Sápmi |

Buot golbma sámegiela linnjá álget boahtte čavčča Sámi oahpahusguovddážis – anárašgiela oahpuide ohcet vel hámi

Anárašgiela linnjá háliidit ollašuhttit ovttas Giellagasain.

Saamelaisalueen koulutuskeskuksen koltansaamen kielen opiskelijat
Nuortalašgiela ja -kultuvra linnjá álgá fas boahtte jagi. Govva: Mikkal Morottaja / Yle

Sámi oahpahusguovddážis Anáris lea maiddái boahtte čavčča vejolaš lohkat anáraš-, davvisáme- ja nuortalašgiela.

Oahpahusguovddáža rektor Eeva-Liisa Rasmus-Moilanen muitala, ahte sii fertejit juohke jagi sierra guorahallat sámegiela ja -kulturlinnjáid álggaheami ruhtadeami geažil.

– Mii galgat gieđahallat buot linnjáid resurssaid vuođul, ahte maid mii bastit ollašuhttit ja das leat mielde maiddái sámegielat, dadjá Rasmus-Moilanen.

Rasmus-Moilanen illuda, ahte sii sáhttet fállat ovtta jagi bisti oahppolinnjáid buot golmma sámegillii maiddái boahtte jagi.

– Mii galgat álo smiehttat, leago mis doarvái ruhta ollašuhttit buot skuvlejumiid ja dálge mii leat gártan bargat hui olu dan ovdii, ahte dat ollašuvvet.

Anárašgiela ja -kultuvra linnjá háliidit ollašuhttit ovttas Giellagas-instituhtain

Dábálaččat sámegielaid linnjáin oahppi čađaha jagi áigge oktiibuot 60 oahppočuoggá.

Sámi oahpahusguovddážis goit guorahallet, sáhtášedjego vehá geahpedit anárašgiela linnjá oahppočuoggáid.

– Mii leat smiehttan, ahte dagašeimmet boahtte jagi ovttasbarggu, mas Sámi oahpahusguovddáža oassi livččii 45 oahppočuoggá. Mun in vel dieđe dadjat sihkkarit, ahte leago dan linnjá siste vejolaš stuđeret eanet, dadjá Rasmus-Moilanen.

Sámi oahpahusguovddáš ja Oulu universitehta Giellagas-instituhtta leat smiehttamin, sáhtášedje dat ordnet anárašgiela linnjá ovttas boahttevuođas.

Giellalinnját leat bivnnuhat

Buot golbma sámegiela linnjá leat hui bivnnuhat Sámi oahpahusguovddážis.

Giellalinnját bistet ovtta jagi ja dat oahppit, geat leat lohkan jogo nuortalaš-, anáraš- dahje davvisámegiela, leat oahppan giela bures. Máŋggat sápmelaččat leatge rávisolmmožin váldán gielaset giellalinnjáid bokte ruovttoluotta.

– Dat leat leamašan bivnnuhat. Olbmot dihtet olles áigge eanet, ahte sámegielaid sáhttá stuđeret dáppe. Olbmot ohcet ain eambbo deike, dadjá Rasmus-Moilanen.

Nuortalašgiela linnjá lea váldán dál jagi bottu, muhto boahtte čavčča oahput álget fas ovttas davvisámegielain ja anárašgielain.

Varrasamosat: Sápmi

Váldoođđasat

Varrasamosat

Muualla Yle.fi:ssä