Sápmi

Buohcceviesut Muonios ja Ohcejogas láhčet sierra lanjaid koronavirusa geažil buohccán olbmuid várás

Muonios fidnejit logenár lanja koronavirusa dagahan dávddaide buohccán olbmuide dalán jus lea dárbu.

Heidi Eriksen
Doavttir Heidi Eriksen mielde Ohcejogas leat ráhkkanan sirret koronabuohcciid. Govva: Vesa Toppari / Yle

Dearvvasvuođaguovddážat davvin leat ráhkkanan dikšut maiddái koronavirusa dagahan dávddaide buohccán olbmuid. Ná lea sihke Muonios ja Ohcejogas. Jus olbmos leat vuoigŋanváttisvuođat de dearvvasvuođaguovddážiin leat sirrejuvvon ossodagat, gos ovdamearkan vuoigŋanváttisvuođain addojuvvo lassioksygena.

– Mis lea ordnejuvvon sierra sadji gokko váldit vuostá daid olbmuid, geain leat mat nu vuoigŋanvuolšedávdamearkkat. Dan lanjas mii doallat dan olbmo, nu ahte son ii boađe viidásabbot deikke dearvvasvuođaguovddáža beallai njoammudit dan dávdda vejolaččat earáide, dadjá Ohcejoga doavttir Heidi Eriksen.

– Dan sajis divššár váldá vuostá dán olbmo buot suodjegárvvut badjelis, váldá vejolaš iskosiid ja maiddái doavttir dutká dan sajis.

Dađi várásge dearvvasvuođaguovddážat leat ráhkkanan, ahte gártet váldit koronavirusa geažil buohccán olbmo dikšui.

– Jus midjiide boahtá dakkár olmmoš gean ii dárbbaš dikšut buohcceviesus muhto goittot ii birge ruovttusge, dahje muđui galgá erret deikke seaŋgaossodaga beallai, de mii leat ráhkkanišgoahtán dasa nu, ahte leat válmmaštan ovtta lanja mii livčče errengeavahusas.

– Dárbbu mielde váldit atnui seaŋgaossodagas eanet dakkár sierra lanjaid jus boahtá dárbu, amaset njoammudit earáide. Mishan leat namalassii seaŋgaossodagain ja ássanbálvalusbáikkiin (Dorvu, Seitakartano) orrumin riskajoavkkuid olbmot, de mii fertet leat duođai fuolalaččat ahte dat dávda ii njoamo sidjiide, čilge Heidi Eriksen Ohcejogas.

Muonios lea sadji go doppe lea boares ja ođđa buohcceviessu geavahusas

Muonio dearvvasvuođaguovddáža bargit leat njukčamánu rájes ráhkkanan koronavirusa dagahan dávddain buhcciid várás.

– Rabasdivššu vuostáváldinsajis mii leat várren vuoigŋanoali buhcciid várás sierra sisaboahtima ja dutkanbáikki, muitala njoammudávddain vástideaddji doavttir Sirpa Pajunen.

Pajunen muitala, ahte dikšunossodagas sii leat ordnen sajiid nu, ahte doppe leat koronabuhcciid várás sierra dutkansajit go eará buhcciide.

– Dán lea dahkan álkibun dat, go mis lea aiddo váldojuvvon atnui ođđa buresveadjinguovddáš ja boares dearvvasvuođaguovddáža sáhttit maid geavahit gaskaboddosaččat.

– Oažžu dadjat ahte mis leat 5–10 saji vejolaš koronabuhcciide. Áigi čájeha man ollu leat sii, geat dárbbašit dáppe saji ja man ollu leat dakkárat, geat dárbbašit viesus guovddášbuohcceviesu dási divššu, dadjá doavttir Sirpa Pajunen Muonios.

Muonio buohcceviesus bastet addit dárbbu mielde maiddái lassioksygena jus buohcci dan dárbbaša.

THL addin dieđuid mielde koronadávda ii leat vel njommon davvin Ohcejogas, Anáris, Eanodagas, Muonios ja Soađegilis.

Čájánasaid váldimii leat dál vuolidan gáibádusaid – ja čájánasaid maid váldet

Jus navdet olbmui njommon koronavirusa, de čájánasaid sáhttet váldit sihke Muonios ja Eanodagas. Dál go čájánasaid váldima kriterat leat ložžejuvvon, de čájánasain váldima leat lasihan. Nu lea dilli maiddái Ohcejogas.

– Dieđusge go epidemiija lea dál álgimin, muhtun gielddain Lappis lea juo álgán, de mii erenoamáš herkket váldit daid iskosiid. Gánneha leat oktavuođas vai mii beassat smiehttat man muttus dát min dilli lea, dadjá Ohcejoga doavttir Heidi Eriksen.

Varrasamosat: Sápmi

Váldoođđasat

Varrasamosat

Muualla Yle.fi:ssä