Sápmi |

Čáhppesjuolgi-sápmelaš Elle-Máijá Tailfeathers oaččui Skábmagovat-bálkkašumi: "Mun lean nu hirpmástuvvan, dat lea stuorra gudni"

Bálkkašumiin háliidit čájehit, mo Skábmagovain atnet árvvus Tailfeathers barggu erenoamážit sápmelaš ealligovvaservošii.

Elle-Máijá Tailfeathers Skábmagovain 2020.
Elle-Máijá Tailfeathers vuosttas guhkes ealligovva čájehuvvui Skábmagovain lávvardaga. Govva: Vesa Toppari / Yle

Filbmabagadalli Elle-Máijá Tailfeathers lea ožžon jagi 2020 Skábmagovat-bálkkašumi barggustis eamiálbmogiid ealligova ovdii.

Tailfeathers lea čáhppesjuolgi-sápmelaš filbmadahkki, buvttadeaddji, neavttár ja aktivista.

Kanádas bajásšaddan Tailfeathersis lea nana čanastat áhčis ruoktoguovlluide dážabeal Sápmái, gos son lea doaibman earret eará neavttárin Beaivváš Sámi Našunálateáhteris.

Vancouvera ealligovvaskuvllas jagis 2006 válmmaštuvvan Tailfeathers lea dahkan máŋggaid oanehisfilmmaid, maid vuolggasadjin leamašan aktivisma, sosiálalaš vuoiggalašvuohta ja eamiálbmogiid čuolmmat.

Bálkkašumi eai juoge juohke jagi

Skábmagovat-filbmafestivála dáiddalaš jođiheaddji Jorma Lehtola muitala, ahte sii háliidit bálkkašumiin čujuhit, mo sii atnit árvvus Tailfeathers barggu erenoamážit sápmelaš ealligovvaservošii.

–Tailfeathersa karriera čalmmustahttá, mo bargu eamiálbmogiid filmmaid ovdii lea máilmmiviidosaš iige čatnon dušše ovtta báikái, ákkastallá Lehtola.

Tailfeathers lea filmmaidis lokten ovdan eamiálbmogiid rašes áššiid ja váttisvuođaid, dego goddon ja jávkan nissonolbmuid galgamušaid, oljoindustriija váikkuhusaid ja dál maiddái bearašveahkaválddi čuovvumušaid, dadjá Lehtola.

– Son movttiidahttá máŋggaid earáid ja ovdamearkkainis čujuha, man fiidnát ealligovain sáhttá gullot maid sosiálalaš oamedovddu jietna.

Skábmagovat-elokuvajuhlien taiteellinen johtaja Jorma Lehtola
Skábmagovaid dáiddalaš jođiheaddji Jorma Lehtola oaivvilda, ahte Tailfeathers lea buorre ovdagovva nuorra sápmelaš filbmadahkkiide. Govva: Vesa Toppari / Yle

Lehtola muittuha, ahte dán bálkkašumi eai juoge juohke jagi.

– Ovddit bálkkašumi juohkimis lea dál golbma jagi ja daid leat Skábmagovaid 22-jahkásaš historjjá áigge juohkán dál gávcci háve. Leat vuordán, ahte ánssut gávdnojit dan veardde, ahte bálkkašumi gánneha juohkit, čilge Lehtola.

Skábmagovat-bálkkašupmi geigejuvvui Tailfeathersii eamiálbmogiid ealligovvafestivála Skábmagovain lávvardateahkedis 25.1.2020 muohttagis huksejuvvon Guovssahasteáhteris Anára gilis.

Bjarne Store-Jakobsen ja Elle-Máijá Tailfeathers
Elle-Máijá Tailfeathers (olg.) áhčiinis Bjarne Store-Jakobseniin illudeigga bálkkašumis. Govva: Vesa Toppari / Yle

– Mun lean nu hirpmástuvvan, dat lea nu stuorra gudni. Galggan giitit Skábmagovaid, mu filbmabargiid ja min filbmajoavkku. Mun jáhkán, ahte mun in ánssáš dan, baicce mii buohkat min filbmajoavkkus ánssášat dan, dadjá Tailfeathers.

Tailfeathers áhčči Bjarne Store-Jakobsen njuolga njuorasmuvvá, go sus jearrá dovdduid bálkkašumi juohkima maŋŋá.

– Dat lea hirbmat stuorra gudni ja hirbmat somá. Lean rámis dieđusge, go diekkár čeahpes nieida.

Kanádas bálkkašuvvon filbma čájehuvvui Skábmagovain

Elle-Máijá Tailfeathersa vuosttas guhkes ealligovva, ovttas Kathleen Hepburniin bagadallon The Body Remembers When The World Broke Open lea jo geargan vuoitit máŋggaid bálkkašumiid ja leamašan kritihkkariid válljejupmi diibmá buoremus kanádalaš ealligovvan.

Ealligovva, man vuosttaseahket lei Berlinales jagis 2019, govvida guovtti nissona deaivvadeami soaittáhagas, go nubbi lea báhtareamen bearašveahkaválddi. Ealligovva čájehuvvui filbmafestivála Skábmagovain lávvardaga 25.1. čájáhusas, mii lei bahkkadievva.

Su árat buvttadussii gullet earret eará Bloodland (2011), A Red Girl’s Reasoning (2012), mii kommentere eamiálbmotnissoniid goddimiid ja láhppomiid, sihke Bihttoš - Rebel (2014), man fáddán lea Tailfeathersa sápmelaš duogáš.

Varrasamosat: Sápmi

Váldoođđasat

Varrasamosat

Muualla Yle.fi:ssä