Sápmi |

Čearretsullo moratoria lea doaibman jo moadde jagi, muhto dál doppe eai šat oro miehtá geasi: "Dat lea dán jagi dakkár galbma moratoria"

Dán gease moratoria ásaheaddjit eai ieža leat nu viššalit báikki alde Čearretsullos.

Aslak Holmberg Deanu moratorias jagi 2017
Aslak Holmberg Deanu moratorias jagis 2017. Govva: Ville Fofonoff / Yle

Deanu Čearretsullui lea fas dan geassái ceagganan moratoria, dál jo goalmmát háve. Aslak Holmberg lea okta dain servodatberošteddjiin, geat ledje moadde vahku dassái doalvumen moratoriagalbbaid ja leavgga báikki ala.

Moratoria rahppojuvvui seammá sadjái go ovddit jagiidge, muhto dán gease eai Ellos Deatnu -lihkadusa olbmot leat nu viššalit báikki alde.

– Dat lea dán jagi eanetge dakkár galbma moratoria, mii oaivvilda ahte mii eat boađe nu olu ieža leat doppe. Nu mot dalle vuosttaš geasi go ásahuvvui, miihan oruimet doppe geasi miehtá.

Ellos Deatnu -joavku ásahii moratoria Čearretsullui jagis 2017. Aslak Holmberg muitala, ahte dalle lei dehálaš leat báikki alde sullos, vai dat šaddá čielga báikin sin lihkadussii deaivvadit ja bargat sin ulbmiliid ovddas.

Dehálaš lei maiddái boktalit báikkálaš olbmuid vuostálastimii ja oažžut beaggima Deanu áššái, dadjá Holmberg. Sii ožžoge beaggima áššái, go sullos fitne olu guossit ja doaimmaheaddjit. Dál ii leat šat nu dárbu sullos orodit.

– Dat barggut maid mii bargat, mii sáhttit daid iešguhtege bargat doppe gos mii leat. Dat ii dan láhkái gáibiduvvo, ahte mii leat juste doppe sullos, čilge Holmberg.

Ellos Deatnu -liikkeen moratorio.
Ellos Deatnu -joavku ceggii vuosttaš háve moratoria Čearretsullui geasset 2017. Govva: Ellos Deatnu

Anni Ahlakorpi lea maiddái leamaš moratoriadoaimmain mielde. Dán geassái son ii leat vel beassan fitnat Čearretsullos ja dohko son dál áibbaša.

Vaikko dál eai sullos nu áŋgirit čohkkáge, de oaidná maiddái Ahlakorpi moratorias mearkkašumi.

– Dat čájeha earáide ovdamearkka, ahte ná maid sáhttá. Gal olbmot dáppe máhttet ja dihtet mo eallit duoinna jogain, mo stivret dan ja mo áimmahuššat dan.

– Moratoria ásaheapmi lea dušše bargoneavvu ja vuohki čájehit, ahte mis lea dat fápmu dáppe. Mii eat dárbbaš olggobeale olbmuid deike stivret ja moivet daid áššiid, čilge Ahlakorpi.

Oktage moratorias ii leat gávnnahallan lobihis bivddus

Moratoria ulbmil lea leamaš čájehit stáhtaide, ahte moratoriaristtat eai dohkket Deanu soahpamuša. Aslak Holmberg oaidná moratoria dehálaš bargovuohkin čuoččuhit sámiid rivttiid ja dihtoláhkái váldit mearridanválddi ruovttoluotta báikkálaš dássái.

Čearretsullo moratorias eai leat vel deaivan váttisvuođaid dan ektui, jos leat bivdán Suoma ja Norgga lágaid vuostá. Oktan sivvan soaitá dat, ahte moratorias ieš bivdu ii leat leamaš nu beaktil.

– Dat lea eanetge leamašan dakkár čoahkkananbáiki midjiide, čilge Holmberg ja joatká.

– Mishan gal fitne doppe muhtin guollefávttatge guossis dalle jagis 2017, ja eat mii dieđus dalle lean dokko šlivgumen gáttis. Ii leat oktage gávnnahallan vel bivddus doppe moratorias, nu dalle dieđusge eai leat boahtán makkárge čuovvumušat.

Dalle go Ellos Deatnu ásahii moratoria, sii celke moratoria leat fámus nu guhká, ahte Deanus lea dakkár soahpamuš, mii lea báikkálaččat dohkkehuvvon.

– Dát moratoria doalaheapmi lea dieđusge min vuohki čájehit dan, ahte báikkálaččat eai leat goassege dohkkehan dálá njuolggadusaid, ja dat ii dalle sáhte leat dat, mii stivre min bivddu dáppe, dadjá Holmberg.

Varrasamosat: Sápmi

Váldoođđasat

Varrasamosat

Muualla Yle.fi:ssä