Sápmi |

Čakča lea gelddolaš áigi ođđa studeanttaide – "Lean diehtán álo, ahte vuolggán Giellagas-instituhtii"

Čakča lahkonišgoahtá ja studeanttaide čakča dárkkuha oahpuid álgima. Ođđa studeanttaide universitehtaeallima álggaheapmi lea stuorra eallinnuppástus, go universitehtat leat guhkkin gávpogiin.

Ánne-Sire Länsman ja Saara Seipiharju
Ánne-Sire Länsman (gur.) illudii deaivat ođđa studeanta Saara Seipiharju (olg). Govva: Laura Pieski / Yle

Jus háliida lohkat universitehtas sámegiela dahje -kultuvrra, ferte leat gárvvis fárret eret Sámis ja gávpogii. Oulu universitehtas doaibmá Giellagas-instituhtta, mii vástida sámegielaid ja kultuvrra oahpaheamis olles Suomas alit dásis.

Dán čavččage Giellagasas álggahit vuot ođđa studeanttat studeret juogo sámegiela dahje sámiid kultuvrra. Giellagas-instituhta hoavda Anne-Siire Länsman ii vel máhte dadjat dárkilis loguid ođđa studeanttaid mearis. Giellagasas leat goittotge giela ja kultuvrra bealde 16 álggahanbáikki, ja dasa lassin bohtet vel sierra vuoigatvuođain studeanttat oahpu gazzat.

Okta ođđa studeanttain lea anárlaš Saara Seipiharju. Seipiharju ii leat goassige orron gávpogis, ja nuba son lea vehá gealdagasas stuorra gávpogii fárremis.

– Go eallin rievdá, de dalle olmmoš ii vealttekeahttá dieđe maid jurddašit ja dieđusge dat lea vehá kulturšohkka, go lean masá 20 orron Anáris. Jáhkán gal, ahte hárjánan dasa sihkkarit ja go lea luopmu, de in báze deike Oului, vuoddján dalán ruoktot.

Giellagas-instituhta hoavda Ánne-Sire Länsman ii leat fuobmán, ahte ođđa studeanttat bálašedje gávpogii fárremis, muhto diehtá, ahte unna gilážiid nuoraide gávpot soaitá orrut stuoris ja gávpogii sajáiduvvan sáhttá leat hástaleaddji.

Giellagas-instituhta geahččalage veahkehit nuoraid gávdnat skihpáriid ja leat doarjjan gávpoteallima álggaheamis.

– Mis leat bagadallit, geat johtet ođđa ohppiiguin dalle álgočavčča. Mis leat deaivvadeamit, gos mii čoahkkanat háleštallat ja oahpásmuvvat, gánske maid sávnnodit. Giellagasas lea maiddái nu, ahte min luhtte oažžu álot fitnat, muitala Länsman.

Vuordá jo oahpuid álgima

Saara Seipiharju lohká iežas álo diehtán, ahte son áigu vuolgit Oului skuvlii. Son lea ovdal jurddašan anárašgiela oahpaheaddji ámmáha. Dál son ii leat goittotge áibbas sihkkar, ahte leago oahpaheaddji ámmát justa maid háliida. Dál baicca orru miella dušše lohkat anárašgiela universitehta dásis.

Son vuordá jo movttain oahpuid álgima.

– Ja muđuige, ahte beassá oaidnit makkár dat universitehtaeallin lea, ja beassá oahppat ođđa áššiid. In dieđe maid galggašin dan láhkai vuordit, go inhan mun dieđe universitehtaoahpuin maidege. Vaikko vehá balan, de gal mun jo dattetge vuorddán dan ahte skuvla álgá.

Guldal olles ságastallama Saara Seipiharjuin ja Ánne-Sire Länsmaniin Yle Areenas. Soai leigga mielde gaskavahku Johtti Radio -sáddagis.

Varrasamosat: Sápmi

Váldoođđasat

Varrasamosat

Muualla Yle.fi:ssä