Sápmi

Čábbámus juovlalávlagiid lávlot spiehkastatdilis: unnit dilálašvuođat ja oassi gáiddusin – Turku dilálašvuođa besset dál buohkat čuovvut

Joulukuusi koristeineen.
Čábbámus juovlalávlagat ordnejuvvojit dán jagi spiehkastatdilis. Govva: Henrietta Hassinen / Yle

Dán artihkkalii leat čohkken, gos ja goas lávlot čábbámus juovlalávlagiid sámeguovllus ja maiddái sámegillii.

Searvegottit lágidit juohke jagi miehtá Sámi dáhpáhusaid, gos lávlot čábbámus juovlalávlagiid maiddái sámegillii. Dán jagi koronadilli váikkuha goittot sakka čábbámus juovlalávlagiid ordnemiidda ja oassi dilálašvuođain ordnejuvvo gáiddusin.

Máŋgga báikkis dilálašvuođat ordnejuvvojit máŋgii vai lea álkit čuovvut njoammuneastadandoaimmaid. Maiddái máskka geavaheapmi ávžžuhuvvo daid báikkiin, gos čábbámus juovlalávlagat leat báikki alde.

Turku duopmogirku ordne dilálašvuođa gáiddusin buohkaide

Turku duopmogirkus sáddejit sámegielat čábbámus juovlalávlagiid dáhpáhusa neahta bokte odne gaskavahku 2.12. diibmu 19.00. Dát lea nuppi háve go Turku duopmogirku lágida sámegielat juovlalávlagiid lávlundáhpáhusa.

Dilálašvuohta ordnejuvvo gáiddusin koronadili geažil ja buohkat sáhttet geahččat dan. Dilálašvuhtii sáhttá oassálastit čujuhusas virtuaalikirkko.fi ja girku sámebarggu Facebook-siidduin namain Sámebargu Suoma ev.-lut. girkus.

Dilálašvuohta vurkejuvvo ja dan sáhttá geahččat maŋŋá čujuhusas virtuaalikirkko.fi.

Dilálašvuođas lea mielde Turku earkebismagotti bisma Kaarlo Kalliala. Juovlalávlagiid leat lávlloheamen musihkkár Annukka Hirvasvuopio-Laiti bártniidisguin Niillas ja Áilu Laitiin, kántor Jari Linjama ja Eveliina Feodoroff-Rantala.

Čábbámus juovlalávlagat Ohcejoga guovllus guovtti gillii

Ohcejoga searvegottis lávlot čábbámus sáme- ja suomagielat juovlalávlagiid čuovvovaš báikkiin:

Ohcejogas Pub Rástegáissás gaskavahku 16.12. diibmu 19.00.

Njuorggámis Njuorggáma rohkoslanjas duorastaga 17.12. diibmu 18.30 ja diibmu 19.30.

Ohcejogas Ohcejoga girkus lávvardaga 19.12. diibmu 18.00 ja diibmu 19.00.

Gáregasnjárggas Gáregasnjárgga kapeallas sotnabeaivve 20.12. diibmu 14.00 ja diibmu 15.00.

Ohcejogas Restoráŋŋa Deatnus maŋŋebárgga 22.12. diibmu 19.00.

Eanodaga guovllus lávlot gáiddusin

Heahtás bearjadaga 18.12. diibmu 20.00 suomagillii gáiddusin Heahtá girku YouTube-kanálas.

Heahtás sotnabeaivve 20.12. diibmu 18.00 sámegillii gáiddusin Heahtá girku YouTube-kanálas. Mielde Anni-Marja Valkepää, Helena Valkeapää ja Heli Kinisjärvi.

Anára searvegottis lávlot dáid áiggiid

Suoločielggis Suoločielggi kapeallas lávvardaga 5.12. diibmu 16.00 ja 18.00 Mauno Hepolain.

Suoločielggis Suoločielggi kapeallas juovlavahkus vuossárgga 21.12., maŋŋebárgga 22.12. ja gaskavahku 23.12 diibmu 19.00 .

Avvilis Avvila girkus maŋŋebárgga 7.12. diibmu 18.00, gaskavahku 8.12. diibmu. 18.00 ja duorastaga 9.12. diibmu 18.00.

Anáris Anár sámegirkus vuossárgga 14.12. diibmu 18.00 suomagillii ja sámegillii Mari Valjakkain.

Anáris Anár sámegirkus gaskavahku 16.12. diibmu 18.00 suomagillii ja sámegillii Mari Valjakkain.

Soađegili searvegotti guovllus

Vuohčus meassu ja čábbámus juovlalávlagat suomagillii ja sámegillii sotnabeaivve 13.12. diibmu 14.00

Soađegilis mánáid čábbámus juovlalávlagat suomagillii girkus ja boares hávdeeatnamis sotnabeaivve 13.12. diibmu 15.00.

Soađegilis Unari Kapeallas suomagillii gaskavahku 16.12. diibmu 17.00 ja 18.00 Tiina Ylimäkiin. Dilálašvuhtii besset max. 30 olbmo hávil.

Soađegilis Soađegili girkus suomagillii duorastaga 17.12. diibmu 18.00 ja 19.00. Girkui besset oktanaga 120 olbmo.

Soađegilis streamejuvvon čábbámus juovlalávlagat suomagillii gáiddusin Soađegili girkus gaskavahku 23.12. diibmu 18.00. Searvegoddi ii leat báikki alde.

Cavgil, jus dieđát eambbo dáhpáhusaid

Jus dieđát gos eará sajiin lávlot čábbámus juovlalávlagiid sámeguovllus dahje sámegillii, čális dieđu midjiide čujuhussii sami.radio(at)yle.fi dahje Yle Sámi Facebook-siidui.

Beaiváduvvon 10.12.2020 dii. 10.03 Eanodaga searvegotti lávlundilálašvuođat leat gáiddusin

Varrasamosat

Muualla Yle.fi:ssä