Sápmi |

Bohccogazza lea hástaleaddji muhto čáppa duodjemateriála, mainna sáhtášii ávkkástallat eanetge

Sámi oahpahusguovddážis Anáris oahpahalle mannan vahkuloahpa ávnnastit bohccogacca. Oahppi fuomášii jođánit, ahte gazza lea hástaleaddji materiála, mii reagere earret eará dálkái.

Video: čiŋat bohcco gazzas.
Video
Filmma lea doaimmahan Inger-Elle Suoninen ja govven/čuohppan Vesa Toppari. Filmmas oahppi Anniina Veitonmäki ja oahpaheaddji Arja Kustula.

Dávjá sámi giehtadujiid materiálan oidno ovdamearkka dihte sisti, náhkki, čoarvi, dákti dahje muorra. Leat goittotge olu earáge ávdnasat, maiguin livčče vejolaš ávkkástallat duojis.

Sámi oahpahusguovddáš ordnii mannan vahkuloahpa Anáris kurssa das, mot bohccogacca ávnnastit čikŋan. Kursii oassálaste sullii logenar olbmo. Oahpaheaddji Arja Kustula lea gal ožžon oahpu das, mot dávtti, muora ja geađggi galgá ávnnastit, muhto gacca duddjoma son lea gártan ieš oahpahallat. 

– Ledjen sullii 20 jagi dassái Sámi oahpahusguovddážis muhtin kurssas ja oahpaheaddji čájehii gacca, mii lei hui šealgat ja bures dahkkon. Son dajai, ahte dan go oahpat dahkat, de mii leat čeahpit, iige oahpahan eará, Kustula muittaša.

Kustula ii máhte buohtastahttit gacca materiálan masage. Son lohká, ahte dainna ferte leat várrogas.

Arja Kustula.
Oahpaheaddji Arja Kustula lea ieš oahpahallan ávnnastit bohccogacca. Govva: Vesa Toppari / Yle

Anniina Veitonmäki oassálasttii vahkuloahpa kursii, go liiko duddjot, muhto materiálan gazza lei amas. Jođánit goit oahpai, mot gazza rievdá.

– Dat lea miellagiddevaš materiála, dat muhtin láhkai eallá iežas eallima iige dan sáhte kontrolleret. Sáhttá leat nu ahte barggat dainna guhká ja gazza botnjasa eará guvlui go gáttášii. Hui miellagiddevaš materiála, Veitonmäki lohká.

čiŋat bohcco gazzas.
Bohccogazza lea Anniina Veitonmäki mielas geasuheaddji materiála. Govva: Vesa Toppari / Yle

Oahpaheaddji ja oahppit ságastallet ja duddjojit seammás. Sáhka jorrá earret eará dan birra, mot gazza eallá dan maŋŋá, go dat lea njuoskaduvvon ja liktejuvvon. Hápmi rievdá oba áigge. Maiddái dálki sáhttá váikkuhit gazzačiŋa hápmái.

čiŋat bohcco gazzas.
Bohccogazza lea hástaleaddji duodjemateriála, mii reagere ovdamearkka dihte dálkái. Govva: Vesa Toppari / Yle

Oahpaheaddji Arja Kustulai bohcco iešguđet oasit leat oahppásat. Dušše čielgedávttit báhcet geavatkeahttá, go Kustula álgá duddjot.

– Čielgedávttit leat dakkárat, maid in leat geavahan, muhto buot eará gal: čoarvvit, bánit, olloldávttit, náhkki, oaivi, buot, Kustula muitala.

Varrasamosat: Sápmi

Váldoođđasat

Varrasamosat