Sápmi |

Čáhceskohteriiguin beassá fas vuodjit Deanu čázádagas – gielddus gomihuvvui hálddahusrievttis 

Davvi-Suoma hálddahusriekti gomihii Lappi EJB-guovddáža mearridan gildosa lágaheapmen.

Tenojoki
Deanu čázádaga čáhceskohtergielddus lea gomihuvvon Davvi-Suoma hálddahusrievttis. Govva: Annu Passoja / Yle

Deanu čázádaga čáhceskohtergielddus lea gomihuvvon Davvi-Suoma hálddahusrievttis.

Lappi EJB-guovddáš gilddii ovddit giđa čáhceskohteriid geavaheami Deanujoga Suoma beale čázádaga guovllus. Dat gokčá Deanu lassin vihtta eará joga guovllu ja buot Máttajávrri bajábeali jávrriid Ohcejoga ja Anára gielddaid guovllus.

EJB-guovddáš geahčai earret eará, ahte čáhceskohteriid geavaheapmi sáhttá lebbet luossaparasihta ja hehttet guliid lassáneami dahjege gođu.

Priváhta olmmoš váiddii áššis hálddahusriektái ja son oinnii gildosa dárbbašmeahttumin.

Hálddahusriekti gomihii gildosa lágaheapmin. Hálddahusrievtti mielde áššis eai leat čájehan doarvái duođaštusaid das, ahte čáhceskohteriid geavaheamis Deanu čázádagas čuovošedje mearkkašahtti vahágat, mat čužžot čáhcejohtolatlágas.

EJB-guovddáš: “Oalle váivves dilli”

Lappi EJB-guovddáš ii váidán áššis alimus hálddahusriektái (AHR).

– Geahčaimet, ahte mearrádusa ákkastallamat leat dakkárat, ahte alimus hálddahusrievttis ii boađáše rievdadus dasa. Gielddus nohká. Leahan dat oalle váivves dilli, muitala Lappi EJB-guovddáža biras- ja luondduriggodagaid ossodaga hoavda Timo Jokelainen.

Jokelainen dadjá, ahte álgga áššái vulggii norgalaččain. Norggas čáhceskohtergildosis mearrida gielda ja Deanu čázádaga guovllu gielddain Norggas lea gielddus fámus dušše Deanu gieldda guovllus.

– Go gielddus lea fámus dušše oasis guovllus ja nuppe beallái rájá, de dat čoavddus ii doaimma, Jokelainen árvala.

Suomas čáhceskohteriid gieldimis doaibmaváldi lea sirdásan EJB-guovddážiin Traficomii.

Varrasamosat: Sápmi

Váldoođđasat

Varrasamosat

Muualla Yle.fi:ssä