassá bures álgui, muhto vuos galgá leat máhttu

Harri Aslak Jomppanen ja Toni Salminen gárvvásmuvaiga bádjeolmmožin Sámi oahpahusguovddážis geassemánu álggus. Goabbatge ledje duđavaččat skuvlii ja namuheaba, ahte EU-doarjagat ledje dehálaš sivva, manin soai vulggiiga vázzit dan skuvlla.

– Mun mannen dohko danin go in mun iešalddes máhte govahallat, ahte barggašin juoidá eará, go boazobargguid. Áibbas somás skuvla. Lea buorre, go dat lea unna skuvla, nu buohkat dovdet nuppiideaset, Jomppanen dadjá.

Doarjja duođainge lea stuorra veahkkin buohkaide, geat leat bádjeolmmožin álgimen. EU fállá nu gohčoduvvon álggahandoarjaga, man bádjeolmmožin álgi olbmot sáhttet ohcat EJB-guovddáža bokte.

Doarjja lea 25 000 euro sturrosaš, man lassin doarjaga ohccit sáhttet ohcat loana 100 000 euro rádjái.

Gáibádussan doarjaga oažžumii lea, ahte ohcci lea 18-41-jahkásaš ja sus lea doarvái buorre máhtu, man son galgá háhkat golmma jagi siste ohcama sáddemis – ohcci galgá čađahit unnimustá nuppi dási dutkosa.

Doarjagiin nuorra bádjeolbmot galget dasto loktet sin boazologu unnimustá 80 bohccui.

Boahttevuođas lea okta sihkkaris ášši – boazobargguin bargan

Sihke Harri Aslak Jomppanen ja Toni Salminen leaba mannamen soahtevehkii boahtte ođđajagimánus. Ođđa studerenplánat sudnos eai goittot vel leat.

– Dal áiggun guolástit geasi, čakčat bigálusaide ja de manan Avvilii soahtevehkii. Eará in leat vel smiehttan, soaitá leat ahte vuolggán studeret, Salminen lohká.

Sihkkar lea goittot dat, ahte soai joatkiba bargguid badjeolmmožin.

– Joatkkaoahpuin eai vel leat plánat, muhto boazobargguin ainge boađán dál joatkit, dadjá Jomppanen.

“Boazodoalu dálá dilli sáhtálii leat fuonitge”

Bártnit leaba smiehttan áigeguovdilis áššiid, mat čuhcet boazodollui. Jomppanen lohká ahte fuonibutge sáhtálii mannat.

– Boazodoalu dilli lea áibbas buorre, daningo dat namalassii sáhtálii leat fuonitge. Spiriin eat goassige beasa errui ja Jiekŋameara ruovdegeaidnu ii lihkus leat ainge vel boahtimen, dadjá Jomppanen.

Soai goittotge doaivuba ahte dilli das buorrána boahttevuođas.

– Boahttevuođas mun in nu máhte dadjat, muhto mun doaivvun, ahte dat livčče buorre, Salminen smiehttala.

Dán artihkkala lea čállán Lassi-Olavi Mäkinen. Son lea geassehárjehallin Yle Sámis.

20.6.2018 dii 13:50: Govvatekstii lasihuvvon buot govas leahkki ohppiid namat.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä