Sápmi |

Boles navdá Heahtá misiid báhččimis roavva ealliidsuodjalanrihkosa ja vahátdagu – Neakkela bálgosa boazoisit: bohccot gávdnon Neakkela siidda guovllus

Heahtá gili davábealde gávdne mannan vahkus logi báhččon miesi, bolesis muitalit.

Heahttá, miessi, bohccot, miesit, rihkus, rikos, Hetta, Enontekiö, vasa, vasat
Heahtás báhččon miesit. Govva: Marko Ranta

Lappi bolesa dutkanjođiheaddji ja rihkuskomissára Kirsi Huhtamäki muitala, ahte unna guovllus Heahtás leat gávdnon oktiibuot 10 báhččon miesi.

Miesit eai lean merkejuvvon ja danin boles ii vel dieđe, gean miesit ledje. Miesit leat gávdnon Heahtá gili davábealde.

Yle Sápmi muitalii mannan vahkus áššis.

Hannu Ranta: "Dat leat min siidda bohccot"

Neakkela bálgosa boazoisit Hannu Ranta muitala, ahte miesit gávdnojedje sin bálgosa ja Neakkela siidda guovllus.

– Vaikko dat leat goddemiesit, nu diehtit, ahte dat leat min siidda bohccot, Ranta dadjá.

Dáhpáhus lea Ranta mielas hirpmástuhtti ja son sávvá dáhpáhusa čielgat.

– Sávvamis bolesat ožžot dan dihtui. Bolesii dás galgá luohttit ahte ovdána dat dutkan ja dat čielgá dan bokte.

Boles navdá dáhpáhusas roavva ealliidsuodjalanrihkosa ja vahátdagaheami.

Boles bivdá cavgilemiid áššis

Iltalehti-aviisii Kirsi Huhtamäki muitala dasa lassin, ahte sii leat gullán olbmuid ášši olis, muhto oktage olmmoš ii leat vel eahpiduvvon áššis. Bolesis goittotge lea diehtu das, makkár bissuin miesit leat goddon.

Boles dieđihii ovdalis, ahte misiid eai leat viggan goddit dalán, baicce daidda lea dagahuvvon guhkesáigásaš biidnašupmi ja hiđis jápmin.

Boles lea ožžon cavgilemiid áššis, ja daid leat ain dárkkisteamen.

Boles sávvá lassedieđuid olbmuin, jus giige diehtá áššis maidege. Boles bivdá cavgilemiid eandalii jonssoha áiggi dáhpáhusain.

Cavgilemiid sáhttá sáddet bolesii šleađgaboasttain čujuhussii ati.lappi@poliisi.fi.

Beaiváduvvon 8.7. dii. 14.45: Lasihuvvon váldogovva, mas oidnojit miesit.

Varrasamosat: Sápmi

Váldoođđasat

Varrasamosat

Muualla Yle.fi:ssä