Sápmi |

Bohkás eai jáhke ollit šat goassige buolašolahusaide – báikkálaččaid mielas dálkelágádus sirddii mihttára menddo bivvalis báikái

Bohkás mihtiduvvui 20 jagi dassái Suoma buolašolahus, 51,5 galbmagráđa.

Kari Kokkomäki Bohká boares mihttidanbáikkis.
Bohkká livčče dán dálvvige fasken alcces buolašolahusa, jus boares mihttára logut dohkkešedje, muitala gililaš Kari Kokkomäki. Govva: Kaija Länsman / Yle Sápmi
Bohkká

Guovdu guolbana ceaggájit giddejuvvon luŋkkaid duohken mihttárat, mat adde dán moatte dálu Bohkká-gillái juoga, mii ii earáin leat, Suoma buolašolahusa.

Ođđajagimánus jagis 1999 gilis mihtidedje virggálaččat 51,5 gráđa buollaša.

Ođđa olahusaide eai šat goassige ole, muitala báikkálaš Kari Kokkomäki.

– Juohke dálvvi dáppe lea gal buolaš, dego ovdalge, muhto min virggálaš mihttár lea sirdojuvvon eará sadjái, muitala Kokkomäki ja guovlá, maid boares mihttár dán dálvvis muitala.

– Dán dálvvi, dán vahkus, dákko leamašan binnáš badjel 40 gráđa buolaš. Dainna livčče dánge dálvvi Bohká gilli fasken dálvvi buolašolahusa, árvala Kokkomäki.

Bohká buolášmihttárat.
Dáid mihttáriid logut eai leat šat virggálaš logut. Govva: Kaija Länsman / Yle

Muhto Bohká guolbanis mihtiduvvon lohku ii dohkke. Boares mihtidanbáiki ii leat šat virggálaš mihtidanbáiki – ođđa virggálaš automáhttamihttár bođii gillái jagis 2008.

Dán dálvvi garraseamos buolaš, -38,7 lea Suomas mihtiduvvon Soađegilis sotnabeaivve 27.1.2019.

Buolašolahusat eai beaškke, go mihttára sirde buolžža ala

Ođđa, automáhtalaš dálkki mihtidanbáiki lea Bohká alimus báikkis, stivlli máddagis. Guossavuovddi siste ceaggájit vaikko guđelágan mihttárat.

Dálkediehtinlágádusa mielde dálkestašuvnnaid bidjet báikkiide, mat govvidit mihtidanbáikki lassin bures lagašbirrasage dálkki.

– Bohká dáhpáhusas mii sirddiimet mihttára báikái, mii govvida buorebut guovllu. Ovdal Bohká temperatuvrraid mihtidedje johkaleagis, dál buolžža alde.

– Buolaš niedjá johkalegiide ja doppe sáhttet mihtidit dálvit máŋga gráđa eanet buollaša, čállet dálkediehtinlágádusas.

Bohká ođđa dálkestášuvdna lea stivlli máddagis, buolžža alde.
Bohká ođđa dálkestášuvdna lea stivlli máddagis, buolžža alde. Govva: Kaija Länsman / Yle

Dálkediehtinlágádus háliida gávdnat dan gaskamearálaš temperatuvrra, mii doallá stuorámus oasis guovllus.

– Lea buoret, go árvvut leat lagabus gaskaárvvuid, go daid ravddamus árvvuid, čállet sii.

Boares ja ođđa mihttáriid gaskkas máŋgga gráđa erohusat

Gaskkohagaid Kari Kokkomäki ain fitná guovlladeamen, maid boares eallisilbamihttár muitala. Gal dat mihttára sirdin ain binnáš dálvegápmagis gahká.

– Gal dat veahá váivvida. Juohke dálvvi hállet dan dálvvi olahusas, mis lea áli goit garrasut buolaš, muhto min virggálaš mihttár čájeha áibbas eará go duohtavuođa.

Son lea merkon bajás, ahte boares ja ođđa mihttára árvvuin lea golmma-njealji gráđa erohus.

– Gal dies lea midjiide báikkálaččaide olu, maid leat suoskkadan jo logi jagi, leaikkastallá Kokkomäki mihttára sirdimis.

Varrasamosat: Sápmi

Váldoođđasat

Varrasamosat

Muualla Yle.fi:ssä