Sápmi |

Buvttadeaddji ráhkásmuvai Ohcejohkii – Doppe álget fas govvet ođđa tv-ráiddu

Ohcejohka lea šaddamin bivnnuhis govvenbáikin. Ođđajagimánus doppe álget fas govvet rihkusráiddu, mas neaktá maiddái Hildá Länsman.

Skállovárri ii álggos gullan ráidui moge muhto dan čálihedje veagal ráidui dan maŋŋá go bagadalli ja govvejeaddjit fitne gárddi luhtte.
Skállovárri ii álggos gullan Kaamos-ráidui moge, muhto dan čálihedje veagal prográmmii dan maŋŋá, go bagadalli ja govvejeaddjit fitne gárddi luhtte. Govva: Vesa Toppari / Yle

OHCEJOHKA Kaamos-ráiddu govvenhoavda Tapani Launonen gállá Skállovári bigálusgárddi birrasis ja ohcá vuohkkaseamos govvenbáikkiid ođđa rihkusráidui. Kaamos-ráiddu álget govvet Ohcejoga birrasis jo ođđajagimánus, dalán loahppášbasiid maŋŋá.

Ráiddu eai hálit gosge eará sajis govvet go namalassii dáppe, muitala govvenhoavda Tapani Launonen.

– Dát lea min buvttadeaddji Markos Annala jurdda. Son lea leamašan dáppe ovdalge bargamin ja ráhkásmuvai dán báikái. Danin dáid duovdagiin govvejuvvo guhkit, fiktiiválaš ráidu, muitala Launonen.

Kaamos muitala 40-jahkásaš rihkusdutki Juliusas, guhte mátkkošta Ohcejohkii hávdádit eatnis. Go son joavdá eatnis ruovttubáikái, son gártáge vásihit amas rihkkosiid, mat bággejit su báhcit Sápmái. Dát dáhpáhusat leat seammás mátki Juliusa ruohttasiidda.

Govvenhoavda Tapani Launonen ozai vuogas govvenbáikkiid miehtá Ohcejoga.
Govvenhoavda Tapani Launonen ozai vuogas govvenbáikkiid miehtá Ohcejoga. Govva: Vesa Toppari / Yle

Skállovári bigálusbáiki ii álggos gullan ráidui moge, muhto dan čálihedje veagal prográmmii dan maŋŋá, go bagadalli ja govvejeaddjit fitne gárddi luhtte.

– Guorusinge dát báiki lea issoras fiinnis, visot dát bárttat ja duovdagat. Go mii girddihat drone-kámera áimmus ja oaidnit girdno, de das olbmo čalbmi vuoiŋŋasta, čilge Launonen.

Länsman lea filmmas viissis, muhto erdos nisu

Artista Hildá Länsman moddjá čábbát, muhto farga son sihkku mojis eret ja rievdá viissis, muhto erdos Raakelin. Son lea ožžon rolla ođđa tv-ráiddus.

– Dat šaddá hui speanta. Mun in leat ovdal beassan diekkár bargguin bargat. Dat šaddá munnje debyhtta neaktimis. Gealdagasas lean!

Länsman beasai ráidui fárrui, go sutnje válde oktavuođa olbmot, geat ohcet heivvolaš neavttáriid. Son galggai hárjehallat olggul ovtta dáhpáhusa ja fitnat neaktimin dan kámera ovddas. Ja nu sus šaddá Raakel.

– Raakel lea báikkálaš ohcejohkalaš nuorra ja sus šaddá oalle dehálaš rolla dien muitalusas, govvida Länsman.

Hildá Länsman.
Hildá Länsman neaktá ráiddus Raakel-nammasaš nissona. Raakel lea viissis, muhto erdos nuorra nisu. Govva: Vesa Toppari / Yle

Ohcejogas leat ovdalge govven tv-produkšuvnnaid. Ovdamearkka dihte Ivalo-ráiddus muhtun oasit govvejuvvojedje Ohcejogas. Olles bearraša luonddufilbma Ailo-bohcco birra boahtá Suomas ealligovvateáhteriidda juovllaid áigge, dasge oassi lea govvejuvvon Ohcejogas.

Muhto mii dahká dán ođđa tv-ráiddus earálágana go ovddit produkšuvnnat?

– Dat, ahte mii leat olu Ohcejogas. Vaikko dás leat olu miellagiddevaš muitalusat, de mii leat lahka albma eallima.

Ohcet gávttehasaid stuorra sámeheajaide

Sámevuohta galggašii maid oidnostit rihkusráiddus, namalassii Hilddá ja sámeheajaid bokte. Eandaliige sámeheajaide ráiddu dahkkit dáhttot báikkálaččaid veahkkin. Iežas sáhttá almmuhit veahkkin juogo Facebook dahje adreassa moguls(a)mogulmovies.com bokte.

– Mis leat ráiddus stuorra sámeheajat. Livččehan dat govas čáppa, jus doppe livčče olu gávttehasat, sávvá Launonen.

Mii loahpaloahpas ráiddus geavvá ja makkár šaddá Hildá Länsman vuosttas tv-barggus, dat lea oaidnimis boahtte jagi miessemánus. Hildá Länsman goit vuordá iluin oahppat ođđa.

– Das lea olu oahppanláhkai. Kánske justa dat metodat, mo don beasat sierra dovdduide. Kánske dat lea dat, mo don sáhttát dasto neaktit dan olggos, Länsman smiehtada.

28.11.2018 dii. 16:44. Bajilčála divvojuvvon bagadalli buvttadeaddjin.

Varrasamosat: Sápmi

Váldoođđasat

Varrasamosat